نئی دہلی، 8 اپریل ( یواین آئی ) ملک میں کورونا وائرس ’ كووڈ -19‘ کے کیسز میں بدھ کے روز تیزی سے اضافہ ہو ا اور 773 نئے کیسز سامنے آنے کے ساتھ کورونا متاثرین کی تعداد بڑھ کر 5194 تک پہنچ گئی ۔ کورونا وائرس کی وجہ سے اب تک 149 افراد ہلاک ہو چکے ہیں اور 402افراد کو صحت یا ب ہونے کے بعد اسپتال سے فارغ کر دیا گیا ہے ۔ دریں اثنا مرکزی حکومت نے لاک ڈاؤن کے دوران اشیائے ضروری کی دستیابی یقینی بنانے کے لئے ریاستی حکومتوں اور مرکز کے زیر انتظام علاقوں کو اشیائے ضروری ایکٹ نافذ کرنے کو کہا ہے۔ مرکزی داخلہ سیکریٹری اجے کمار بھلا نے تمام ریاستوں اور مرکزکے زیر انتظام علاقوں کو ارسال کئے گئے مکتوب میں کہا ہے کہ اشیائے ضروری کی دستیابی کو یقینی بنانے کے لئے ہر ممکن اقدامات کئے جانے چاہئے ۔ ان اقدامات کے تحت سٹاك کی حد طے کرنے، نرخوں کا تعین، پیداوار میں اضافہ کرنا اور ڈیلروں اور دیگر ان کے کھاتوں کی جانچ وغیرہ شامل ہے ۔ انہوں نے کہا کہ مزدوروں کی کمی کے سبب مختلف اشیائے ضروری کی پیداوار میں کمی کی اطلاع موصول ہو رہی ہیں ۔ ایسی صورت میں ذخیرہ اندوزی، کالابازاری، منافع خوری وغیرہ کا خدشہ ہے جس سے اشیا ئے ضروری کی قیمتوں میں اضافہ ہوگا ۔ ریاستوں سے کہا گیا ہے کہ وہ مناسب نرخوں والی دکانوں پر اشیائے ضروری کی دستیابی کو یقینی بنانے کے لئے فوری طور پر اقدامات کریں ۔
وزیر اعظم نریندر مودی نے کورونا وبا کی وجہ سے پیدا شدہ صورتحال کو ’ سماجی ایمرجنسی‘ قرار دیتے ہوئے کہا کہ کئی ریاستی حکومتوں، ضلع انتظامیہ اور ماہرین نے لاک ڈاؤن کی مدت بڑھانے کو کہا ہے ۔ مسٹر مودی نے ملک میں کورونا وبا کی وجہ سے پیدا شدہ صورتحال پر سیاسی پارٹیوں کے قانون ساز پارٹیوں کے لیڈروں کے ساتھ بدھ کو یہاں ویڈیو كا نفرنس کے ذریعےایک میٹنگ میں حصہ لیتے ہوئے کہا ’’ ملک میں ’ سماجی ایمرجنسی‘ جیسی صورت حال ہے اور اس کے پیش نظر حکومت کو کئی سخت فیصلے لینے پڑے ہیں ۔ ہمیں اب بھی مکمل طور محتاط رہنے کی ضرورت ہے ۔ انہوں نے کہا کہ مختلف ریاستی حکومتوں، ضلع انتظامیہ اور ماہرین نے لاک ڈاؤن کی مدت بڑھانے کو کہا ہے‘‘ ۔ وزیر زراعت نریندر تومر نے زراعت اور متعلقہ شعبوں کو فراہم کی جانےوالی مراعات پر سختی سے عمل کرنے کو کہا اور کنٹرول پینل قائم کرنے کی ہدایت دی ۔ كورونا وائرس سے سب سے زیادہ متاثر ہ ریاست مہاراشٹر ہے جہاں متاثرین کی تعداد بڑھ کر 1078 ہو گئی ہے اور اب تک 64 افراد ہلاک ہوئے ہیں ۔ اس کے بعد تمل ناڈو میں 690 اور دہلی میں 576 متاثر ہیں ۔برازیل کے صدر جائیر بولسو نارو نے وزیر اعظم نریندر مودی کی تعریف کرتے ہوئے کورونا وائرس وبا سے نمٹنے کی ہندوستان کی کوششوں اور بین الاقوامی تعاون فراہم کرنے کی تعریف کی ۔ مسٹر مودی کو ارسال کئے گئے مکتوب میں مسٹر بولسو نارو نے کورونا کے پھیلاؤ سے نمٹنے میں ہندوستان کی ا مداد اور کوششوں کا موازنہ لکشمن کی زندگی کو بچانے کے لئے ہما لیہ پہاڑوں سے سنجیونی بوٹی لانے والے ہنومان کی کوششوں سے کیا ۔ اقوام متحدہ کے ایشیا پیسیفک اقتصادی اور سماجی کمیشن نے کورونا وبا سے نمٹنے کے لئے ملک کے اقدامات کی تعریف کرتے ہوئے کہا کہ وبا سے لڑنے کے لئے ملک کی پالیسی صحیح سمت میں ہے ۔
جاری ۔ یواین آئی ۔ ک ج