نئی دہلی، 12 جولائی( یو این آئی) مجموعی صحت کی دیکھ بھال میں ہومیوپیتھی کا رول بہت اہم ہے، ہومیوپیتھی دنیا کا دوسرا سب سے بڑا طبی نظام ہے، جس پر لاکھوں لوگ اس کے محفوظ اور جامع شفا یابی کے نقطہ نظر کے سبب اعتماد کرتے ہیں، ان خیالات کا اظہارگوا و میزورم کے سابق گورنر پی ایس سری دھرن پلئی نے ڈاکٹر ایس سی دیب ہومیو ریسرچ لیبارٹری پرائیویٹ لمیٹڈ کی 26 ویں یوم تاسیس کے موقع پر منعقد تقریب سے خطاب کرتے ہوئے کیا،انھوں نے کہا کہ یہ لیبارٹری ہومیوپیتھی کے فروغ میں جی جان سے لگی ہوئی ہے اور ساتھ ہی یہ کمپنی انسانیت کی خدمت میں بھی پیش پیش ہے۔ مہمان خصوصی نے مزید کہا کہ وزیر اعظم نریندر مودی نے ہومیوپیتھی کے عالمی دن کے موقع پر کہا تھا کہ ’’مجموعی صحت کی دیکھ بھال ایک بہت بڑی کشش بنی ہوئی ہے۔ بہترین ڈاکٹر ہومیوپیتھی کی طرف مائل ہورہے ہیں۔ ملک میں مجموعی صحت کی دیکھ بھال کا رجحان بڑھ رہا ہے ۔ تناؤ والی زندگی سے تناؤ سے مبریٰ زندگی کی طرف جانے کے رجحان میں اضافہ ہورہا ہے۔اس موقع پر ڈاکٹر ایس سی دیب ہومیو ریسرچ لیبارٹری پرائیویٹ لمیٹڈ کمپنی کے منیجنگ ڈائرکٹر مسٹر چنچل چندر دیب نے ہومیوپیتھی کے فروغ، سائنسی تحقیق اور عوامی بیداری کے تئیں تنظیم کے عزم کا اعادہ کیا۔ انہوں نے ہومیوپیتھک ادویات بنانے والے تمام مینوفیکچررز سے اپیل کی کہ وہ ہندوستان میں ہومیوپیتھک صنعت کی مجموعی ترقی کے لیے اجتماعی طور پر کام کریں۔ انہوں نے مزید کہا کہ ہومیوپیتھی لاکھوں لوگوں کے لیے صحت کی دیکھ بھال کا ایک سستا اور مؤثر طریقہ کار بنی ہوئی ہے اور مناسب قیمتوں پر معیاری ادویات کی فراہمی کمپنی کے اولین مقاصد میں سے ایک ہے۔ اپنی سماجی ذمہ داری کے عزم کے ایک حصے کے طور پر کمپنی حسن میزان ویلفیئر ٹرسٹ، رام کرشن بالک آشرم اور عرشی نگر جیسی فلاحی تنظیموں کے ساتھ تعاون کے ذریعے معاشرے کی فعال طور پرخدمت کر رہی ہے۔
انھوں نے کہا کہ حال ہی میں تنظیم نے اپنے انسانی ہمدردی کے اقدامات کو مزید وسعت دینے کے لیے ڈاکٹر ایس سی دیب اینڈ نامیتا دیب ویلفیئر ٹرسٹ بھی قائم کیا ہے۔ کمپنی اپنی کامیابی کا سہرا تحقیق پر مبنی مینوفیکچرنگ اور مسلسل جدت طرازی کو دیتی ہے۔ اس کی فلیگ شپ مصنوعات، ریومالین ٹیبلٹ اور ریومالین فورٹ ٹیبلٹ نے پہلے ہی طبی ماہرین میں بڑے پیمانے پر پذیرائی حاصل کی ہے۔
ہومیوپیتھک کلینکس کو ادویات فراہم کرنے کے علاوہ کمپنی کالجوں، اسپتالوں اور مختلف سرکاری محکموں کو بھی ادویات فراہم کرتی ہے۔ محکمہ ایکسائز کی نگرانی میں یہ ایتھائل الکحل کی فراہمی میں بھی مصروف ہے، جو ہومیوپیتھک ادویات کی تیاری میں استعمال ہونے والا بنیادی خام مال ہے۔ مستقبل میں ڈاکٹر ایس سی دیب ہومیو ریسرچ لیبارٹری پرائیویٹ لمیٹڈ کا مقصد ڈبلیو ایچ او-جی ایم پی سرٹیفیکیشن حاصل کرنا اور آنجہانی ڈاکٹر ایس سی دیب کی یاد میں ایک ہومیوپیتھک میڈیکل کالج اور ہسپتال قائم کرنے کے اپنے دیرینہ وژن کو پورا کرنا ہے، جس سے ہومیوپیتھک تعلیم اور صحت کی دیکھ بھال کی ترقی میں ایک پائیدار شراکت داری قائم ہو سکے۔
خیال رہے کہ ہومیوپیتھی شفا یابی کا ایک قدرتی طریقہ ہے، جس میں کہا گیا ہے کہ ایک صحت مند فرد میں بیماری کی علامات پیدا کرنے والا مادہ بیمار فرد میں اسی طرح کی علامات کا علاج کرے گا۔
اس تقریب میں ممتاز ہومیوپیتھک ڈاکٹر، ریگولیٹری حکام کی ممتاز شخصیات اور ہندوستان اور بیرون ملک سے آئے ہوئے مندوبین نے شرکت کی، جس نے اس جشن کو کامیابی سے ہمکنارکیا۔ تقریباً 300 مہمانوں کی شرکت کے ساتھ اس تقریب نے تنظیم کے لیے ایک اور اہم سنگ میل کا اضافہ کیا۔ سائنس سٹی، کولکاتہ میں اپنی سلور جوبلی تقریبات کی زبردست کامیابی کے بعد کمپنی نے ایک بار پھر قومی سطح پر ہومیوپیتھی کو فروغ دینے کے لیے اپنے عزم کا مظاہرہ کیا ہے۔
یو این آئی۔ م س۔ م الف