EntertainmentPosted at: Dec 12 2025 4:28PM

دھرندھر ایک ایکشن تھرلرفلم ،کچھ حقیقت کچھ فسانہ

بالی ووڈ کی متنازعہ فلم' ُدھرندھر' آدتیہ دھر کی تحریر اور ہدایت پر مبنی ایک ایکشن تھرلرفلم ہے جو 5 دسمبر کو ریلیز ہوچکی ہے۔
اسے جیو اسٹوڈیوزاوربی سکس ٹواسٹوڈیوز کے بینر تلے جیوتی دیس پانڈے، آدتیہ دھر اور لوکیش دھر نے مشترکہ طور پر پروڈیوس کیا ہے۔
اہم کرداروں میں رنویر سنگھ ، اکشے کھنہ، آر مادھون، ارجن رام پال،سنجے دت، سارا ارجن اور راکیش بیدی شامل ہیں جبکہ معاون اداکاروں میں مانو گوہل، دانش پاندور،سومیہ ٹندن، گورو گھیرا اور نوین کوشک شامل ہیں۔

فلم کا پس منظر کراچی کا بدنام زمانہ'لیاری' علاقہ ہے اس کےعلاوہ اس فلم میں مبینہ طور پر ہندوستانی خفیہ ایجنسی کے خفیہ آپریشن کی کارروائیاں بھی شامل ہیں خصوصاً وہ کارروائیاں جو آپریشن لیاری سے وابستہ ہیں۔
اس فلم میں رنویر سنگھ' ایک خفیہ ایجنٹ' کا کردار ادا کر رہے ہیں۔
آر مادھون کے کردار میں قومی سلامتی کے مشیر کی جھلک ہے۔
سنجے دت کا کردار پاکستانی پولیس افسر چودھری اسلم خان کا ہے جب کہ اکشے کھنہ کا کردار گینگسٹر رحمٰن ڈکیت کا ہے۔
الیاس کشمیری کے کردار میں ارجن رامپال ہیں۔

تقریبا پونے چار گھنٹے لمبی یہ فلم حالیہ دور میں ہندوستان کی طویل ترین فلموں میں شمار ہوتی ہے ۔
دو حصوں پر مشتمل اس سیریز کی پہلی فلم نے پہلے 3 دنوں میں 100 کروڑ سے زائد کی کمائی کی ہے اور بطور ایکشن فلم بہترین اسپائی تھرلر ہے۔

لیاری جو کبھی شعر و ادب کا گہوارہ تھا اور روشنیوں، کھیل کود، فٹبال اور مہمان نوازی کے لیے جانا جاتا تھا اسی بستی نے ایک ایسے ماحول کو جنم دیا جہاں بچوں کے لیے گولیوں کی آوازیں عام تھیں ۔
فٹبال کے میدان لاشوں کو ٹھکانے لگانے کے لیے قبرستان بن گئے تھے۔
70 اور 80 کی دہائی میں ان گلیوں سے جہاں غریب لوگ اپنے بچوں کو پڑھانا چاہتے تھے لیکن زندگی انہیں مجبوری کے سبب جرائم سے آگے نہیں بڑھنے دیتی تھی۔
رحمٰن ڈکیت کا بچپن بھی ایسا ہی تھا ۔
13 سال کی عمر میں اس نے پہلا قتل کیا ۔
جوان ہوتے ہوتے جرم خون بن کر اس کی رگوں میں دوڑنے لگا تھا۔
رحمٰن ڈکیت تشدد ، خوف و دہشت کی علامت بن چکا تھا۔
کچھ لوگوں کے لیے وہ خوںخوار ڈان اور لٹیرا تھا تو کچھ کے لیے رابن ہڈ اور مسیحا۔
جرائم،غربت، سیاست بازی اور لوکل ہیروازم پر مبنی واقعات نے لیاری کو خون خرابے اور دہشت گردی کےایک ایسے گہرے بھنور میں دھکیلا کہ کئی نسلیں برباد ہو گئیں۔

