بارہ جنوری برسی کےموقع پر
ممبئی، 12جنوری (یو این آئی) بالی وڈ میں امریش پوری نے ولن کے کردار کو نئی جہت عطا کی۔
اپنی گرج دار آواز، مضبوط شخصیت اور منفی کرداروں کی بدولت انہوں نے دنیا بھر شہرت حاصل کی۔
بحیثیت ویلن انہوں نے جومقام حاصل کیا‘ وہ ان کی بہترین اداکاری اور سخت محنت کا نتیجہ تھا۔
پردۂ سیمیں کے وہ واحد ویلن تھے جن کے انتقال پر روزناموں نے صفحۂ اول پر خبر چھاپی اور اداریئے لکھے ۔
اسٹیج سے اپنی اداکاری کا سفر شروع کرنے والے امریش پوری نے اپنی ایسی امیج بنائی کہ فلم میں ان کی موجودگی ناظرین کو سنیماہال تک کھینچ لے جاتی تھی۔
اپنی بہترین اداکاری کے سبب وہ ایک عرصہ تک بالی ووڈ میں ولن کے بے تاج بادشاہ بنے رہے۔

امریش پوری نے اپنے کریرکا آغاز اسٹیج سے کیا۔
کئی برسوں تک وہ اس سے وابستہ رہے۔
اس کے بعد انہیں فلموں میں کام کرنے کا موقع ملا۔
آہستہ آہستہ انہوں نے اپنی فن کارانہ صلاحیتوں سے لوگوں کو اپنی طرف متوجہ کیا۔
ابتدا میں مختصرسا رول اداکرنے والے اس شخص کے بارے میں کسی نے سوچا بھی نہیں ہوگا کہ وہ ایک دن شہرت کی بلندیوں کو چھولے گا اور ایک منجھے ہوئے اداکار کی شکل میں اپنی شناخت کرائے گا۔

امریش پوری 22 جون 1932 کو انبالہ میں پیدا ہوئے۔
انہوں نے اپنے فلمی کیریئر کا آغاز نسبتاً دیر سے کیا، مگر بہت کم عرصے میں وہ بالی وُڈ کے سب سے طاقتور ولن کے طور پر پہچانے جانے لگے۔
وہ کیریکٹر آرٹسٹ چمن پوری اور ویلن مدن پوری کے سب سے چھوٹے بھائی تھے۔
کالج کی تعلیم مکمل کرنے کے بعد انہوں نے فلموں کا رخ کیا۔
لیکن ہیرو کے طور پر مسترد کردیئے جانے کے بعد وہ فطری طور پر بہت مایوس ہوئے۔
بادل نخواستہ انہوں نے اپنی معاشی ضرورتوں کی تکمیل کے لیے وزارت محنت میں ملازمت اختیار کرلی۔
لیکن ان کا دل اداکاری کی جانب ہی مائل رہا۔
آخر کار انہوں نے ایک دن ملازمت چھوڑدی اور اسٹیج اداکاری کی طرف متوجہ ہوگئے۔
اسی دوران ان کی ملاقات ستیہ دیو دوبے سے ہوئی۔
اس ملاقات نے امریش پوری کی دنیا ہی بدل دی۔
ستیہ دیو دوبے بہترین ہدایت کار تھے۔
انہوں نے امریش پوری کی اداکاری کو دیکھ کر ان کے اندرچھپی ہوئی صلاحیتوں کو بھانپ لیا۔
ڈرامہ ’’اندھا یگ‘‘ میں امریش پوری کی اداکاری سے متاثر ہوکر انہوں نے تقریباً 50 ڈراموں میں انہیں کام دیا اور ان کے اندر چھپی ہوئی فن کارانہ صلاحیتوں کواجاگر کیا۔
بقول ستیہ دیو دوبے ’’امریش جی کے بارے میں کیا کہوں۔
بس اتنا کہہ سکتا ہوں کہ وہ ایک بہترین اداکار تھے‘‘۔

