نئی دہلی، 9 اکتوبر (یو این آئی) کانگریس پارٹی نے فلسطین کی خودمختاری پر وزیر اعظم نریندر مودی کی خاموشی اور اسرائیلی وزیر اعظم نیتن یاہو کی تعریف کرنے پر حیرت کا اظہار کیا ہے پارٹی نے کہا کہ ہندوستان نے 37 سال پہلے فلسطین کو تسلیم کیا تھا، اور آج 150 ممالک اسے تسلیم کر رہے ہیں مسٹر مودی اسرائیلی وزیر اعظم کی تعریف کر رہے ہیں جنہوں نے فلسطینیوں کی نسل کشی کا ارتکاب کیا ہے۔ غزہ میں کئی مہینوں سے نسل کشی جاری ہے، لیکن حیرت کی بات یہ ہے کہ مسٹر نریندر مودی اس معاملے پر خاموش ہیں۔
کانگریس کے میڈيا سیل کے انچارج جے رام رمیش نے جمعرات کے روز یہاں ایک بیان میں کہا کہ وزیر اعظم نے غزہ میں نئی پیش رفت کا خیر مقدم کیا اور امریکی صدر ڈونالڈ ٹرمپ کی تعریف کی۔ مسٹر مودی کا ایسا کرنے کے لیے بے تاب ہونا کوئی حیران کن بات نہیں ہے، لیکن گزشتہ بیس ماہ سے غزہ میں بڑے پیمانے پر نسل کشی کرنے والے اسرائیلی وزیر اعظم نیتن یاہو کی مسلسل تعریف واقعی چونکا دینے والی اور اخلاقی طور پر انتہائی قابل مؤاخذہ ہے۔
انہوں نے کہا، "وزیر اعظم مودی نے آزاد اور خودمختار فلسطینی ریاست کے مستقبل پر بھی مکمل خاموشی اختیار کر رکھی ہے، جسے ہندوستان نے نومبر 1988 میں تسلیم کیا تھا اور جسے آج 150 سے زیادہ ممالک تسلیم کرتے ہیں۔ اسی طرح، وزیر اعظم نے مقبوضہ مغربی کنارے میں اسرائیلی بستیوں کی مسلسل توسیع پر بھی کچھ نہیں کہا ہے"۔
یو این آئی۔ م ش۔