نئی دہلی،18نومبر(یواین آئی)جنتادل (یو)کے باغی شرد یادو نے آج الزام لگایا کہ گجرات اسمبلی الیکشن کے پیش نظر حکومت بیرونی ایجنسیوں سے معیشت کی خوبصورت تصویر پیش کررہی ہے جبکہ ملک کی اندرونی اقتصادی حالت ابتر ہوچکی ہے۔
مسٹر یادو نے یہاں پریس کانفرنس میں کہا کہ موڈیج،عالمی بینک اور بین الاقوامی مالیاتی فنڈ ہندوستان کو بغیر جانے ہی وقت بر وقت سرٹیفکیٹ جاری کرتے رہتے ہیں۔نوٹوں کی منسوخی اور اشیا اور خدمات ٹیکس (جی ایس ٹی)نافذ کئے جانے کی وجہ سے کسان،مزدور اورچھوٹی صنعتوں کی اقتصادی حالت بدتر ہوگئی ہے اور چھوٹے چھوٹے کاروبار بند ہونے سے لاکھوں نوجوان بے روزگار ہوگئے ہیں۔
انہوں نے کہا کہ بیرونی ایجنسیاں معیشت کا ایسا ماحول بنانے کی کوشش کررہی ہے کہ جیسے یہ عروج پر پہنچ گئی ہے۔ملک کے سبھی فریقوں کے ماہرین اقتصادیات اور سابق وزیراعظم من موہن سنگھ کا خیال ہے کہ اقتصادی حالت بدتر ہوگئی ہے اور ملک کے عوام اقتصادی بدحالی سے پریشان ہورہے ہیں۔
مسٹر یادو نے کہا کہ حکومت کی کوشش کا گجرات الیکشن پر کوئی اثر نہیں ہوگا اور لوگ سوچ سمجھ کر ہی ووٹ کریں گے۔کانگریس کی قیادت میں اپوزیشن پارٹیاں وہاں لوگوں کو متحد کررہی ہیں اور اس کے اچھے نتائج نکلیں گے۔
یواین آئی۔اےایم۔