رام پور،15اپریل(یو این آئی) مرکزی وزیر اور بھارتیہ جنتا پارٹی ( بی جے پی) کے قد آور رہنما مختار عباس نقوی نے پیرکو کہا کہ کانگریس، سماج وادی پارٹی (ایس پی) بہوجن سماج پارٹی (بی ایس پی) ’ستیہ میو جیتے‘ نہیں بلکہ ’جھوٹ میو جیتے‘ پر یقین رکھنے والی پارٹیاں ہیں۔
مسٹر نقوی نے یہاں رام لیلا میدان میں بی جے پی کے امیدوار جیا پردہ کے حق میں ایک پروگرام سے خطاب کرتے ہوئے کہا،’گناہوں کے اتحاد کی جھوٹی کہانی‘ وزیر اعظم نریندر مودی کے ’اچھی حکمرانی کی سنامی‘ کے سامنےذخس و خاشاک کے مثل ختم ہوجائے گا۔ انہوں نے کہا کہ مسٹر مودی کے خلاف کھڑاہوانے والا’گالی گینگ‘ خود اپنی متضاد حرکتوں سے عوام کی نظروں میں زوال پذیرہے۔
مرکزی وزیر نے کہا کہ ’ذات کے سیاسی ٹھیکیداروں‘ نے سب سے زیادہ ان ذاتوں کے حقوق کو نقصان پہنچایا جن کے ووٹوں کی سیڑھیاں چڑھ کر وہ اقتدار کی کرسی تک پہنچے ہیں۔ ذات و مذہب کے نام پر جگہ جگہ کھلے ’ووٹوں کی نیلامی مرکز‘ بند ہونے چاہئیں۔ ووٹ کا پیمانہ عوام کے قومی سروکار، ملک کی ترقی اور بہتر حکمرانی ہونی چاہیے۔
انہوں نے کہا کہ مسٹر مودی 130 کروڑ ہندوستانیوں کے لیے بغیر رکے اور تھکے مصروف کار ہیں۔وزیرا عظم کی قیادت میں ملک کی سکیورٹی، عزت اور ہمہ جہت ترقی یقینی ہے۔ مسٹر مودی نے بلا تفریق ذات و مذہب سے اوپر اٹھ کر ’سب کا ساتھ سب کا وکاس‘ کے عزم کو حقیق شکل دی ہے۔
بی جے پی کے قدآور رہنما نے کہا کہ لوک سبھا2019 کا الیکشن ’کنفیوژن سے پُر عظیم اتحاد‘ اور ’کمٹمنٹ سے بھرپور این ڈی اے‘ کے درمیان ہے۔ انہوں نے کہا کہ کچھ’پاکھنڈی سیاسی پارٹیاں اور ان کے پٹے پیادے‘، ’گالی گینگ کے موگیمبو‘ بننے کی ہوڑ میں لگے ہیں۔
مسٹر نقوی نے کہا کہ اپوزیشن مسٹر مودی کے خلاف منفی تشہیر کررہے ہیں۔ کانگریس کے صدر راہل گاندھی نے مسٹر مودی کے لیے نازیبا زبان کا استعمال کرنے کی تمام حدیں پار کردی ہیں۔ مسٹر گاندھی، محترمہ ممتا بنرجی، محترمہ مایاوتی، مسٹر اکھیلیش یادو میں ’گالی گینگ موگیمبو‘بننے کی ہوڑا چل رہی ہے۔ یہ تمام رہنما مسلسل جھوٹا اور من گھڑت بیان دے کر عوام کو گمراہ کرنے کی مایوس کن اور ناکام سازش میں لگے ہوئے ہیں۔
یو این آئی، ایم اے۔