نئی دہلی، 18 اکتوبر (یو این آئی) سبری مالا مندر میں خواتین کے داخلے پر پیدا ہونے والے تنازع کے سلسلے میں وزارت داخلہ نے جمعرات کو کہا کہ سبری مالا مندر میں عقیدت مندوں کی حفاظت کی ذمہ داری ریاستی حکومت کی ہے کیونکہ وہاں کے قانون و انتظام ریاستی سرکار کے دائرہ کار میں آتے ہیں۔
وزارت داخلہ کے ایک سینئر افسر نے یو این آئی سے کہا کہ مندر میں خواتین کے داخلے پر سپریم کورٹ کے فیصلے کے بعد قانون و انتظام کے معاملے پر ایک ایڈوائزری پہلے بھی جاری کردی گئی ہے۔ وزارت نے 15 اکتوبر کو ہی کیرلا حکومت کو ایڈوائزری بھیج دی تھی۔
انہوں نے بتایا کہ حقیقت یہ ہے کہ ریاستی حکومت اگر کسی بھی عمر کی خاتون عقیدت مندوں کو مندر میں داخل ہونے سے روکتی ہیں تو یہ راست طور پر سپریم کورٹ کے فیصلے کی خلاف ورزی ہوگی۔
کیرلا حکومت نے وزارت کی ایڈوائزری کے جواب میں مرکز کو یقین دہانی کرائی ہے کہ سپریم کورٹ کے حکم پر عمل کیا جائے گا اور تیرتھ استھل والے علاقوں میں قانون و انتظام کنٹرول میں ہے۔
واضح رہے کہ وزارت داخلہ نے پیر کو سبری مالا معاملے پر کیرلا حکومت کو تفصیلی ایڈوائری بھیجی تھی۔ ایڈوائزری میں کہا گیا تھا کہ قانون و انتظام برقرار رکھنا ریاستی حکومت کا فرض ہے۔ وزارت داخلہ ،ریاستی حکومت کی جانب سے خواتین سمیت سبھی تیرتھ یاتریوں کی حفاظت کو بڑھاوا دیتا ہے۔
سبری مالا احاطے میں 10 سے 50 برس کی عمر کی خواتین بدھ کے روز داخل نہیں ہوپائی تھیں جبکہ سپریم کورٹ نے سبھی عمر کی خواتین کو مندر میں داخل ہونے کی اجازت دی ہے۔ مرکز نے ریاست کو سپریم کورٹ کے فیصلے کے بارے میں پھر سے یاد دلایا۔
یو این آئی۔ این یو۔