ڈراموں میں ان کی بہترین اداکاری کو دیکھ کر پہلی مرتبہ سکھ دیو نے فلم ’ریشما اور شیرا‘ میں ایک رول کے لیے سائن کیا۔
لیکن کنڑ فلم ’’کاڑو‘‘ سے امریش پوری کو فلمی دنیا میں پہچان ملی اور یہ فلم امریش پوری کے لیے سنگ میل ثابت ہوئی۔
مشہور آرٹ فلم ساز شیام بینیگل نے جب یہ فلم دیکھی تو وہ ان کی اداکاری کی تعریف کئے بغیر نہیں رہ سکے اور انہیں اپنی فلم’’ منتھن‘‘ اور’’ نشانت‘‘ میں کاسٹ کیا۔
پھر تو ان کی کامیابی کا سفر شروع ہوگیا۔
شیام بینیگل ان کی طلسماتی اداکاری سے بے حدمتاثر ہوئے اور انہوں نے اپنی ہر فلم میں امریش پوری کے لیے ایک رول مخصوص کیا۔
وجیتا‘ کلیگ‘ سورج کا ساتواں گھوڑا میں امریش پوری آرٹ فلموں کے ایک مضبوط اور کامیاب اداکار کے طورپر ابھرے۔
اب امریش پوری ہدایت کار اورناظرین دونوں کی توجہ کا مرکز بن گئے۔
جس فلم میں بھی انہیں اداکاری کا موقع ملا‘ اس میں انہوں نے اپنی ان مٹ چھاپ چھوڑی۔
ان کی مقبولیت کا یہ عالم تھا کہ ناظرین ہیرو کے مقابلے انہیں زیادہ اہمیت دینے لگے۔
انہیں تقریباً ہر فلم میں امریش پوری کودیکھنے کی عادت سی پڑگئی تھی۔

یہ بات قابل ذکر ہے کہ پران کے بعد فلم انڈسٹری ویلن کے تعلق سے ایک غیریقینی صورت حال سے دوچار تھی۔
ایک خلا سامحسوس کیا جارہا تھا ۔
اس وقت کوئی ویلن ایسا نہیں آرہا تھا جو پران کی کمی کوپر کرے۔
امریش پوری کی سب سے بڑی خوبی یہ تھی کہ انہوں نے نہ صرف اس کمی کو پورا کیا بلکہ جدید کھلنائکوں کے لیے باعث تقلید بھی بنے۔
اپنے زمانے کے مشہور ویلن کے این سنگھ امریش پوری کے آئیڈیل تھے۔
انہی سے متاثر ہوکر انہوں نے اپنے آپ کو ویلن کے روپ میں ڈھالا اور وہ اس میں اس قدر کامیاب ہوئے کہ فلم انڈسٹری میں ویلن کو اہم مقام اور رتبہ دیا جانے لگا۔

فیروز خان کی فلم ’قربانی‘ سے ان کا فلمی سفر آرٹ سے کمرشیل فلموں کی جانب بڑھا اور ان کی شہرت اس وقت بلندیوں کو چھونے لگی ۔
فلم مسٹر انڈیا کا کردار موگیمبو آج بھی بالی وڈ کے سب سے مشہور ولن کرداروں میں شمار ہوتا ہے۔
’’موگیمبو خوش ہوا’’………….یہ الفاظ آج بھی لوگوں کے ذہن میں گونج رہے ہیں۔
انہوں نے موگیمبو کے مشکل ترین کردار کو جس خوبی سے نبھایا ‘وہ ان کی بہترین اداکاری‘بلند قامت‘بھاری بھرکم شخصیت ‘پاٹ دار آواز کی دین تھا۔
فلم کے ہدایت کار شیکھر کپور کا کہنا ہے کہ لوگ مجھے مسٹر انڈیا کی بدولت جانتے ہیں اور امریش پور ی کو مسٹرانڈیا کے موگیمبو سے۔
امریش پوری کے بغیر’’ مسٹر انڈیا‘‘کا تصور بھی نہیں کیا جاسکتا۔
وہ اس رول میں اتنے رچ بس گئے کہ آج بھی لوگوں کو’’ مسٹر انڈیا‘‘ کا موگیمبو یاد آتا ہے۔
خود امریش پوری نے ’’مسٹر انڈیا‘‘کے بارے میں کہا تھا کہ یہ فلم میرے لیے خاص اہمیت رکھتی ہے۔
اس فلم نے میرے لیے کمرشیل فلموں کے دروازے کھول دیئے۔
حالاں کہ میں نے اس سے قبل بھی ایک سے بڑھ کر ایک کردار نبھائے لیکن موگیمبو حقیقی معنوں میں سب پر بھاری رہا۔
موگیمبو کے کردار پر میں نے کافی محنت کی تھی۔
جب بچے بوڑھوں کی زبان موگیمبو خوش ہوا‘‘ چڑھ گیا تو مجھے بے پناہ مسرت ہوئی۔

