OthersPosted at: Dec 1 2020 1:15PM ٹی آرایس کے رکن اسمبلی این نرسمہیاچل بسے
حیدرآباد یکم دسمبر(یواین آئی) ٹی آرایس کے رکن اسمبلی و سرکردہ وکیل این نرسمہیا شہر حیدرآبادکے ایک کارپوریٹ اسپتال میں دل کا دورہ پڑنے سے چل بسے۔ان کی عمر64برس تھی۔ان کی پیدائش نلگنڈہ ضلع کے نکریکل منڈل میں ہوئی تھی۔عثمانیہ یونیورسٹی میں اپنی تعلیم کے دوران انہوں نے اسٹوڈنٹس فیڈریشن آف انڈیا کی سرگرمی کے ساتھ قیادت کی تھی اور بعد ازاں وہ کمیونسٹ ادب جیسے تلنگانہ کی مسلح جدوجہد سے راغب ہوئے جس سے کئی افسانوی شخصیات نے جذبہ حاصل کیا۔نرسمہیا نے عثمانیہ یونیورسٹی سے ایم اے اور ایل ایل بی کی ڈگری حاصل کی تھی اور وہ سی پی آئی ایم سے وابستہ ہوگئے۔وہ نلگنڈہ اور نکریکل کی عدالتوں کے سرکردہ وکیل تھے۔وہ متحدہ اے پی میں نکریکل حلقہ سے دو مرتبہ اسمبلی کیلئے منتخب ہوئے۔1999تا2004وہ اسمبلی میں سی پی آئی ایم کے فلورلیڈر بنائے گئے تھے۔بعد ازاں تلنگانہ پر پارٹی کے موقف سے انحراف کرتے ہوئے وہ 2014میں ٹی آرایس میں شامل ہوگئے اور ناگرجناساگر حلقہ سے انہیں شکست ہوئی تاہم 2018کے اسمبلی انتخابات میں انہوں نے کانگریس کے سینئر لیڈر جاناریڈی کو 7771ووٹوں سے شکست دی۔ان کے چل بسنے پر وزیراعلی تلنگانہ کے چندرشیکھرراو نے گہرے صدمہ کا اظہار کیا اور کہا کہ نرسمہیا نے زندگی بھر عوام کے لئے کام کیا۔ان کی موت سے پارٹی اور حلقہ کے عوام کا نقصان ہوا۔
یواین آئی وخ