ناندیڑ، 10 جون (یو این آئی) مرکزی وزیر داخلہ اور بھارتیہ جنتا پارٹی (بی جے پی) کے سینئر لیڈر امت شاہ نے ہفتہ کو عوام سے مہاراشٹر کے سابق وزیر اعلیٰ ادھو ٹھاکرے کو سبق سکھانے کی اپیل کی۔
آج شام مقدس شہر ناندیڑ میں ایک جلسہ عام سے خطاب کرتے ہوئے مسٹر شاہ نے مسٹر ٹھاکرے پر تنقید کی اور کہا کہ مسٹر ٹھاکرے نے گزشتہ انتخابات میں مسٹر نریندر مودی کے نام پر ووٹ حاصل کئے تھے اور چیف منسٹر کے عہدہ کے لئے نیشنلسٹ کانگریس پارٹی (این سی پی) اور کانگریس سے ہاتھ ملا لیا۔
مسٹر شاہ مودی حکومت کے نو سال مکمل ہونے پر بی جے پی کی طرف سے شروع کی گئی عوامی رابطہ مہم کا افتتاح کرنے یہاں پہنچے تھے۔ انہوں نے دعویٰ کیا کہ پچھلے نو برسوں کے دوران مودی حکومت نے غریبوں کے لیے بہت سے فلاحی کام کیے ہیں۔ مسٹر ٹھاکرے کے اقدامات پر تنقید کرتے ہوئے مسٹر شاہ نے کہا کہ مہاراشٹر کے اسمبلی انتخابات بی جے پی اور شیوسینا نے مل کر لڑے تھے۔ اس الیکشن میں بی جے پی کو زیادہ سے زیادہ ووٹ ملنے کے بعد مسٹر دیویندر فڑنویس کا وزیر اعلیٰ بننا طے تھا لیکن مسٹر ٹھاکرے کو کوئی دلچسپی نہیں تھی۔ نیشنل ڈیموکریٹک الائنس (این ڈی اے) کی زبردست جیت کے بعد مسٹر ٹھاکرے نے اپنے جرات مندانہ الفاظ نہیں رکھے اور اقتدار کی خاطر این سی پی اور کانگریس کے کیمپ میں چلے گئے۔
انہوں نے مطالبہ کیا کہ مسٹر ٹھاکرے کو اپنا کردار واضح کرنا چاہئے۔ انہیں تین طلاق پر اپنا اور اپنی پارٹی کا موقف واضح کرنا چاہئے۔ مسٹر ٹھاکرے کو نہ صرف رام مندر کے مسئلہ پر اپنا موقف واضح کرنا چاہئے بلکہ مسلم ریزرویشن کے مسئلہ پر بھی انہیں مہاراشٹر کے لوگوں کو صاف صاف بتانا چاہئے۔
مسٹر شاہ نے مسٹر ٹھاکرے کو چیلنج کیا کہ وہ مہاراشٹر کے لوگوں کو مشترکہ سول کوڈ کے بارے میں اپنی پالیسی کی وضاحت کریں۔ انہوں نے کانگریس کے ساتھ ساتھ اپوزیشن پارٹیوں پر بھی تنقید کی۔
اس موقع پر ریاست کے نائب وزیر اعلیٰ دیویندر فڑنویس، مرکزی وزیر مملکت برائے خزانہ ڈاکٹر بھگوت کراڈ، ریاستی بی جے پی صدر چندر شیکھر باونکولے، تعلقات عامہ کے ریاستی سربراہ پروین دریکر اور ضلع کے سرپرست وزیر گریش مہاجن کے علاوہ کئی دیگر بی جے پی لیڈران بشمول ممبران پارلیمنٹ اور قانون ساز بھی موجود تھے۔
انہوں نے کہا کہ بی جے پی مہاراشٹر سے 45 لوک سبھا سیٹیں جیتنے کے لئے پرعزم ہے اور مراٹھواڑہ اور مہاراشٹر میں بی جے پی کو ایک اور موقع دینے کی اپیل کی۔
وزیر اعظم نریندر مودی کی قیادت میں ہمارے ملک کا نام دنیا میں روشن ہو رہا ہے۔ مسٹر مودی جب بھی بیرون ملک جاتے ہیں تو مودی-مودی کے نعرے لگتے ہیں۔ انہوں نے کہا کہ اس سے قبل محترمہ سونیا گاندھی اور مسٹر منموہن سنگھ کی بدعنوان حکومت نے 12 لاکھ کروڑ روپے کے گھپلے کئے تھے۔
یواین آئی۔ م ع۔ 2240