نئی دہلی،25جنوری 2020
میرے عزیز ہم وطنو!
1۔ 71ویں یوم جمہوریہ کی قبل شام، میں ملک اوربیرون ملک رہنے والے ہندوستان کے تمام لوگوں کو دلی مبارک باد پیش کرتا ہوں۔
2۔ آج سے سات دہائی قبل 26جنوری کو ہمارا آئین نافذ ہوا تھا۔ اس کے پہلے ہی اس تاریخ کی خصوصی اہمیت قائم ہوچکی تھی۔
’مکمل سوراج‘ کا عہد لینے کے بعد ہمارے اہل وطن، 1930سے 1947 تک، ہر سال 26جنوری کو ’مکمل سوراج دیوس‘ منایا کرتے تھے۔ اس لئے سن1950 میں اسی تاریخی دن پر، ہم ہندوستان کے عوام نے، آئین کے اصولوں کے تئیں اعتماد ظاہر کرتے ہوئے، ایک جمہوریہ کے طور پر اپنا سفر شروع کیا۔ اور اس وقت سے ہر سال 26جنوری کو ہم یوم جمہوریہ مناتے ہیں۔
3۔ جدید جمہوریت میں نظم حکمرانی کے تین اجزاء ہوتے ہیں۔مقننہ، انتظامیہ اور عدلیہ۔ یہ تینوں اجزاء خود مختار ہوتے ہوئے بھی ایک دوسرے سے منسلک اور ایک دوسرے پر منحصر بھی ہوتے ہیں۔لیکن حقیقت میں تو عوام سے ہی ملک بنتاہے۔’ہم بھارت کے لوگ‘ ہی اپنی جمہوریت کو چلاتے ہیں۔ اپنے مشترکہ مستقبل کے بارے میں فیصلہ لینے کی حقیقی قوت ہم بھارت کے عوام میں ہی پنہاں ہے۔
4۔ ہمارے آئین نے، ہم سب کو ایک خودمختار جمہوریت کے شہری کے طور پر کچھ حقوق عطا کئے ہیں۔لیکن آئین کے تحت ہی، ہم سب نے یہ ذمہ داری بھی لی ہے کہ ہم انصاف، آزادی اور مساوات اور بھائی چارے کے بنیادی جمہوری قدروں کے تئیں ہمیشہ پابند عہد رہیں۔ملک کی مسلسل ترقی اور مستقل بھائی چارے کے لئے،یہی سب سے بہترین راستہ ہے۔ بابائے قوم مہاتماگاندھی کی زندگی کے اصولوں کو اپنانے سے، ان آئینی آدرشوں پر عمل کرنا ہم سب کے لئے اور بھی آسان ہوجاتا ہے۔ ایسا کرتے ہوئے ہم سب، مہاتما گاندھی کی 150ویں سالگرہ کو اور بھی بامعنی رخ دے سکیں گے۔
میرے عزیز ہم وطنو!
ً5۔ عوامی فلاح و بہبود کے لئے، حکومت نے کئی مہم شروع کئے ہیں۔ یہ بات خاص طورپر قابل ذکر ہے کہ شہریوں نے، رضاکارانہ طور پر ان مہموں کو،مقبول عوامی تحریک میں بدل دیا ہے۔ عوام کی شراکت کی وجہ سے ’سوچھ بھارت ابھیان‘ نے بہت ہی کم وقت میں موثر کامیابی حاصل کی ہے۔ شراکت کا یہی جذبہ دیگر شعبوں میں کی جانے والی کوششوں میں بھی دکھائی دیتا ہے۔ خواہ رسوئی گیس کی سبسڈی کوچھوڑنا ہو، یا پھر ڈیجیٹل ادائیگی کو فروغ دینا ہو۔’پردھان منتری اجوولا یوجنا‘ کی حصولیابیاں قابل فخر ہیں۔ ہدف کو پورا کرتے ہوئے آٹھ کروڑ افراد کو اس اسکیم میں شامل کیا جاچکا ہے۔ایسا ہونے سے ضرورت مند افراد کو اب صاف ستھرے ایندھن کی سہولت مل پارہی ہے۔ ’پردھان منتری سہج بجلی ہرگھر یوجنا‘ یعنی ’سوبھاگیہ یوجنا‘ سے لوگوں کی زندگی میں نئی روشنی آئی ہے۔ ’پردھان منتری کسان سمان ندھی‘ کے ذریعہ سے 14 کروڑ سے زیادہ کسان بھائی بہن ہر سال چھ ہزار روپے کی کم از کم آمدنی حاصل کرنے کے حق دار بنے ہیں۔ اس سے ہمارے انّ داتاوں کو باوقار زندگی گذارنے میں سہولت ہورہی ہے۔
جاری۔یو این آئی۔ م ع۔ اے جے