نئی دہلی، 20 اگست (یو این آئی) امریکی وزیر دفاع ڈاکٹر ٹی ایسپر نے جموں وکشمیر میں مرکزی حکومت کی جانب سے کئے گئے اقدامات کو ہندوستان کا داخلی معاملہ قرار دیتے ہوئے کہا ہے کہ ہندوستان اور پاکستان کے مابین کسی بھی معاملے کو دو طرفہ بات چیت کے ذریعہ حل کیا جانا چاہئے۔
وزیر اعظم نریندر مودی کی امریکی صدر ڈونالڈ ٹرمپ کے ساتھ ٹیلیفونک گفتگو کے ایک روز بعد آج وزیر دفاع راج ناتھ سنگھ نےڈاکٹر ایسپر سے ٹیلیفون پر بات کی۔ امریکی وزیر دفاع نے گفتگو میں یہ بات کہی۔
مسٹر سنگھ نے بات چیت کے دوران سرحد پار سے ہونے والی دہشت گردی کا معاملہ اٹھایا اور خطے میں امن و استحکام برقرار رکھنے کے لئے امریکی تعاون کی تعریف کی۔ انہوں نے امریکی وزیر دفاع کو بتایا کہ دفعہ 370 ہندوستان کا اندرونی معاملہ ہے اور اس کا مقصد جموں و کشمیر میں ترقی اور معاشی ترقی کرنا ، جمہوریت کو مستحکم کرنا اوروہاں کے عوام کو خوشحال بنانا ہے۔
ڈاکٹر ایسپر نے ہندوستان کے اس موقف کی تائید کی کہ جموں وکشمیر میں حالیہ اقدامات ہندوستان کا داخلی معاملہ ہے۔ انہوں نے اس امید کا اظہار کیا کہ ہندوستان اور پاکستان کے مابین کسی بھی مسئلے کو دو طرفہ بات چیت ذریعے سے حل کیا جانا چاہئے۔
مسٹر سنگھ نے ڈاکٹر ایسپر کو امریکی وزیر دفاع کا عہدہ سنبھالنے پر مبارکباد دی۔ دونوں وزرائے دفاع نے دفاعی تعاون میں پیشرفت پر خوشی کا اظہار کرتے ہوئے تعلقات کو مزید مستحکم کرنے کے عزم کا اعادہ کیا۔ انہوں نے فوجی تعاون ، دفاعی پالیسی ، تحقیق و ترقی میں تعاون ، دفاعی تجارت ، ٹکنالوجی اور صنعتی تعاون سمیت مختلف امور پر تبادلہ خیال کیا۔ انہوں نے رواں سال ہونے والی تینوں فوجوں کی مشق کے لئے کی جانے والی تیاریوں اور لیموآ اور کومکاسا جیسے معاہدوں پر عمل درآمد کے لئے اٹھائے جانے والے اقدامات پر اطمینان کا اظہار کیا۔
دونوں وزرا نے رواں سال امریکہ میں ہونے والے 2 پلس 2 مذاکرات پر بھی جوش و خروش کا اظہار کیا۔ مسٹر سنگھ نے امریکی کمپنیوں سے میک ان انڈیا کے تحت ہندوستان میں دفاعی شعبے میں سرمایہ کاری کی اپیل کی ۔
یو این آئی۔ ع ا۔