امریش پوری کی خاص بات یہ تھی کہ وہ کسی بھی رول کو ادا کرتے وقت اس میں پوری طرح رچ بس جاتے تھے۔
کئی دفعہ ان کے لیے کردار خصوصی طور پر تیار کئے جاتے تھے اور اس میں اپنی پوری فن کارانہ صلاحیتوں کو انڈیل دیتے تھے۔
کسی بھی کردار کو ادا کرنے سے قبل وہ بڑے انہماک کے ساتھ اسے سمجھتے تھے اور نہ صرف پوری ایمان داری سے اس پر محنت کرتے تھے بلکہ اس رول میں رچ بس جاتے تھے۔
اگر وہ خطرناک ڈان کا کردار نبھاتے تھے تولگتا تھاکہ اس سے خطرناک ڈان ہوہی نہیں سکتااور اگر وہ ایک ایمان دارپولیس افسر بنے توایسا محسوس ہوتا تھا کہ ان سے زیادہ ایمان دار پولیس افسر کوئی ہوہی نہیں سکتا۔
ان کو کسی بھی رول کو ادا کرنے کا ملکہ حاصل تھا۔
سبھاش گھئی نے اپنی فلم’’ ودھاتا‘‘ کے لیے جب امریش پوری کوویلن کے مرکزی کردار کے لیے سائن کیا تو کئی لوگوں کے ذہنوں میں یہ سوال اٹھا کہ کیا وہ شہنشاہ جذبات دلیپ کمار جیسے مشہور زمانہ چوٹی کے اداکار کے مقابلہ میں ٹک پائیں گے؟کیا وہ دلیپ کمار کے مقابلے میں اپنی اداکاری کا بھرپور مظاہرہ کرپائیں گے۔
لیکن امریش پوری نے ان خدشات کو یکسر مسترد کرتے ہوئے فلم ’’ودھاتا‘‘ میں نہ صرف کامیاب اداکاری کی بلکہ دلیپ کمار کے مقابلے پورے دم خم کے ساتھ کھڑے نظر آئے ۔
اسی طرح فلم’’ شکتی‘‘ میں بھی دو کامیاب ہیرو۔
دلیپ کمار اور امیتابھ بچن کے مقابلے بہترین اداکاری کا مظاہر ہ کیا۔
یہ امریش پوری کے لیے بہت بڑی کامیابی تھی۔
ناظرین نے بھی امریش پوری کی اداکاری کی خوب تعریف کی اور امریش پوری نے اپنی اداکاری کا لوہا منوایا۔

