جے پور، 15 جولائی (یو این آئی) لوک سبھا اسپیکر اوم برلا نے بدھ کو کہا کہ مقننہ صرف قانون بنانے والے ادارے نہیں ہیں، بلکہ وہ جمہوریت کی ایسی 'درسگاہیں' ہیں جہاں عوامی نمائندے مذاکرات، ڈسپلن، اتفاق رائے اور خدمت کی اقدار کا درس حاصل کرتے ہیں مسٹر برلا نے راجستھان اسمبلی کے 75 ویں یوم تاسیس کے موقع پر منعقدہ امرت مہوتسو کے تحت 'ودھان گورَو یاترا: سابق اور موجودہ ارکان کی کانفرنس' کی افتتاحی تقریب سے خطاب کرتے ہوئے کہا کہ اسی ایوان میں حاصل کردہ جمہوری اقدار، پارلیمانی روایات اور قانون ساز طرز عمل نے انہیں طالب علم لیڈر سے ایم ایل اے، ایم پی اور آخر کار لوک سبھا اسپیکر بننے کے سفر میں رہنمائی فراہم کی۔ انہوں نے کہا کہ اسمبلی میں انہوں نے پارلیمانی جمہوریت کی حقیقی شکل کو سمجھا کہ سننے کی ثقافت اور صحت مند بحث جمہوریت کو خوشحال بناتی ہے اور تاریخ رقم کرتی ہے، جبکہ ذاتی اختلافات جمہوریت کو کمزور کرتے ہیں۔ انہوں نے کہا کہ ایوان میں ہوئی ہر بحث اور ہر لفظ جمہوری تاریخ کا مستقل حصہ بن جاتا ہے۔
راجستھان اسمبلی کے جمہوری سفر کے 75 سال مکمل ہونے پر نیک خواہشات پیش کرتے ہوئے مسٹر برلا نے کہا کہ ریاست کا جمہوری شعور صرف اسمبلی کی تاریخ تک محدود نہیں ہے، بلکہ ہندوستان کے قدیم مذاکرات، غور و خوض اور شراکتی حکمرانی کے نظام کی روایات میں گہرائی سے پنہاں ہے۔ انہوں نے کہا کہ سبھا اور سمیتی کی روایت، مقامی سیلف گورنمنٹ اور عوامی شرکت راجستھان کی سماجی اور سیاسی زندگی کا اٹوٹ حصہ رہی ہے، جسے پنچایتوں اور نمائندہ اداروں نے مسلسل مضبوط کیا ہے۔ انہوں نے کہا کہ عوامی نمائندوں کو عوام کے تئیں اپنی ذمہ داریوں کا مکمل احساس ہونا چاہیے، کیونکہ جمہوریت صرف آئینی التزامات سے نہیں، بلکہ عوامی اعتماد، مذاکرات، وقار اور خدمت کے جذبے سے مضبوط ہوتی ہے۔
جاری۔ یو این آئی۔ این یو۔