لکھنؤ ،31 جنوری ( یواین آئی) اترپردیش کے وزیر اعلی یوگی آدتیہ ناتھ نے چھ فروری سے شروع ہو رہے سیکنڈری ایجوکیشن کونسل کے امتحانات کو ہر حال میں نقل سے پاک کرانے کا حکم دیتے ہوئے کہا کہ قانون سے کوئی سمجھوتہ نہیں کیا جائے گا۔
مسٹر یوگی نے کل دیر شام ویڈیو کانفرنسگ کے ذریعے ضلع افسران، پولیس سپرنٹنڈنٹوں اور ضلع اسکول انسپکٹرز سے خطاب کرتے ہوئے کہا کہ ہائی اسکول اور انٹر میڈیٹ میں نقل برداست نہیں کی جائے گی۔ ان کی حکومت اسٹوڈنٹس کے مستقبل سے کھلواڑ کرنے والوں کے خلاف سخت کارروائی کرے گی۔ انہوں نے کہا کہ حکومت نقل سے پاک امتحان چاہتی ہے تو وقت سے پہلے تیاریاں مکمل ہو جانی چاہئے۔
انہوں نے کہا کہ داغدار مراکز کو امتحان سے باہر رکھا جائے۔ تمام مراکز پر سی سی ٹی وی کیمرے لگانے کے ساتھ ساتھ، امتحان کے کمروں میں فرنیچر کا ٹھیک ٹھاک انتظام کیا جائے۔ امتحان مرکز کے انتخاب میں جن لوگوں رول رہتا ہے، وہ اپنی ذمہ داریوں کی ادائیگی مناسب طریقے سے کریں ورنہ حکومت ان کے خلاف سخت کارروائی کرے گی۔ مسٹر یوگی نے کہا کہ امتحان مراکز پر بجلی کی سپلائی یقینی بناتے ہوئے بیک اپ کے لئے جنریٹر کا بھی انتظام کیا جائے۔ امتحان سے پہلے مرکز کے باہر ہی طلبا و طالبات کی چیکنگ کی جائے۔ طالبات کی چیکنگ صرف لیڈی روم انسپکٹرز/ ٹیچروں کی طرف سے ہی کی جائے۔ چیکنگ کے نام پر طلباء و طالبات کو غیر ضروری پرپریشان نہ کیا جائے۔یہ بھی یقینی بنایا جائے کہ امتحان مرکز کے اندر نقل کرنے والے مواد، موبائل وغیرہ نہ پہنچے۔ کالج انتظامیہ کے افراد امتحان مرکز سے 200 میٹر کے فاصلہ پر رہیں۔ وزیر اعلی نے کہا کہ نقل سے پاک امتحان یقینی بنانے کی اجتماعی ذمہ داری ضلع مجسٹریٹوں ، پولیس سپرنٹنڈنٹوں اور ضلع اسکول انسپکٹرز کی ہوگی۔ نقل کی شکایت ملنے پر ذمہ دار افسران کے خلاف سخت کارروائی کی جائے گی۔ مسٹر یوگی نے امتحان کی تیاریوں کے سلسلے میں بلیا، دیوریا، غازی پور، جونپور، اعظم گڑھ، گورکھپور، باغپت، مظفرنگر، بلندشهر، شاہ جہاں پور، گونڈا، میرٹھ، اٹاوہ، مین پوری اور بدایوں کے ضلع مجسٹریٹوں ، پولیس سپرنٹنڈنٹوں اور ضلع اسکول انسپکٹروں سے براہ راست تفصیلات حاصل کیں۔
جاری،یو این آئی،اظ 1149