OthersPosted at: Feb 10 2026 4:58PM بھاگوت آج نموکار تیرتھ میں جین مت کے 'کمبھ میلے' میں شرکت کریں گے
ناسک، 10 فروری (یو این آئی) راشٹریہ سویم سیوک سنگھ (آر ایس ایس) کے سرسنگھ چالک موہن بھاگوت منگل کو مہاراشٹر کے چاندواڑ تعلقہ کے مالسانے گاؤں میں نموکار تیرتھ کے مقام پر بین الاقوامی پنچ کلیانک اور مہامستکابھیشک تہوار میں شرکت کریں گے اس موقع پر مسٹربھاگوت پنچپرمیشتھی منڈپم کا افتتاح کریں گے اور لوگوں سے خطاب کریں گے۔ غور طلب ہے کہ جین تیرتھ استھل، نموکار تیرتھ، ناسک-دھولے شاہراہ پر ملسانے گاؤں کے قریب 40 ایکڑ زمین پر بنایا گیا ہے۔ نموکار تیرتھ استھل پر 6 فروری سے شروع ہونے والا یہ میلہ 25 فروری تک جاری رہے گا۔ اس مقام پر تین ہزار مورتیوں کی پران پرتیشٹھا کی جا رہی ہے اور اندازہ ہے کہ 300 سے 400 جین سادھو اور 10 سے 12 لاکھ عقیدت مند میلے میں شرکت کریں گے۔
اس تقریب کو جین برادری کا کمبھ میلہ کہا جا رہا ہے۔ میلے میں کئی اہم رہنما شرکت کر رہے ہیں۔ وزیر اعلی دیویندر فڑنویس کی موجودگی میں اتوار کو یہاں ایک تقریب کا انعقاد کیا گیا۔ اس موقع پر آبی وسائل کے وزیر گریش مہاجن، وزیر تعلیم دادا بھوسے اور ایم پی پرفل پٹیل بھی موجود تھے۔ اس موقع پر خطاب کرتے ہوئے مسٹر فڑنویس نے کہا کہ پنچ کلیانک تہوار صرف ایک مذہبی رسم نہیں ہے، بلکہ ملک کی قدیم، روحانی روایات، امن، ہمدردی اور روحانی عمل کی علامت ہے۔ انہوں نے مزید کہا کہ تیرتھنکروں کی طرف سے دیا گیا عدم تشدد، امن اور ہمدردی کا پیغام نہ صرف جین برادری بلکہ پوری انسانیت کے لیے رہنما ہے۔
منتظمین نے صدرجمہوریہ دروپدی مرمو، وزیر اعظم نریندر مودی، مرکزی وزیر داخلہ امیت شاہ اور مرکزی وزیر نتن گڈکری کو بھی میلے میں مدعو کیا ہے۔
یواین آئی۔الف الف