سری نگر،19 مارچ (یو این آئی) جموں وکشمیر کے لیفٹیننٹ گورنر منوج سنہا نے سری نگر کے مضافاتی علاقہ سمپورہ میں اتوار کے روز 250 سو کروڑ روپیوں کی لاگت سے تعمیر ہونے والے غیر ملکی سرمایہ کاری کے پہلے تجارتی کمپلیکس کا سنگ بنیاد رکھا تین سو کنال اراضی پر محیط اس کمپلیکس کے لئے خلیجی ملک متحدہ عرب امارات کے 'امار' گروپ نے سرمایہ کاری کی ہے تقریب کے حاشیئے پر موصوف لیفٹیننٹ گورنر منوج سنہا نے نامہ نگاروں کو بتایا کہ یہ جموں و کشمیر کے لئے تاریخی دن ہے کہ متحدہ عرب امارات کے 'امار' گروپ نے سری نگر کے سمپورہ میں 10 لاکھ مربع فٹ رقبے پر 250 کروڑ روپیے کے لاگت کا تجارتی مال قائم کرنے پر سرمایہ کاری کرنے کا فیصلہ کیا ہے۔
انہوں نے کہا: 'یہ فخر کا لمحہ ہے اور امار گروپ جموں اور سری نگر میں آئی ٹی ٹاوروں کے قیام کے لئے بھی سرمایہ کاری کرے گا اور مجموعی طور یہ پانچ سو کروڑ روپیوں کی سرمایہ کاری ہوگی'۔
ان کا کہنا تھا کہ اس سے یہاں روز گار بھی بڑے گا اور جموں وکشمیر خاص طور پر سری نگر کے لوگوں کی جو لمبے عرصے سے امیدیں تھیں وہ پوری ہوں گی۔
قبل ازیں منوج سنہا نے تقریب سے اپنے خطاب کے دوران کہا کہ امار گروپ کی جانب سے کی جانے والی سرمایہ کاری ابھی شروعات ہی ہیں۔
انہوں نے امار گروپ سے اس تجارتی کمپلیکس کی تکمیل کو مختصر وقت میں یقینی بنانے کی تاکید کی۔
ان کا کہنا تھا: 'جموں وکشمیر میں کچھ لوگ منفی ذہنیت رکھتے ہیں اور حکومت کی پالسیوں کو لگاتار تنقید کا نشانہ بنا رہے ہیں کیونکہ ان لوگوں کو یونین ٹریٹری میں ہو رہی بڑے پیمانے کی ترقی ہضم نہیں ہو رہی ہے'۔
لیفٹیننٹ گورنر نے کہا کہ جموں و کشمیر نے 5 اگست 2019 کے بعد بڑے پیمانے پر تبدیلی دیکھی ہے۔
انہوں نے کہا: 'سرکاری اراضی پر کچھ لوگوں نے ناجائز قبضہ کیا تھا جس کو بازیاب کیا گیا'۔
ان کا کہنا تھا کہ باز یاب شدہ اراضی کو صنعتی کارخانوں، کھیل کے میدانوں اور قبرستانوں کے لئے استعمال کیا جائے گا۔

یو این آئی ایم افضل