جے پور، 11 دسمبر (یو این آئی) راجستھان کی پندرہویں اسمبلی انتخابات کے ووٹوں کی گنتی سبھی ضلع کوارٹر کے سرکاری کالجوں میں سخت حفاظتی انتظامات کے درمیان آج صبح آٹھ بجے شروع ہو گئی۔
الیکشن محکمے کے مطابق پہلے پوسٹل ووٹوں کی گنتی شروع کی گئی ۔ غیر جانبدار اورپر امن ووٹوں کی گنتی کے لئے سیکورٹی کےسخت انتظامات کئے گئے ہیں۔ اس دوران سی سی ٹی وی کیمرے بھی لگائے گئے ہیں تاکہ ووٹوں کی گنتی کی نگرانی کی جا سکے۔
جے پور اور جودھپور میں دو دو مراکز پر اور باقی 31 اضلاع میں ایک ایک مرکز پر ووٹوں کی گنتی کی جا رہی ہے۔ اس طرح 199 اسمبلی حلقوں کے 35 مراکز پر ووٹوں کی گنتی کی جا رہی ہے۔ ووٹوں کی گنتی کے مقام پر داخلے کے لئے سیکورٹی کا سہ سطحی انتظام کیا گیا ہے۔
جے پور میں ضلع کی 19 نشستوں کے لئے ووٹوں کی گنتی راجستھان اور کامرس کالج میں شروع ہوئی۔ اسی طرح دیگر اضلاع میں بھی ووٹوں کی گنتی آٹھ بجے شروع ہوگئی۔ ووٹوں کی گنتی شروع ہونے کے بعد شروع کے ایک دو گھنٹے بعد رجحانات ملنے شروع ہو جائیں گے اور دوپہر بعد نتائج ملنے لگ جائیں گے۔
قابل ذکر ہے کہ پندرهويں اسمبلی کے لئے گذشتہ سات دسمبر کو 199 سیٹوں پر پولنگ ہوئی تھی۔ الور ضلع کے رام گڑھ اسمبلی حلقہ میں بہوجن سماج پارٹی کے امیدوار لکشمن سنگھ کے انتقال کی وجہ سے الیکشن نہیں ہوپا تھا۔
ووٹوں کی گنتی میں وزیر اعلی وسندھرا راجے، سابق وزیر اعلی اشوک گہلوت، کانگریس کے ریاستی صدر سچن پائلٹ سمیت کل 2274 امیدواروں کے انتخابی قسمت کا فیصلہ ہوگا۔
یو این آئی۔ این یو۔