پٹنہ، 22 اپریل (یو این آئی) بہار کی معروف سماجی و ملی شخصیت اور جمعیتہ علماء بہار کے ناظم اعلیٰ الحاج حسن احمد قادری کا آج پونے گیارہ بجے دن میں ا ن کی رہائش گاہ پر حرکت قلب بند ہوجانے کے سبب انتقال ہوگیا۔ مرحوم کی عمر 78 سال تھی۔ ان کے پسماندگان میں بیوہ کے علاوہ ایک بیٹا اور ایک بیٹی ہیں ان کی نماز جنازہ آج بعد نماز مغرب خانقاہ مجیبیہ میں ادا کی جائے گی اور اسکے بعد باغ مجیبی میں ہی سپرد خاک کئے جائیں گے۔ان کو تنفس کی بیماری تھی لیکن وہ صحت مند تھے اور پے درپے اموات سے دل برداشتہ تھے۔
ناظم نشر و اشاعت جمعیتہ علما بہار ڈاکٹر انوارالہدیٰ کے مطا بق وہ صبح تک بالکل ٹھیک ٹھاک تھے۔ اپنے بیٹے ڈاکٹر فیض احمد قادری سے اخبار اور چشمہ مانگا اور تھوڑی دیر اخبار پڑھنے کے بعد انہوں نے کہا کہ آج کل جب اخبار کھولئے تصویر کے ساتھ اپنوں کے وفات کی خبر ملتی ہے اس سے کافی پریشان رہتا ہوں اسکے تھوڑی دیر اپنے بیٹے کو کہا کہ مجھے گبھراہٹ ہورہی ہے۔ گزشتہ ایک دو سال سے انکو تنفس کی بیماری تھی تو بیٹے نے فوراً آکسجین لگوایا۔ انہوں نے فوراً آکسیجن کو ہٹوادیا اور کہا کہ جاؤ تم دونو ں میاں بیوی اسپتال جانے کی تیاری کرو۔ جب بیٹے تیار ہوکر اپنے والد کے کمرے میں آتے ہیں تو ان کے جسم میں کسی طرح کی کوئی حرکت نہیں پائی۔
وہ بہار کی دینی و ملی جماعتوں میں ایک بہترین مفکر کی حیثیت سے جانے جاتے تھے۔ اپنی زندگی کے بیشتر عمر انہوں نے جمعیتہ علماء کے کاز اور کاموں کو آگے بڑھانے میں لگا دیا۔ پٹنہ جنکشن پر مدنی مسافر خانہ کی تعمیر کیلئے ان کو ہمیشہ یاد کیا جائیگا۔ انہوں نے جس جانفشانی کے ساتھ مدنی مسافر خانہ کی کثیر منزلہ عمارت اور مارکیٹ کی تعمیر کرایا وہ اپنی مثال آپ ہے۔ وہ ہمیشہ تعمیری ذہن کے آدمی تھے۔ ملک و ملت کی سرخروئی کیلئے ہمیشہ کوشاں رہتے۔ الحاج غلام سرور کی قیادت والی بہار ریاستی انجمن ترقی اردو میں بہ حیثیت جنرل سکریٹری انہوں نے کئی سالوں تک کام کیا۔ بعد کے دنوں میں وہ جمعیت علماء سے جڑ گئے۔ اس وقت جمعیتہ علماء بہار کے صدر مولانا سیدشاہ عون احمد قادری تھے اور عالم گنج میں اس کا دفتر تھا۔ شاہ عون احمد قادری نے انکو ناظم بنایا اورپھر انہوں نے کبھی پیچھے مڑ کر نہیں دیکھا اور بعد کے دنوں میں وہ ناظم اعلیٰ بنے۔ اپنے دور میں انہوں نے جمعیتہ علماء بہار کی کئی صوبائی اجلاس کرائے۔ کل ہند اجلاس کرانے کی انکی تمنا ادھوری ہی رہ گئی۔
ان کا تعلق خانقاہ مجیبیہ، پھلواری شریف سے تھا۔ انکے والد مولوی فضل احمد قادری بھی کافی سماجی ومتحرک شخصیت تھے۔ الحاج حسن احمد قادری خانقاہ مجیبیہ، پھلواری شریف کے ناظم تھے۔ پھلواری شریف ہائی اسکول، پھلواری شریف کے صدر تھے۔ ملت اردو گرلس ہائی اسکول، پھلواری شریف کے نائب صدر تھے۔ وہ لگ بھگ 40 سالوں سے جمعیت علماء سے جڑے تھے۔ جمعیت علماء ہند کے مجلس عاملہ کے رکن رہے۔ مدنی مسافر خانہ ویلفئیر سوسائٹی،پٹنہ کے صدر کے علاوہ مدرستہ البنات امانیہ قادریہ، پھلواری شریف کے سکریٹری، مسلم فنڈ ٹرسٹ کے ممبر بھی تھے۔ وہ کئی سالوں تک بہار ریاستی حج کمیٹی کے ممبر بھی رہے۔
