نئی دہلی،18نومبر(یواین آئی)کانگریس کے نائب صدر راہل گاندھی نے رفائل جنگی طیارہ سودے کے سلسلے میں وزیردفاع نرملا سیتارمن سے آج تین سوال پوچھے اور کہا کہ انہیں اس بارے میں پوری معلومات دینی چاہئے۔
مسٹر گاندھی نے ٹویٹ کرکے وزیردفاع سے ان سوالوں کا جواب مانگا ہے۔انہوں نے وزیردفاع سے پوچھا کہ انہیں ملک کو بتانا چاہئے کہ ایک رفائل جنگی طیارے کی قیمت کیا طے ہوئی ہے۔؟
انہوں نے یہ بھی پوچھا کہ کیا وزیراعظم نے پیرس میں ان طیاروں کی خرید کا اعلان کرنے سے پہلے اس بارے میں دفاعی امور کی کابینہ کمیٹی سے اجازت لی تھی۔
کانگریس نائب صدر نے محترمہ سیتارمن سے پوچھا کہ وزیراعظم نے کس وجہ سے ہوابازی امور کی ماہر سرکاری شعبہ کی تجربے کار کمپنی ہندوستان ایروناٹکس لیمیٹیڈ (ایچ اے ایل)کو نظرانداز کرکے ایک ایسے صنعت کار کو ان طیاروں کا ٹھیکا دیا جنہیں اس شعبہ کا کوئی تجربہ نہیں ہے۔
کانگریس کا الزام ہے کہ اس سودے میں اصول و ضوابط کی ہر طرح سے خلاف ورزی کی گئی ہے اور ایک صنعت کار کو 30ہزار کروڑ روپے کا ٹھیکا دینے کےلئے پہلے سے چل رہے اس سودے کے مکمل عمل کو بدل دیا گیا ہے۔کانگریس کا کہنا ہے کہ انہیں نہیں لگتا کہ مودی حکومت کے دور حکومت میں ایک بھی رفائل طیارہ ملک میں پہنچے گا۔۔
یواین آئی۔اےایم۔