NationalPosted at: Feb 28 2017 4:23PM صدر جمہوریہ ہند دو سے تین مارچ کے دوران کیرلا اور تملناڈو کے دورے پر رہیں گے
نئی دہلی،28فروری(یو این آئی) صدر جمہوریہ ہند پرنب مکھرجی، دو سے تین مارچ 2017 کے دوران، کیرلا اور تملناڈو کا دورہ کریں گے۔ 2مارچ 2017 کو، صدر جمہوریہ ہند کوچی میں، موزیرس دوسالہ یعنی ہم عصر آرٹ پر مشتمل ایک نمائش کے چھٹے ایڈیشن کے ایک حصے کے طور پر منعقد ہورہے ایک مذاکرے کا افتتاح کریں گے جس کا عنوان ہے ’’ہمہ گیر ثقافت کی تعمیر کی اہمیت ‘‘۔ اسی دن موصوف کوچی میں ہی چھٹواں کے ایس راجامنی میموریل لیکچر بھی دیں گے۔ 3مارچ 2017 کو صدر جمہوریہ ہند تملناڈو میں تمبرم میں ہندوستانی فضائیہ کے ایم ٹی آئی کو اسٹینڈرڈ 125 (ایچ) اسکویڈرن اور کلرس تفویض کریں گے۔ اسی دن صدر جمہوریہ ہند چنئی میں ادیار میں تھیوسوفیکل سوسائیٹی میں خواتین کی ہندوستانی ایسوسی ایشن کی صد سالہ تقریبات کا بھی افتتاح کریں گے۔ واضح رہے کہ کوچی میں منعقد ہورہی بین الاقوامی ہم عصر آرٹ پر مشتمل مذکورہ دو سالہ نمائش ایک بین الاقوامی تقریب ہے جس کا اہتمام کوچی موزیرس فاؤنڈیشن کے ذریعے کیرلا کی حکومت کے تحت سیاحت کے محکمے کے تعاون واشتراک سے کیا جارہا ہے۔ 2012 سے اب تک اس کے تین ایڈیشن کوچی میں منعقد ہوچکے ہیں جنہیں عالمی آرٹ کلینڈر میں ممتاز مقام حاصل ہوا ہے۔ تاحال یہ دوسالہ نمائش دنیا بھر میں 300 سے زائد فنی شاہکاروں کی نمائش کرچکی ہے جو زائد از 250 فنکاروں کے تخلیق کے نمونے تھے اور لاکھوں لوگ اس کا مشاہدہ کرچکے ہیں۔ مذکورہ موجودہ ایڈیشن کے تحت 31 ممالک مثلاً امریکہ، برطانیہ، فرانس ، جرمنی ، سری لنکا اور پاکستان کے 97فنکار وں کے فنی شاہکار اس نمائش میں رکھے جائیں گے۔ تاحال چار لاکھ ناظرین اسے دیکھنے کے لئے آچکے ہیں۔ کوچی میں منعقد ہونے والے میموریل لیکچر کا اہتمام معروف وکیل اور کیرلا کے پبلک مینس انکوائری کمیشن (ہائی کورٹ کے جج کے مساوی۔ 1992 سے 1997) کے سابق رُکن، آنجہانی کے ایس راجا منی کی یاد میں کیا جارہا ہے۔ مذکورہ لیکچرس کا آغاز 2002 میں کیا گیا تھا اور کے ایس راجامنی لیکچرس، ماضی میں ممتاز شخصیات مثلاً جسٹس وی آر کرشنا ایّر ، جسٹس کے ٹی تھامس، جسٹس کے پی بالاسبرامنین ، ہندوستان کے سابق چیف جسٹس کے جی بالاکرشنن اور قانون اور انصاف کے سابق وزیر سلمان خورشید بھی دے چکے ہیں۔ یو این آئی۔ ایم اے۔ این یو۔