نئی دہلی، 16 اگست (یو این آئی) الحکمہ فاؤنڈیشن کے مرکزی دفتر میں جشن آزادی کے موقع پر ایک پروقار تقریب کا انعقاد کیا گیا، جس میں فاؤنڈیشن کے متعلقین اور علاقہ کے معزز حضرات نے کثیر تعداد میں شرکت کی  اس موقع پر ایک لیکچر پروگرام اور یوم آزادی کوئیز کمپٹیشن کا انعقاد کیا گیا پروگرام کی شروعات محمد حسن ندوی کے تلاوت کلام پاک سے کی گئی۔ بعد ازاں قومی ترانا ہوا اور پرچم کشائی کی گئی۔ پروگرام کی شروعات میں فاؤنڈیشن کے جنرل سکرٹری ثاقب یاسین نے فاؤنڈیشن کے بنیادی مقاصد اور مختصر تعارف پیش کرتے ہوئے مہمانوں کا استقبال کیا۔
مہمان اعزازی انتخاب نیازی نے اپنی تقریر میں بتایا کہ آزادی حاصل کرنے میں ملک کے ہر طبقہ اور ہر مذہب کے افراد نے اپنی جان کی قربانیاں دیں اور انگریزوں سے لوہا لیتے ہوئے اپنی شہادتیں پیش کیں، تب جاکر اس آزادی کو حاصل کیا جا سکا۔ موضوع کی مناسبت سے بات کرتے ہوئے موصوف نے کہا کہ یہ آزادی صحیح معنی میں آزادی تب ہی کہلاے گی جب ملک کا ہر باشندہ غربت سے، خوف سے آزاد ہواور اسے اپنی رائے دینے کی پوری آزادی ہو۔ اب اس آزادی کو دائم اور قایم رکھنے کی ذمہ داری ہماری نئی نسل کے نوجوانوں کے کندھوں پرہے۔
اس موقع پر محمد حسن ندوی نے یوم آزادی کی1857 سے لے کر 1947 تک کی مختصر تاریخ پیش کی اوربتایا کہ اس آزادی کو حاصل کر نے میں ہر مذہب کے لوگوں نے اپنی قربانیاں پیش کیں یہاں تک کے مدارس کے طلبہ اور علماء حضرات نے بھی اپنی جانوں کی قربانیاں دیں۔انھوں نے مزید کہا کہ ہم اس ملک سے بہت محبت کرتے ہیں اور ہم اس ملک کی بقاء اور امن و امان کو قائم رکھنے کے لئے ہمیشہ تیار رہتے ہیں۔
مسٹرسید شعیب احمد،لائبریری اینڈ انفارمیشن آفیسر، سی سی آر یو ایم، وزارت آیوش، حکومت ہند نے مہمان خصوصی کی حیثیت سے شرکت کی اور مہمانوں کی بڑی تعداد کو دیکھ کر مسرت کا اظہار کیا۔ آپ نے الحکمہ فاؤنڈیشن کے کاموں کی ستائش کرتے ہوئے کہا کہ فاؤنڈیشن گزشتہ 36برس سے جس استحکام کے ساتھ خدمت خلق کے کاموں جیسے صحت، تعلیم، بازآبادکاری، کمپٹیشن کی تیاری،اخلاقی اقدار، بقائے امن و امان اور عوامی فلاح و بہبود کے جو کام انجام دے رہی ہے وہ قابل تعریف ہیں۔ انہوں نے نوجوانوں کو مخاطب کرتے ہوئے کہا کہ تعلیم کے میدان میں آگے آنا چاہئے خصوصی طور پر مقابلہ جاتی امتحانات جیسے یو پی ایس سی اور ایس ایس سی کے امتحانات میں بڑھ چڑھ کر حصہ لینا چاہئے۔ یاد رکھئے تعلیم ہی ملک اور افراد کی ترقی کی ضامن ہے۔
مرکزی دفتر واقع ذاکر نگر، نئی دہلی میں منعقدہ اس پروگرام کی صدارت محمد شعیب، ریٹایرڈ چیف لائبریرین، ھمدرد یونیورسٹی، نئی دہلی نے کی۔ اپنی تقریر میں انہوں نے تحریک آزادی کے شہیدوں کی قربانیوں کو یاد کرتے ہوئے کہا کہ ہمیں تحریک آزادی کے شہیدوں کی قربانیوں کو ہمیشہ یاد رکھنا چاہئے کیوں کہ انکی قربانیوں کی بدولت آزادی کی یہ دولت نصیب ہوئی جوکہ ان کا بہت بڑا کارنامہ ہے ایسا نہیں ہے کہ ہماری نئی نسل کے پاس بڑے کارنامے انجام دینے کا کوئی موقع نہیں بلکہ آزادی کے بعد بہت سے افراد نے وہ کارنامے انجام دئے جو مادر وطن کی بقاء اور ہمہ جہتی ترقی میں معاون اور مددگار بنے۔
اس موقع پرمنعقد کوئز کمپٹیشن میں تقریبا 30 لوگوں نے شرکت کی جس کے لئے ۰۲ منٹ دئے گئے تھے اس پروگرام میں جنید عالم، اول، جاوید اور مفید دوئم اور پرویز عالم اور مدسر عالم سوئم مقام حاصل کرنے والے شرکاء کے نتائج کا بھی اعلان کر دیا گیا جن کو الحکمہ فاؤنڈیشن کے سالانہ جلسہ میں انعامات سے نوازہ جائے گا۔ اس موقع پر پروگرام میں شرکت کر نے والے کچھ بچوں نے قومی ترانے بھی پیش کئے۔اس کے علاوہ ثنا ء فاطمہ نے تعلیم کے موضوع پر انگریزی میں تقریر کی اور ایکخصوصی انعام کی حقدار بنیں۔
الحکمہ لائبریری اینڈ اسکل ڈولپمنٹ سینٹر، ذاکر نگر، نئی دہلی کے لائبریرین مصطفی عالم نے تمام مہمانوں کے ساتھ ساتھ اپنی ٹیم کے سبھی ساتھیوں بالخصوص سعد عالم، جاوید، جنید، پرویز، محمد اظہر اور سعود عالم کا بھی شکریہ ادا کیا۔
یو این آئی۔ ایف اے۔ م الف