حیدرآباد، 2 جولائی (یو این آئی) تعلیم اور ہنرمندی کی ترقی کے مرکزی وزیر دھرمیندر پردھان نے ہفتہ کے روز کہا کہ ہندوستان چوتھے صنعتی انقلاب میں اہم کردار ادا کرنے جا رہا ہے اور آئی آئی ٹی حیدرآباد عالمی سطح پر برانڈ انڈیا کی تعمیر اور بہتر و خوشحال مستقبل بنانے میں ، خاص طور پر امرت کال کے دوران ، اہم کردار ادا کرے گا۔
وزیرتعلیم نے مزید کہا کہ ہمیں وزیر اعظم کے خودکفیل ہندوستان کے ویژن کو پورا کرنا ہے۔
مرکزی وزیر نے جدید ترین سہولیات کا افتتاح کیا،بی وی آر موہن ریڈی اسکول آف انویشن اینڈ انترپرینیورشپ (بی وی آر ایس سی آئی ای این ٹی) کا سنگ بنیاد رکھا اورآئی آئی ٹی حیدرآباد میں اپنی نوعیت کے پہلے گرینکو اسکول آف سسٹین ایبل سائنس اینڈ ٹیکنالوجی کے لیے ایک تاریخی مفاہمت نامے کا مشاہدہ کیا۔
اس موقع پر خطاب کرتے ہوئے مسٹر پردھان نے کہا کہ ہندوستان محض صرف کرنے والا ملک نہیں ہو سکتا۔ ہمیں خود انحصاری کے حصول نیز عالمی فلاح و بہبود کو آگے بڑھانے کے لیے اپنے ماڈلز کو اختراع اور قائم کرنا ہوگا۔ انہوں نے آئی آئی ٹی حیدرآباد پر زور دیا کہ وہ سماجی ضروریات کو پورا کرنے اورکفایتی عالمی حل فراہم کرنے کے لیے اپنے رول کی از سر نو تشریح کرے۔
وزیر موصوف نے کہا کہ قومی تعلیمی پالیسی (این ای پی )2020 نئے ابھرتے ہوئے عالمی نظام میں ہندوستان کو سرفہرست رکھنے کا روڈ میپ ہے۔ انہوں نے مشورہ دیا کہ آئی آئی ٹی حیدرآباد کو دوردراز کے علاقوں میں تعلیم اور ہنر مندی فراہم کرنے، جوکھم لینے کی حوصلہ افزائی کرنے، روزگار کے متلاشیوں کو روزگار پیدا کرنے والوں میں تبدیل کرنے اور بہترین کارکردگی کے نئے معیار قائم کرنے کی کوشش کرنی چاہیے۔
انہوں نے کہا کہ ہنر مندی زندگی بھر کا عمل ہے اوراین ای پی 2020 ،تعلیمی نظام میں ہنر مندی کی ترقی کو مربوط کرنے پر زور دیتا ہے۔
انہوں نےآئی آئی ٹی حیدرآباد اور صنعت کے ماہرین کو آئی آر 4.0 اور 21 ویں صدی کے روزگار کے بازاروں سے فائدہ اٹھانے کے لیے آئی آئی ٹی حیدرآباد میں عالمی معیار کا ہنر مندی کا مرکز قائم کرنے کا مشورہ دیا۔
پردھان نے اپنے اعتماد کا اظہار کیا کہ آئی آئی ٹی حیدرآباد تحقیق اور اختراع پر زور دیکر ابھرتی ہوئی اور عالمی معیشتوں کے لیے ایک رول ماڈل ثابت ہوگا۔
یواین آئی۔ایف اے