لکھنؤ، 20 اگست (یواین آئی) مرکزی وزیر داخلہ راج ناتھ سنگھ نے آج قومی تفتیشی ایجنسی (این آئی اے) کے لکھنؤ دفتر کا افتتاح کیا۔ گومتی نگر ایکسٹینشن کے سیکٹر سات واقع این آئی اے کے دفتر اور رہائشی کمپلیکس کے افتتاح کے موقع پر اتر پردیش کے وزیراعلی یوگی آدتیہ ناتھ اور این آئی اے کے ڈائریکٹر جنرل شرد کمار موجود تھے۔ این آئی اے کی عمارت تقریبا ڈھائی ایکڑ زمین پر تعمیر کی گئی ہے۔ یہ زمین لکھنئو ڈویلپمنٹ اتھارٹی سے20کروڑ 57لاکھ روپئے میں خریدی گئی تھی۔ کمپلکس کی تعمیر این بی سی سی نے کی ہے اور اس میں قریب 32 کروڑ 66 لاکھ روپے کی لاگت آئی ہے۔ واضح رہے کہ ملک میں خاص طورسے دہشت گردانہ سرگرمیوں کی تحقیقات کے مقصد سے این آئی اے کا قیام 31 دسمبر 2008 کو عمل میں آیا تھا جبکہ 19 جنوری 2009 ء کو ایجنسی نے باقاعدہ کام کرنا شروع کر دیا تھا۔ مرکزی حکومت نے چھ مارچ 2012 کو این آئی اے کی ایک شاخ لکھنؤ میں قائم کرنے کے لئے اپنی منظوری دی تھی جس کے بعد 20 مئی 2012 کو گومتی نگر میں کرایہ کے مکان میں برانچ نے کام شروع کیا۔ لکھنؤ برانچ کے دائرہ میں اتر پردیش کے علاوہ اتراکھنڈ، مدھیہ پردیش اور بہار ریاست آتی ہیں۔ یواین آئی۔ایف اے