نئی دہلی،18اپریل(یو این آئی) لوک سبھا الیکشن کے دوسرے مرحلے میں 11ریاستوں اور مرکز کے زیر انتظام ایک ریاست میں 95 لوک سبھا سیٹوں پر جمعرات کو پولنگ پرامن ہوئی اوراوسطاً 66فیصد رائے دہندگان نے اپنے حق رائے دہی کا استعمال کیا۔
ڈپٹی الیکشن کمشنر امیش سنہا نے یہاں صحافیوں کو بتایا کہ تشدد کے کچھ چھوٹے موٹے واقعات کو چھوڑکر دوسرے مرحلے کی پولنگ پرامن رہی۔ سب سے زیادہ مغربی بنگال میں 76.43 فیصد جبکہ سب سے کم تقریباً 45.58 فیصدجموں و کشمیر میں پولنگ ہوئی۔
جموں وکشمیر کے سری نگر میں محض 13.63 فیصد ووٹ ڈالے گئے جبکہ اودھم پور میں 66.67 فیصد رائے دہندگان نے ووٹ ڈالا۔ سری نگر پارلیمانی حلقے میں 2017 میں ہونے والے ضمنی الیکشن میں محض 7.12 فیصدرائے دہندگان نے ہی اپنے حق رائے دہی کا استعمال کیاتھا۔
منی پور میں 76.15 فیصد اور آسام میں 76.22 فیصد رائے دہندگان نے ووٹ کیا۔
پدوچیر ی میں 76.19 فیصد، چھتیس گڑھ میں 71.40 فیصد، کرناٹک میں 67.76 فیصد، تملناڈومیں 72فیصد، اڈیشہ میں 57.97 فیصد، بہار میں 62.38 فیصد، اترپردیش میں 62.06 فیصد اور مہاراشٹر میں 61.22 فیصد رائےدہندگان نے اپنے حق رائے دہی کا استعمال کیا۔اڈیشہ میں لوک سبھا کی پانچ سیٹوں کے ساتھ ہی اسمبلی کی 35 فیصد سیٹوں پربھی ووٹ ڈالے گئے۔
اس مرحلے میں دو ای وی ایم کے خراب ہونے کی خبر ہے جس میں منی پور اور مغربی بنگال کی ایک ایک ای وی ایم شامل ہیں۔ تکنیکی خرابی کی وجہ سے 2766 وی وی پی اے ٹی مشین بدلے گئے۔ اڈیشہ میں ماؤنوازوں کے حملے میں ایک خاتون الیکٹورل افسر کی موت ہوگئی جبکہ انتخابی تشدد میں ایک دیگر کی موت ہوگئی۔ ریاست میں دل کا دورہ پڑنے سے ایک ووٹر کی موت ہوگئی۔
قابل ذکر ہے کہ بشمول دوسرے مرحلے کے اب تک کل 2632 کروڑ روپےنقد، شراب اور زیورات وغیرہ ضبط کیے جاچکے ہیں۔
تمام 95 سیٹوں پرووٹنگ صبح سات بجے شروع ہوئی تھی اور کچھ علاقوں میں سکیورٹی کی وجہ سے دوپہر تین بجے تک اور کچھ میں چار بجے تک ہی ووٹ ڈالنے کا وقت متعین تھا۔ کچھ سیٹوں پر شام پانچ بجے ووٹنگ ختم ہوگئی جبکہ کچھ پر چھ بجے تک ووٹ ڈالے گئے۔
جاری....یو این آئی، ایم اے