امریش پوری اپنی بہترین اداکاری اور ڈائیلاگ کی عمدہ ادائیگی کے سبب ویلن کے طور پر شہرت کے سنگھاسن پر براجمان ہوگئے ۔
یہاں تک کہ وہ ایک فلم کے لیے ڈیڑھ کروڑ روپے تک معاوضہ لیتے تھے۔
انہوں نے ایمان دھرم‘آکروش‘ غدر‘ دامنی‘ دیو‘ جانی دشمن‘ دوستانہ‘ کلیگ‘ شکتی‘ دھرم ستیہ ‘ گاندھی‘ مسٹر انڈیا‘ شہنشاہ‘ وراثت‘ تری دیو‘ عجوبہ‘ سوداگر‘ مجھے کچھ کہنا ہے‘ دل والے دلہنیا لے جائیں گے ‘ چائنا گیٹ‘ گردش‘ پردیس‘ چاچی 420‘ لال بادشاہ‘ کوئلہ ‘ رام لکھن‘ گھائل‘ آج کا ارجن‘ میری جنگ‘ کرن ارجن‘ جھوٹ بولے کوا کاٹے‘ تال‘ ہلچل سمیت تقریباً دو سوفلموں میں اپنی اداکاری کے جوہر دکھائے۔
امریش پوری کو تین مرتبہ فلم فیئر ایوارڈ (بہترین معاون اداکار) سے نوازا گیا۔
امریش پوری نے تقریباً 400 سے زائد ہندی، تمل، تیلگو، کنڑ، ملیالم اور انگریزی فلموں میں کام کیا۔

ایک موقع پر گلشن گروور نے کہا کہ ’’فلم انڈسٹری میں ویلن کواہم مقام دلانے میں امریش پوری کا بہت بڑا ہاتھ تھا۔
پہلے ویلن سیٹ پر ہی پنکھے کی ہوا کھاتے تھے۔
لیکن امریش پوری نے ان کے لیے وینٹی وین کی شروعات کی۔
آج انہیں کی بدولت فلمی دنیا میں ہم وینٹی وین میں آرام کرپارہے ہیں‘‘۔

ان میں فن کارانہ صلاحیتیں کوٹ کوٹ کربھری ہوئی تھیں۔
جو رول بھی انہیں ملا‘اپنی لاجواب اور بہترین اداکاری سے اسے امر بنادیا۔
پردے پر برائیوں کی ساری حدود توڑنے والا نیز غریبوں اور مظلوموں پرظلم کے پہاڑ توڑنے والا یہ شخص اپنی ذاتی زندگی میں انتہائی نیک انسان تھا۔
اکثروہ سماجی سرگرمیوں میں متحرک رہتے تھے۔
اس کا اندازہ اس بات سے لگایا جاسکتا ہے کہ فلم انڈسٹری سے وابستہ لوگوں کی شادی کی خوشی ہو یا موت کا غم‘ امریش پوری شریک ہونے والوں میں پہلے شخص ہوتے تھے۔
یہ الگ بات ہے کہ زیادہ ترفلموں میں انہوں نے منفی رول ادا کئے۔
جہاں کچھ فلموں میں انہوں نے حساس اور جذباتی اداکاری کی‘ وہیں انہوں نے’’ چاچی 420‘‘ اور’’ مسکراہٹ‘‘ میں مزاحیہ اداکاری کرکے ناظرین سے داد و تحسین وصول کی۔
ان کی آخری ریلیز فلم کسنا تھی۔

ان کا انتقال 12 جنوری 2005 کو ممبئی میں ہوا۔
یقیناً امریش پوری کا اس دارفانی سے کوچ کرجانافلم انڈسٹری کے لیے ناقابل تلافی نقصان ہے۔
آج وہ ہمارے درمیان نہیں ہیں‘ لیکن امید کی جاسکتی ہے کہ انہوں نے اپنی اداکاری کے ذریعے جو ان مٹ نقوش چھوڑے ہیں ‘نئے اداکار ان سے ضرور مستفید ہوں گے اور ان کی ایک ایک حرکات و سکنات جدید اداکاروں کے لیے مشعل راہ ہوگی۔
امریش پوری نہ صرف ایک عظیم اداکار تھے بلکہ ان کی اداکاری نے ہندوستانی سینما میں ولن کے کردار کو ایک نئی شناخت دی، جس کی گونج آج بھی سنائی دیتی ہے۔

یو این آئی۔
این یو۔