ممبئی ،16جون (یواین آئی) انجمن اسلام ایلومنائی ایسوسی ایشن نے برامپٹن، کینیڈا میں "کینیڈا الومنائی میٹ 2026" کا کامیاب انعقاد کیا، جس میں کینیڈا کے مختلف شہروں سے تعلق رکھنے والے سابق طلبہ نے بڑی تعداد میں شرکت کی، انجمن اسلام شعبہ اطلاعات کے مطابق اس پروقار تقریب کا مقصد سابق طلبہ کو ایک دوسرے سے جوڑنا، باہمی روابط کو مضبوط بنانا، رہنمائی اور تعاون کے نئے امکانات پیدا کرنا اور انجمن اسلام کی مشترکہ تعلیمی و سماجی وراثت کا جشن منانا تھا۔
مذکورہ تقریب کے مہمانِ خصوصی انجمن اسلام کے اعزازی صدر اور پدم شری اعزاز یافتہ ڈاکٹر ظہیر اسحاق قاضی نے اپنے خطاب میں کہا کہ "معیاری تعلیم ہی عالمی ترقی کی حقیقی بنیاد ہے اور یہی وہ طاقت ہے جو آنے والی نسلوں کے قائدین کی تشکیل کرتی ہے۔" انہوں نے تعلیم میں اعلیٰ معیار، مسلسل سیکھنے کے جذبے اور معاشرے کی تعمیر میں تعلیمی اداروں کے کردار پر زور دیتے ہوئے کہا کہ ایک مضبوط اور باشعور معاشرہ ہی ترقی یافتہ مستقبل کی ضمانت بن سکتا ہے۔
اس موقع پر انجمن اسلام کے اعزازی جوائنٹ سکریٹری مسٹر شہاب رئیس کا خصوصی ویڈیو پیغام بھی پیش کیا گیا، جس میں انہوں نے دنیا بھر میں مقیم سابق طلبہ کے باہمی تعاون، ادارے سے مضبوط وابستگی اور نئی نسل کی رہنمائی کے جذبے کو سراہا۔
تقریب کے دوران سابق طلبہ کی شمولیت، مینٹورشپ، ادارہ جاتی ترقی، تعلیمی تعاون اور اجتماعی سماجی ذمہ داری جیسے اہم موضوعات پر بامعنی تبادلۂ خیال کیا گیا۔ مقررین نے اس بات پر زور دیا کہ انجمن اسلام کے سابق طلبہ نہ صرف اپنے مادرِ علمی سے مضبوط تعلق برقرار رکھیں بلکہ اپنی صلاحیتوں، تجربات اور وسائل کے ذریعے معاشرے کو واپس لوٹانے (Giving Back to Society) کے جذبے کو بھی فروغ دیں۔
شرکاء نے اس عزم کا اعادہ کیا کہ انجمن اسلام کی علمی، سماجی اور قومی خدمات کی روشن روایت کو مزید مستحکم کیا جائے گا اور دنیا بھر میں موجود سابق طلبہ کو ایک مضبوط اور فعال نیٹ ورک کے ذریعے باہم مربوط کر کے تعلیم، تحقیق، نوجوانوں کی رہنمائی اور سماجی خدمت کے نئے مواقع پیدا کیے جائیں گے۔
کینیڈا ایلومنائی میٹ 2026 نہ صرف یادوں کو تازہ کرنے اور پرانے رشتوں کو مضبوط بنانے کا ایک خوبصورت موقع ثابت ہوا بلکہ اس نے انجمن اسلام کے اس مشترکہ وژن کو بھی تقویت بخشی کہ معیاری تعلیم، باہمی تعاون اور خدمتِ خلق ہی ایک روشن اور پائیدار مستقبل کی ضمانت ہیں۔
یواین آئی۔ اے اے اے