دھرندھر ایک جاسوس کی کہانی ہے جس کا اصل نام جسکیرت سنگھ رنگی ہے وہ حمزہ علی مزاری کے فرضی نام سےدہشت گردوں کے خاتمے کے لیے انٹلی جنس کی طرف سےایک مشن پر بھیجا جاتا ہے جہاں وہ دہشت گردوں کا اعتماد جیتتا ہےاور انہیں موت کے گھاٹ اتار کرواپس آ جاتا ہے۔
فلم میں ایک دوسرا مضبوط کردار رحمٰن ڈکیت کا ہے جسے اکشے کھنہ نے نبھایا ہے ۔
اپنی سنجیدہ اور دمدار اداکاری کی بدولت انہوں نے ایک سفاک اور خونخوار ڈان کا کرداراس عمدگی سے نبھایا ہے کہ فلم بینوں اور ناقدین کے مطابق وہ مرکزی کردار پر حاوی نظر آتے ہیں ۔

اکشھے کھنہ کا ایک ڈانس ویڈیو بہت وائرل ہو رہا ہے ان کا یہ ڈانس سین فلم میں کہیں نہیں تھا اس رقص میں اکھشے کہیں نہیں تھے۔
ایک منظر میں انہیں اپنے ساتھیوں کے ہمراہ ایک جگہ داخل ہونا تھا جہان کچھ لوگ رقص کر رہے تھے انہوں نے لوگوں کو ڈانس کرتے دیکھا اور ڈائرکٹر سے پوچھا پوچھا کیا میں ڈانس کرسکتا ہوں ؟ اور آدتیہ سے اشارہ ملتے ہی ڈانس کرنے لگے یہ رقص اتنا دلکش تھا کہ شوٹنگ کے بعد سب یہی کہ اٹھے کہ انہوں نے کیا کر ڈالا ؟ اسے انہوں نے خود کوریوگراف کیا تھا لیکن اس کے ساتھ ہی ایک اور ویڈیو بھی سوشل میڈیا پرسرخیوں میں ہے جس میں 70۔
80 کی دہائی کے مشہور زمانہ اداکار اور ان کے والد ونود کھنہ 1989 میں پاکستان میں کسی پروگرام میں شرکت کے دوران رقص کر رہے ہیں۔
اس میں ان کے ساتھ کرکٹر جاوید میاں داد اور اداکارہ ریکھا کوبھی دیکھا جاسکتا ہے۔
اسے حسنِ اتفاق کہیے کہ اکھشے اور ان کے والد کے ڈانس اسٹیپس میں بہت حد تک یکسانیت ہے ۔
معاملہ جو بھی ہو یہ ڈانس دھوم مچا رہا ہے۔

اب جہاں تک فلم ناقدین کے تبصروں کا سوال ہے تو ملی جلی آراء سامنے آئی ہیں۔

ٹائمز آف انڈیا کی رینوکا ویوہارے نے اس فلم کوپانچ میں سےساڑھے تین اسٹارز دیئے ہیں اور فلم کو پاور پیک کراچی مافیا تھرلر قرار دیا ہے۔

