نئی دہلی، 14 دسمبر (یواین آئی) کانگریس کے صدر ملکارجن کھرگے نے کہا ہے کہ بی جے پی کی حکومت ووٹ چوری کے ذریعے قائم کی گئی تھی اور جھوٹ پر قائم اس حکومت کی حقیقت اب بے نقاب ہوگئی ہے، جس سے قوم کو گمراہ کرنے والی حکومت کو بے دخل کرنا ضروری ہوگیا ہے۔
اتوار کو یہاں رام لیلا میدان میں پارٹی کی "ووٹ چور گدی چھوڑ" ریلی سے خطاب کرتے ہوئے کھرگے نے کہا کہ بی جے پی اور آر ایس ایس کا نظریہ جھوٹ پر مبنی ہے۔ کانگریس اس جھوٹ کے خلاف کھڑی ہے اور سچائی کے لیے لڑ رہی ہے۔ کانگریس کے پاس سچائی کا نظریہ ہے، اور اس کے لیڈر راہل گاندھی سچ کے اس نظریہ کے لیے لڑ رہے ہیں۔ کانگریس کارکنوں کو راہل گاندھی کی سچائی کی لڑائی کو مضبوطی سے آگے بڑھانا چاہیے اور ملک میں ووٹ چوری کے ان کے کھیل کو ختم کرنا چاہیے۔ اس کے لیے سب سے پہلے بی جے پی کو اقتدار سے بے دخل کرنا ضروری ہے۔
انہوں نے کہا کہ آر ایس ایس کا نظریہ نہیں بلکہ صرف کانگریس کا نظریہ ملک کو آگے لے جا سکتا ہے جھوٹ میں طاقت نہیں ہوتی اس لیے یہ حکومت خوفزدہ ہے اور پارلیمنٹ میں اپوزیشن کے سوالوں کا جواب دینے سے انکاری ہے۔ حکومت سے سوال پوچھے جا رہے ہیں لیکن پارلیمنٹ میں ایک کا بھی جواب نہیں دیا گیا۔ پارلیمنٹ میں ایس آئی آر پر بحث کرنے کے بجائے وہ وندے ماترم کا استعمال کرکے ملک کو گمراہ کررہے ہیں۔ انہوں نے کہا کہ بی جے پی لیڈروں کا خود اعتمادی متزلزل ہو گیا ہے کیونکہ وہ سچ کے سامنے آنے سے بہت ڈرتے ہیں۔ انہیں اب اندازہ ہو گیا ہے کہ ان کی ووٹ چوری کرنے کی سازش بے نقاب ہو چکی ہے۔
مسٹر کھرگے نے کہا کہ بی جے پی آر ایس ایس کا نظریہ خطرناک ہے۔ ان کا نظریہ غریبوں کے مفاد میں نہیں ہے، اس لیے اس نظریے کو ختم کرنا ضروری ہے، اور ایسا کرنے کے لیے سب سے پہلے بی جے پی کو اقتدار سے بے دخل کرنا ہوگا۔ انہوں نے کہا کہ آئین ہر شہری کو ووٹ کا حق دیتا ہے لیکن بی جے پی حکومت غریبوں سے یہ حق چھیننے کی کوشش کر رہی ہے اور ملک میں غربت کو بڑھاوا دے کر اپنے چند امیر دوستوں کو ارب پتی بنا رہی ہے۔
انہوں نے کہا کہ کانگریس کی لڑائی غریبوں کے مفاد میں ہے، ووٹ چوری کے خلاف، جھوٹ کے خلاف، اور بی جے پی-آر ایس ایس کے خلاف ہے، جو آئین کی حفاظت اور اسے تباہ کرنے پر تلی ہوئی ہے۔ اس حکومت نے آئین اور آئینی اداروں کو تباہ کر دیا ہے اور آج لڑائی آئین اور اپنے شہریوں کے حقوق کے تحفظ کی ہے۔ کانگریس اسی مقصد کے لیے لڑ رہی ہے اور اس جنگ کو جیتنے اور غریب مخالف بی جے پی کو اقتدار سے بے دخل کرنے کے لیے تمام شہریوں کے تعاون کی کوشش کر رہی ہے۔
کانگریس صدر نے بی جے پی پر ووٹ چوری کا الزام لگاتے ہوئے کہا کہ وہ چوری کے ذریعے حکومتیں بناتی ہے اور اب اس نے کانگریس سے وندے ماترم چرا لیا ہے۔ وندے ماترم کے نام پر ملک کے عوام کو گمراہ کیا جا رہا ہے۔
یواین آئی۔ ظ ا