نئی دہلی، 8دسمبر (یو این آئی) راجیہ سبھا نے بد ھ کو معاون ری پروڈکٹیو ٹکنالوجی ریگولیشن بل 2021اور سروگیسی ریگولیشن بل 2020کو منظور کردیا جو معاون تولیدی ٹکنالوجی اور محفوظ سروگیسی سے متعلق طبی مراکز کے ضابطے سے متعلق ہے۔
اس دوران ایوان میں ترنمول کانگریس کے چھوڑ کر دیگر اپوزیشن جماعتیں موجود نہیں تھیں جبکہ ترنمول کے اراکین کرسی کے نزدیک کھڑے ہوکر معطل اراکین کی بحالی کی مانگ کررہے تھے۔
ایوان میں دونوں بلوں پر ایک ساتھ بحث کرائی گئی اور صحت اور خاندانی فلاح وبہبود کے مرکزی وزیر منسکھ مانڈویا کے جواب کے بعد انہیں صوتی ووٹ سے منظور کردیا گیا۔ اس کے ساتھ ہی ان دونوں بلو ں پر پارلیمنٹ کی مہر لگ گئی۔ اپوزیشن اراکین نے دونوں بلوں میں ترمیم کے لئے کئی تجاویز دی تھیں لیکن ان اراکین کے موجود نہیں رہنے کی وجہ سے ان ترامیم پر غور نہیں کیا گیا۔
مسٹر مانڈویا نے ان بلوں پر ہوئی بحث کا ایک ساتھ جوا ب دیتے ہوئے کہاکہ مصنوعی حمل کلینکوں اور سروگیسی سے متعلق نظام کو ریگولیٹ کرنا بہت ضروری تھا اس لئے یہ بل لائے گئے ہیں۔انہوں نے کہاکہ اس سے ان خواتین کو احترام ملے گا جو کسی وجہ سے حاملہ نہیں ہوپاتی ہیں اور سروگیسی کے کاروبار کے شیطانی چکر میں پھنسی خواتین کا استحصال بند ہوگا۔ انہوں نے کہاکہ یہ بل ترقی پسند ہونے کے ساتھ ساتھ معاشرے میں خواتین کو باوقار زندگی فراہم کرے گا۔ اس سے سروگیسی کا کمرشلائزیشن رکے گا اور ملک میں اس کے صنعت کی شکل لینے پر روک لگے گی۔
انہوں نے کہاکہ یہ بل قائمہ کمیٹی اور سلیکٹ کمیٹی میں تفصیلی بحث کے بعد پیش کئے گئے ہیں اور ان میں دونوں کمیٹیوں کی بیشتر تجاویز کو شامل کیا گیا ہے۔
انہوں نے کہاکہ بل میں 21سال سے زیادہ عمر کی خواتین کو معاون ری پروڈکٹیو ٹکنالوجی کو اپنانے کا اختیار دیا گیا ہے۔ اس تکنیک کا استعمال کرکے کوئی ڈاکٹر اگر اس کا غلط استعمال کرتا ہے اور غیراخلاقی کام کرکے پیسے کی کمائی کی کوشش کرتا ہے تو اس کے لئے بل میں سخت سزا کا التزام کیا گیا ہے۔
ان کے جواب کے بعد ایوان نے دونوں بلوں کو منظور کردیا۔
اس کے بعد ڈپٹی چیرمین نے ایوان کی کارروائی پورے دن کے لئے ملتوی کردی۔
یو این آئی۔ م ع۔ 1845