بہار اقلیتی کمیشن، بہار ریاستی سنی وقف بورڈ اور بہار مدرسہ ایجوکیشن بورڈ کے بھی ممبر رہ چکے تھے۔ انہوں نے ساری زندگی ملی مسائل کے ساتھ جدوجہد کی، ان کی کاوشوں سے بہت سارے مسائل بھی حل ہوئے۔ان کے پاس معاملات کی مکمل فہرست تھی اور وہ مسلمانوں کے مسائل کے حل کیلئے حکومت سے بھی ٹکر ا جاتے تھے۔جب بھی بہار مقننہ کا اجلاس شروع ہونے ہی والا ہوتا تھا، اس سے کچھ دن پہلے ہی جمعیتہ کے دفتر مدنی مسافرخانہ میں ہنگامی میٹنگیں منعقد کرتے۔مسلم ایم ایل اے، صحافی، دانشور، تمام جماعتوں کے علمائے کرام موجود ہوتے تھے۔.غور وفکر کرنے کے بعد فیصلہ کیاجاتا، اس بار ان امور کو اٹھانا ہوگا، اراکین اسمبلی کو یہ ذمہ داری سونپی جاتی کہ وہ اسے ایوان کے اندر اٹھائیں، ہم باہر سے دباؤ ڈالیں گے۔اس طرح سے بہت سارے معاملات حل ہوتے تھے۔
حسن احمد قادری کام کرنے اور کرانے کا ہنر بہت اچھی طرح سے جانتے تھے۔ انہوں نے حضرت مولانا اسعد مدنی کے ساتھ بہت دنوں تک کام کیا اور اس کے بعد حضرت مولانا ارشد مدنی کے ساتھ شانہ بہ شانہ چلتے رہے۔ امیر شریعت مولانا منت اللہ رحمانی، مولانا عبد الرحمٰن، مولانا سید نظام الدین اور مولانا محمد ولی رحمانی کے ساتھ ساتھ ملت کے کاموں کو آگے بڑھاتے۔ ملی اتحاد کیلئے وہ ہمیشہ کوشاں رہتے تھے۔ زندگی کے آخری ایام تک انہوں نے جمعیت علماء کو نہیں چھوڑا۔ جمعیت علماء ان کا اوڑھنا بچھونا تھا۔ وہ وقت کے پابند اور نہایت ہی منظم شخص تھے۔ مدنی مسافر خانہ میں بلاناغہ روز بیٹھ کر ملت کی فکر کرتے رہتے۔
انکے انتقال کی خبر ملتے ہی پورے بہار میں ایک بے چینی کی لہر دوڑ گئی۔ لگاتار تعزیتی پیغامات موصول ہوتے رہے اور ساتھ انکی رہائش گاہ پر لوگ تعزیت کیلئے پہنچنے لگے۔ وہ تمام سیاسی، سماجی، دینی و ملی جماعتوں میں بہت احترام کی نظر سے دیکھے جاتے تھے۔ اظہار تعزیت کرنے والوں میں امارت شرعیہ بہار اڑیسہ و جھارکھنڈ کے نائب امیر شریعت مولانا شمشا د رحمانی، خانقاہ رحمانی مونگیر کے سجادہ نشیں حضرت مولانا سید احمد ولی فیصل رحمانی، امارت شرعیہ کے قائم مقام ناظم مولانا شبلی القاسمی، جماعت اسلامی بہار کے امیر حلقہ مولانا رضوان احمد اصلاحی، امیر مقامی سلطان احمدصدیقی، آل انڈیا ملی کونسل کے نائب صدر مولانا انیس الرحمٰن قاسمی، جمعیت اہلحدیث کے نائب امیر مولانا خورشید مدنی، شیعہ عالم مولانا امانت حسین، فلیم کے صدر و معروف سرجن ڈاکٹر احمد عبد الحئی، سابق ایم ایل اے ڈاکٹر اظہار احمد، اسحاق اثر، محمدحسنین، بہار رابطہ کمیٹی کے سکریٹری افضل حسین، ڈاکٹر انعام ظفر شمسی، مولانا سعد احمد قاسمی، مولانا محب اللہ عرفانی، ڈاکٹر اشرف النبی قیصر، حاجی بلال، مولانا محمد حارث، مولاناخالد انور پورنوی، کے وغیرہ شامل ہیں۔
یو این آئی۔ ع ا۔