نئی دہلی، 15 اپریل (یواین آئی)۔ دہلی کی وزیر اعلیٰ ریکھا گپتا کی صدارت میں منگل کے روز ہونے والی کابینہ میٹنگ میں دارالحکومت کے شہریوں کے لیے بجلی کی سبسڈی جاری رکھنے سمیت کئی اہم فیصلے کیے گئے۔
توانائی کے وزیر آشیش سود اور ٹرانسپورٹ کے وزیر ڈاکٹر پنکج سنگھ نے میڈیا کو بتایا کہ اس کابینہ میٹنگ کے دوران محترمہ گپتا کی قیادت میں کئی اہم فیصلے لیے گئے۔
مسٹر سود نے بتایا کہ کابینہ نے آج چار اہم طبقوں کے لیے سبسڈی جاری رکھنے کا تاریخی فیصلہ کیا ہے۔ ان میں کسانوں کے لیے سبسڈی، 1984 کے سکھ فسادات کے متاثرین کے لیے سبسڈی، موجودہ گھریلو صارفین کو ملنے والی سبسڈی، اور وکلا کے چیمبرز سے متعلق سبسڈی شامل ہیں۔ 1984 کے سکھ دنگا متاثرین اور وکلا کے لیے سبسڈی ہماری حکومت کا ایک نہایت اہم قدم ہے۔
انہوں نے کہا کہ اس فیصلے کے ذریعے ہم ان تمام افواہوں اور غلط بیانیوں کو مسترد کرتے ہیں جن میں کہا جا رہا تھا کہ دہلی حکومت سبسڈی ختم کرنے جا رہی ہے۔ آج دہلی کابینہ کے فیصلے سے ان چاروں طبقوں کی سبسڈی جاری رکھنے کا اعلان ہوا ہے، جس سے اپوزیشن کی پھیلائی گئی غلط فہمیوں کا بھی خاتمہ ہو گیا ہے۔
وزیر توانائی نے کہا کہ کچھ خود ساختہ بے روزگار لیڈر عوام کو گمراہ کرنے کی کوشش کر رہے ہیں، لیکن ہم یقین دلاتے ہیں کہ دہلی حکومت اپنی ذمہ داریوں کو سنجیدگی سے لے رہی ہے اور عوامی مفاد میں ہر ضروری قدم اٹھا رہی ہے۔ آج کا یہ فیصلہ اسی عزم کی عکاسی کرتا ہے۔ وہ جھوٹ پھیلاتے رہیں گے، لیکن دہلی حکومت اپنے انداز میں کام کرتے ہوئے وقت کے ساتھ ان تمام جھوٹوں کو بے نقاب کر دے گی۔ دہلی کی عوام کو پریشان ہونے کی کوئی ضرورت نہیں ہے—ہماری حکومت پوری ذمہ داری اور حساسیت کے ساتھ کام کر رہی ہے۔
اسی دوران دہلی کابینہ کی میٹنگ میں نئی ای وی پالیسی پر تفصیل سے بات چیت کی گئی۔ وزیر ٹرانسپورٹ سنگھ نے زور دیتے ہوئے کہا کہ دہلی کی عوام کو بہتر پبلک ٹرانسپورٹ فراہم کرنا ہماری اعلیٰ ترجیح ہے۔ کسی بھی قسم کی ٹرانسپورٹ سروسز بند نہیں کی جائیں گی۔ آٹو رکشا بند ہونے سے متعلق خبروں کو بے بنیاد اور گمراہ کن قرار دیتے ہوئے انہوں نے کہا کہ دہلی حکومت اس قسم کی غلط معلومات کی سختی سے تردید کرتی ہے۔ انہوں نے مزید کہا کہ پچھلی حکومت نے ای وی خریداری پر سبسڈی کی رقم جاری نہیں کی، جس کی وجہ سے صارفین کو آج تک ان کا حق نہیں مل پایا۔ جب تک نئی ای وی پالیسی 2.0 نافذ نہیں ہوتی، پرانی پالیسی لاگو رہے گی۔
دہلی حکومت کا مقصد دارالحکومت میں ایک بہتر اور عالمی معیار کی پبلک ٹرانسپورٹ سہولت کو یقینی بنانا ہے، تاکہ عام لوگوں کو کسی قسم کی پریشانی کا سامنا نہ کرنا پڑے۔
یواین آئی۔ م س