نئی دہلی، 10 نومبر (یو این آئی) کانگریس کے سابق صدر اور لوک سبھا میں اپوزیشن لیڈر راہل گاندھی نے ملک میں فضائی آلودگی کی بگڑتی ہوئی صورتحال پر مرکزی حکومت کو کٹہرے میں کھڑا کرتے ہوئے کہا کہ صاف ہوا ہر شہری کا بنیادی حق ہے لیکن جب شہری صاف ہوا کا حق مانگتے ہیں تو حکومت ان کے ساتھ مجرموں کی طرح پیش آتی ہے مسٹر گاندھی نے پیر کو ایک سوشل میڈیا پوسٹ میں کہا کہ آئین نے ہر شہری کو پرامن احتجاج کا حق دیا ہے اور حکومت کو اس حق کے تحفظ کو یقینی بنانا چاہئے۔
انہوں نے لکھا، "صاف ہوا کا حق ایک بنیادی انسانی حق ہے۔ پرامن احتجاج کا حق ہمارے آئین کی طرف سے دی گئی ضمانت کا حصہ ہے۔ جب شہری صاف ہوا میں جینے کے اپنے بنیادی مطالبے کے لیے احتجاج کر رہے ہیں تو ان کے ساتھ مجرموں جیسا سلوک کیوں کیا جا رہا ہے"۔
مسٹر گاندھی نے الزام لگایا کہ فضائی آلودگی کروڑوں ہندوستانیوں کو متاثر کر رہی ہے، بچوں اور ملک کے مستقبل کو نقصان پہنچا رہی ہے، لیکن 'ووٹ چوری سے اقتدار میں آنے والی حکومت' اس سنگین بحران سے نمٹنے کے بجائےخاموش ہے اور اس کے خلاف احتجاج کرنے والے شہریوں کے خلاف کارروائی کر رہی ہے۔
انہوں نے حکومت پر زور دیا کہ وہ فضائی آلودگی کے بحران سے نمٹنے کے لیے ٹھوس اقدامات کرے اور عوامی آوازوں کو دبانے کے بجائے لوگوں کی زندگیوں اور صحت کے تحفظ کے لیے فوری مثبت اقدام کرے۔
یواین آئی۔الف الف