ہندوستان ٹائمز کے رشبھ سوری نےفلم کو پانچ میں سے تین اسٹارز دیئے ہیں اور اسے لمبا مگر بھرپور جاسوسی ڈرامہ قرار دیا ہے۔
'' انہوں نے رنویر سنگھ ،اکھشے کھنہ اور ہدایت کار آدتیہ دھر کی تعریف کی لیکن کہا کہ فلم کی ذیلی کہانیوں کے سبب کہیں کہیں بھاری پن محسوس ہوتا ہے۔
''
ریڈف ڈاٹ کام کی دیپا گہلوت نے پانچ میں سے ڈھائی اسٹارز دیئے اور لکھا''دھرندھرمیں وہ گہرائی اور حقیقت پسندی نہیں ہے جو کسی ویب شو کی جاسوسی کہانی میں ہوتی ہے اور نہ ہی وہ چمک دمک ہے جو سینما کی بڑی جاسوسی فلموں میں ملتی ہے۔
''
پاکستانی صحافی سحر بلوچ اس فلم پر اپنی بے لاگ رائے دیتے ہوئے کہتی ہیں کہ''انڈین فلم دھرندھرپربہت بات ہوچکی خاص طور پر اس کے پاکستانی سیاست اور کراچی کی گینگ وار کو محدود اور سطحی طور پر دکھانے پر۔
مگر پھر بھی کچھ پہلو ہیں جن پر بات کیے بغیر چھوڑا نہیں جاسکتا ۔
پہلی بات کراچی کی گینگ وار کسی ڈرامائی ٖفکشن کا حصہ نہیں ہے بلکہ یہ ماضی کی حقیقت تھی۔
لیاری میں گولی زندگی کا حصہ بن چکی تھی ۔
لوگ راستے بدل کر چلتے تھے ۔
بچے زیادہ تراسکول بند ہونے کے عادی ہو چکے تھے اور ایک غلط گلی میں قدم رکھنا اکثر قسمت کا فیصلہ بن جاتا تھا۔
انڈین فلم دھرندھرمیں تشدد فلمی ہوسکتا ہے لیکن یہاں خون اصل تھا ،لاشیں اصل تھیں اور خوف اجتماعی یادداشت کا حصہ بن چکی تھی۔

دوسری بات پاکستانی فلم ساز اس حقیقت کو کیوں بیان نہیں کر پا رہے ہیں ؟ کیوں ہندوستان میں اسے موضوع بنایا گیا؟
اس پر سحر کہتی ہیں '' کراچی کے ماضی اور حال میں اتنا فرق ہے کہ اس پر پوری نیٹ فلیکس سیریز بن سکتی ہے لیکن یہ کردار اب بھی فائلوں اور یادداشتوں میں قید ہیں۔
ہم فلموں میں محبت تو دکھا دیتے ہیں لیکن سچ کو اسکرین پر لانے سے کیوں کترا رہے ہیں ؟
تیسری بات یہ کہ چودھری اسلم جیسے پولیس آفیسر کی کہانی بھی موجود ہے جو انکاؤنٹر اسپیشلسٹ بھی کہلائے اور دہشت گردی اور گینگ وار کے مقابلے میں ریاست کی طاقت کی نمائنگی بھی کرتے تھے۔
ان کا عروج ، ان کی طاقت ،ان کا خوف اور وہ دھماکہ جس نے انہیں ایک عسکریت پسند تنظیم کے ہاتھوں ختم کردیا یہ کسی ایک سیریز کی نہیں بلکہ کئی سیریز کی فلم اسکرپٹ بن سکتی ہے
ولن کون ؟ ہیرو کون؟ نظام کس کے ساتھ اور انجام میں شکست کس کی پوئی؟ یہ سوال اب بھی زندہ ہیں۔
اصل سوال یہ ہے کہ اپنے ملکی موضوعات پر ہم کب فلمیں بنائیں گے؟ ہم کب تک کراچی کی خاک، لیاری کے زخم اور چودھری اسلم جیسے کرداروں کو اسکرین پر لائیں گے؟ جب تک ہم اپنی کہانیاں خود نہیں سنائیں گے دنیا ہمیں دوسروں کے بیانیے سے دیکھتی رہے گی''
یو این آئی۔
ایس وائی۔

Entertainment

ہارر فلمیں:ڈرانے کا ذریعہ نہیں ،بلکہ گہری فکری، نفسیاتی اور سماجی معنویت رکھتی ہے

فلم 'کھوسلہ کا گھوسلہ' کا سیکوئل شاندار ہوگا: انوپم کھیر

طاہر راج بھسین نے وکرم فڈنیس کے نئے پروجیکٹ کی شوٹنگ شروع کی

پشپا امپاسیبل میں راشی کا کردار ملنے سے پُرجوش تھی: اکشایا ہندلکر

راجکمار راؤ اور پترلیکھا نے اپنی نومولود بیٹی کا نام شیئر کیا

ہارر فلمیں:ڈرانے کا ذریعہ نہیں ،بلکہ گہری فکری، نفسیاتی اور سماجی معنویت رکھتی ہے

20 Jan 2026 | 5:38 PM

خصوصی مضمون: محمد جاوید .