NationalPosted at: Jan 23 2019 7:43PM پرینکا کو لاکر کانگریس نے راہل کی ناکامی تسلیم کی :بی جے پی
نئی دہلی، 23 جنوری(یو این آئی) بھارتیہ جنتا پارٹی نے محترمہ پرینکا وڈرا کو کانگریس کا جنرل سکریٹری اور مشرقی اترپردیش کا انچارج مقرر کئے جانے پر طنز کرتے ہوئے آج کہا کہ کانگریس نے پارٹی صدر راہل گاندھی کی ناکامی عوامی طورپر تسلیم کرلی ہے۔
بی جے پی کے ترجمان سمبت پاترا نے یہاں نامہ نگاروں سے کہا کہ ایک بات آج طے ہوگئی ہے کہ کانگریس پارٹی نے عوامی طور پر اپنے صدر راہل گاندھی کی ناکامی کا اعلان کردیا ہے اور یہ تسلیم کیا ہے کہ وہ ناکام ہوگئے ہیں اور انہیں پرینکا کی بیساکھی کی ضرورت ہے۔
انہوں نے کہا کہ مہاگٹھ بندھن سے پوری طرح مسترد کردئے جانے کے بعد کانگریس کو بیساکھی کی ضرورت تھی او روہ بیساکھی بھی خاندان سے ہی تلاش کی جارہی ہے۔
بی جے پی کے ترجمان نے کانگریس پر خاندانی سیاست کا الزام لگاتے ہوئے کہا’’ آج کانگریس کے پہلے خاندان سے ایک کو تخت پر بٹھایا گیا ہے ۔ یہ فطری ہے۔ انڈین نیشنل کانگریس دراصل ایک خاندان ہی کی پارٹی ہے اس میں کوئی شک نہیں۔ پہلے جواہر لال نہرو، اس کے بعد اندرا گاندھی پھرراجیو گاندھی ’ سونیا گاندھی ، راہل گاندھی اور اب پرینکا گاندھی ۔ ملک جاننا چاہتا ہے کہ آگے کون؟ صرف ایک ہی خاندان سے۔
انہوں نے کہا کہ بی جے پی اور کانگریس میں بنیادی فرق ہے کہ بی جے پی پارٹی کو خاندان مانتی ہے اور کانگریس میں خاندان کو پارٹی مانا جاتا ہے۔ آج کا نیو انڈیا اس طرح کے خاندانی سیاست سے افسردہ ہے۔ سوال یہ ہے کہ کیا ایک ہی خاندان ہندوستان ہے یا ہندوستانی خاندان سے اوپر ہے۔
یو این آئی ج ا