جموں،25 مئی (یو این آئی) جموں وکشمیر نیشنل پنتھرس پارٹی کے چیئرمین ہرش دیو سنگھ نے یونین ٹریٹری انتظامیہ پر دوہرا معیار اپنانے کا الزام عائد کرتے ہوئے کہا ہے کہ جموں وکشمیر میں بی جے پی سے وابستہ لوگوں کے لئے ایک قانون ہے جبکہ اپوزیشن والوں کے لئے دوسرا قانون ہے۔
انہوں نے کہا کہ سرکاری زمینوں پر قبضہ نہ جمانے کا قانون اپوزیشن والوں کے لئے ہے جبکہ بی جے پی سے وابستہ لیڈران وکارکنان اس قانون سے مستثنیٰ ہیں۔
موصوف لیڈر نے کہا کہ بی جے پی کے لیڈر آج کی تاریخ میں بھی کھلے عام پبلک میٹنگوں کا اہتمام کرتے ہیں جبکہ ان کو روکنے ٹوکنے والا کوئی نہیں ہے۔
ہرش دیو نے ان باتوں کا اظہار یہاں میڈ یا کے ساتھ بات کرتے ہوئے کیا۔
ان کا کہنا تھا: ’جموں وکشمیر میں دو قانون ہیں ایک بی جے پی والوں کے لئے ہے اور دوسرا اپوزیشن والوں کے لئے ہے، حال ہی میں دیکھا گیا کہ ہزاروں کسانوں کو زمینوں سے بے دخل کیا گیا جس پر وہ چالیس پچاس برسوں سے کام کررہے تھے ریڈہ والوں کے ریڈوں کو توڑا گیا اور ان سے کہا گیا کہ سررکاری زمینوں پر کسی کو قبضہ کرنے کی اجازت نہیں ہے‘۔
موصوف لیڈر نے کہا کہ اگر یہ قانون اپوزیشن والوں کے لئے ہے تو بی جے پی والوں کے لئے کیوں نہیں ہے۔
انہوں نے کہا: ’یہ قانون سب کے لئے ہونا چاہئے لیکن بی جے پی کے لیڈران وکارکنان اس سے مستثنیٰ کیوں ہیں، ہم نے بی جے پی کے ان لیڈروں اور کارکنوں کی تفصیلات حکام کو فراہم کی تھیں جو سرکاری زمینوں پر قبضہ جمائے ہوئے ہیں اور غیر قانونی تعمیرات بھی بنائے ہیں لیکن ان کے خلاف کوئی کارروائی عمل میں نہیں لائی گئی‘۔
ہرش دیو نے کہا کہ بی جے پی کے کئی لیڈران آج بھی سرکاری رہائش گاہوں میں رہائش پذیر ہیں جبکہ وہ کسی بھی سرکاری عہدے پر فائز نہیں ہیں۔
انہوں نے کہا کہ ان لیڈروں نے اپنی کوٹھیاں کرایے پر دی ہیں اور خود سرکاری بنگلوں میں رہتے ہیں۔
موصوف چیئرمین نے کہا کہ بی جے کے لیڈران آج بھی کھلے عام عوامی میٹنگوں کا اہتمام کرتے ہیں ان کا روکنے ٹوکنے والا کوئی نہیں ہے۔
انہوں نے کہا حد یہ ہے کہ کورونٹائن سینٹروں میں جو لوگ بی جے پی کے ساتھ وابستہ ہیں ان کا جلدی ٹیسٹ کیا جاتا ہے اور گھر روانہ کیا جاتا ہے لیکن جو لوگ ان کے ساتھ نہیں ہیں انہیں قرنطینہ سینٹروں میں برا حال ہے۔
یو این آئی -ایم افضل