نئی دہلی، 22جنوری (یو این آئی) دہلی پولیس کی اسپیشل سیل نے یوم جمہوریہ کے ٹھیک پہلے آج یہاں انڈین مجاہدین کے ایک مطلوبہ انتہاپسند کو گرفتار کرلیا جس کی شناخت عبدالسبحان قریشی عرف توقیر کے طورپر ہوئی ہے۔
اسپیشل سیل کے ڈپٹی پولیس کمشنر پرمود کشواہا نے یہاں بتایا کہ پولیس نے ملک کے سب سے مطلوبہ انتہاپسند سبحان قریشی کو کافی دنوں کی تلاش کے بعد آج یہاں ایک مختصر تصادم کے بعد غازی پور سے گرفتار کرلیا۔ وہ اترپردیش سے اپنے کسی ساتھی سے ملنے آیا تھا۔ اس کے پاس سے پستول اور کچھ کارتوس ملے ہیں۔ انہوں نے بتایا کہ قریشی کافی دنوں سے جعلی دستاویزات کی بنیاد پر نیپال میں مقیم تھا۔ وہ انڈین مجاہدین کی یونٹ کو دوبارہ قائم کرنے کے لئے ہندوستان آیا تھا۔
پولیس کے مطابق توقیر 2008میں گجرات میں ہوئے سلسلہ وار بم دھماکوں کا اصل سازشی ہے۔ پولیس کو پچھلے دس سال سے اس کی تلاش تھی۔ قریشی پیشہ سے انجینئر ہے او رانڈین مجاہدین کے سارے آن لائن کام وہی کرتا ہے۔ اسے ہتھیار اور گولہ بارود کی کافی معلومات ہے۔
26جولائی 2008 کو گجرات کے احمد آباد میں سلسلہ وار سولہ بس دھماکے ہوئے تھے۔ یہ سارے دھماکے نوے منٹ کے اندر کئے گئے تھے۔ ان دھماکوں میں تقریباً 56لوگ مارے گئے تھے اور دو سو سے زائد زخمی ہوئے تھے۔ حملے کی ذمہ داری انڈین مجاہدین نے ہی لی تھی۔ بعد میں حرکت الجہاد الاسلامی نے بھی اس حملے کی ذمہ داری لی تھی۔ اس معاملے میں گجرات پولیس نے اس وقت نو افراد کو گرفتار کیا تھا۔
یو این آئی ج ا