نئی دہلی، 19 مئی (یو این آئی) کانگریس نے آپریشن سندور سے متعلق معلومات پر وزیر خارجہ ایس جے شنکر کے بیان کو 'سفارتی ناکامی' قرار دیتے ہوئے کہا ہے کہ ایسا کرکے بھارتیہ جنتا پارٹی (بی جے پی) حکومت نے دوسری بار دہشت گرد حافظ سعید کو بچایا ہے، اس لیے وزیر اعظم نریندر مودی کو اس پر جواب دینا چاہیے۔
مسٹر کھیڑا نے پیر کو یہاں پارٹی ہیڈکوارٹر میں ایک پریس کانفرنس میں کہا کہ جنگیں صرف سرحدوں پر نہیں لڑی جاتیں بلکہ سیاسی حکمت عملی سے بھی لڑی جاتی ہیں۔ جہاں فوج سرحد پر اپنی ڈیوٹی بڑی بہادری سے کرتی ہے، وہیں دارالحکومت میں بیٹھے جنگی حکمت عملی بنانے والے بھی بہت اہم کردار ادا کرتے ہیں۔ ان تمام لوگوں کا کردار اہم ہے، اور یہ حکمت عملی یا تو فوج کی طاقت کو بڑھا سکتی ہے یا نقصان پہنچا سکتی ہے۔
انہوں نے کہاکہ "مسٹر جے شنکر نے خود میڈیا کو بتایا ہے کہ پاکستان کو حملے سے پہلے اطلاع دی گئی تھی۔ اب اس اطلاع کا کیا مطلب ہے؟ کیا وزیر خارجہ اس بات پر بھروسہ کرتے ہیں کہ دہشت گرد پاکستان کے کہنے پر خاموش بیٹھیں گے؟ سوال یہ ہے کہ وزیر خارجہ نے پہلے پاکستان کو اطلاع کیوں دی؟"
انہوں نے کہا کہ "پہلگام حملے کا انصاف نہیں ملے گا کیونکہ ملک کی قیادت چین اور امریکہ سے خوفزدہ ہے، اس جنگ میں چین اور امریکہ کے کردار کو سب جانتے ہیں، امریکہ خود اس جنگ کو روکنے میں اپنے کردار پر فخر کر رہا ہے، لیکن وزیر اعظم نریندر مودی اور وزیر خارجہ ایس جے شنکر خاموش ہیں۔
کانگریس لیڈر نے اسے حکومت کی ناکامی قرار دیتے ہوئے کہا کہ دراصل یہ سفارت کاری نہیں بلکہ اسے مخبری کہا جاتا ہے، وزیر خارجہ کی بات سب نے سنی- پھر بھی اس پر پردہ ڈالا جا رہا ہے، کیا مخبری کی وجہ سے مسعود اظہر بچ گئے اور حافظ سعید زندہ بچ گئے؟
انہوں نے کہا کہ ملک کو یہ جاننے کا حق ہے کہ پاکستان کو حملے کی اطلاع دے کر مسعود اظہر کو دوبارہ کیوں بچایا گیا۔ اس سے قبل مسعود اظہر کو قندھار ہائی جیکنگ کے دوران رہا کیا گیا تھا۔ وزیر خارجہ کا یہ بیان حساس ہے، کیونکہ اس بیان سے لگتا ہے کہ دہشت گرد اپنے ٹھکانوں سے بھاگ گئے ہوں گے۔ مسٹر مودی اور مسٹر جے شنکر کو جواب دینا پڑے گا کہ ایسا کیوں کیا گیا۔
کانگریس لیڈر نے کہاکہ "عوام جاننا چاہتی ہے کہ فوجی کارروائی کے دوران ملک کے کتنے طیارے گرے، ملک کو کیا نقصان پہنچا؟ اس کارروائی میں کتنے دہشت گرد فرار ہوئے؟ ہمارے فوجیوں نے پاکستان کو گھٹنے ٹیکنے پر مجبور کیا، لیکن اچانک ڈونلڈ ٹرمپ نے آکر جنگ بندی کا حکم دیا۔ ہم سندور کے ساتھ سمجھوتہ نہیں مانتے۔ ملک کے ساتھ غداری قابل قبول نہیں ہے،۔
یواین آئی۔ظ ا