نئی دہلی، 15 جون (یو این آئی) مرکزی وزارت آیوش، انڈین کونسل آف میڈیکل ریسرچ (آئی سی ایم آر) کے ساتھ مل کر یہ پتا لگانے کی کوشش کر رہی ہے کہ کون سا یوگا کس بیماری کے علاج میں معاون ثابت ہو سکتا ہے مرکزی وزیر آیوش پرتاپ راؤ جادھو نے پیر کو یہاں نامہ نگاروں کو بتایا کہ ان کی وزارت آئی سی ایم آر اور دیگر طبی تحقیقی اداروں کے ساتھ مل کر یہ پتا لگانے کی کوشش کر رہی ہے کہ کس قسم کی بیماری میں کون سا یوگا کیا جائے، جس سے مریض جلد صحت یاب ہو سکے۔ 21 جون کو عالمی سطح پر منعقد ہونے والے یوگا کے عالمی دن کی تیاریوں کے بارے میں معلومات دینے کے لیے یہاں منعقدہ پریس کانفرنس میں مسٹر جادھو نے کہا کہ 2014 کے بعد سے یوگا کو عالمی سطح پر بے مثال حمایت مل رہی ہے۔ اس بار 21 جون کو انڈین کونسل فار کلچرل ریلیشنز (آئی سی سی آر) کے تعاون سے دنیا بھر کے 210 سے زائد مشنوں کے ذریعے یوگا سے متعلق 2500 پروگرام منعقد کیے جائیں گے۔ انہوں نے بتایا کہ 190 سے زائد ممالک میں یوگا کا عالمی دن منایا جا رہا ہے۔ یوگا دنیا میں ایک عوامی تحریک بنتا جا رہا ہے۔
انہوں نے بتایا کہ اس سال بزرگوں کی صحت کو مدنظر رکھتے ہوئے یوگا کے عالمی دن کا تھیم 'یوگا فار ہیلدی ایجنگ' (صحت مند بڑھاپے کے لیے یوگا) رکھا گیا ہے۔ یہ عمر بڑھنے کے ساتھ ساتھ صحت، سرگرمی اور ذہنی صحت کا مسلسل خیال رکھنے پر زور دینے کے پیش نظر وزیر اعظم نریندر مودی کی کوششوں سے کیا گیا ہے۔ مسٹر جادھو نے ایک سوال کے جواب میں کہا کہ بائیں بازو کی جماعتوں اور ترنمول کانگریس حکومت کے دور میں یوگا کی تشہیر کے لیے کوئی خاص کوششیں نہیں کی گئیں۔ اس لیے اب ریاست میں یوگا کو فروغ دینے کی کوشش کے تحت یوگا کے عالمی دن کے موقع پر مرکزی پروگرام کولکاتہ میں منعقد کیا جائے گا۔ سوامی وویکانند نے یوگا کو پہلی بار بین الاقوامی سطح پر شہرت دلانے میں گرانقدر خدمات انجام دی تھیں۔ اس بات کو بھی مدنظر رکھتے ہوئے 21 جون کو یوگا کا مرکزی پروگرام کولکاتہ میں رکھا گیا ہے۔
انہوں نے بتایا کہ کولکاتہ کے ریڈ روڈ پر منعقد ہونے والے یوگا کے مرکزی پروگرام میں وزیر اعظم نریندر مودی شرکت کریں گے۔ اس موقع پر وہاں کے لوگوں سے گھروں سے باہر نکل کر یوگا کرنے کی اپیل کی گئی ہے۔ مرکزی پروگرام کے بعد دریائے ہوگلی میں 500 کشتیوں پر یوگا آسن کیے جائیں گے۔ وزیر آیوش نے بتایا کہ یوگا کے عالمی دن کے موقع پر مرکزی وزارت ثقافت 100 مقامات پر خصوصی یوگا پروگرام منعقد کر رہی ہے۔ اس کے علاوہ وزارت ثقافت یوگا کی تشہیر کے لیے کئی دوسرے پروگرام بھی چلا رہی ہے۔ انہوں نے بتایا کہ اسکولوں میں یوگا کو اسکولی تعلیم کا اٹوٹ حصہ بنایا گیا ہے۔ مرکزی حکومت کی ہدایات اور نئی تعلیمی پالیسی کے تحت اسے نصاب، اسمبلی اور جسمانی تعلیم جیسے مختلف شکلوں میں اسکولوں میں شامل کیا گیا ہے۔
مسٹر جادھو نے کہا کہ اسکولوں میں یوگا کو تعلیم کا حصہ بنانے سے بڑی تعداد میں یوگا انسٹرکٹرز کی ضرورت ہوگی اور اس شعبے میں روزگار کے مواقع بڑھیں گے۔ وزارت آیوش کے تحت یوگا سرٹیفیکیشن بورڈ تشکیل دیا گیا ہے، جہاں سے چھ لاکھ سرٹیفکیٹ جاری کیے جا چکے ہیں۔ انہوں نے بتایا کہ یوگا کو اولمپک کھیلوں میں شامل کرنے کی بھی کوششیں کی جا رہی ہیں۔ یوگا کو ایشیائی کھیلوں میں شامل کر لیا گیا ہے اور ناگویا، جاپان میں بھی 2026 میں منعقد ہونے والے ایشیاڈ میں اسے ایک ڈسپلے کھیل کے طور پر پیش کیا جائے گا۔
یو این آئی ایف اے