نئی دہلی، 5 ستمبر (عابد انور/ یو این آئی)یوں تو پوری دنیا میں اساتذہ کا احترام، ان کی توقیر، حوصلہ بڑھانے اور ان کی خدمات کا اعتراف کرنےکے لئے ہر سال 5 اکتوبر کو یوم اساتذہ منایا جاتا ہے ہندوستان میں یوم اساتذہ ملک کے دوسرے صدر جمہوریہ سرو پلی رادھا کرشنن کی یاد میں 5 ستمبر 1962 سے منایا جاتا ہے اس دن اساتذہ اورطلباء ملکر یوم اساتذہ مناتے ہیں۔ جس میں اس دن طلبہ اساتذہ کا کردار ادا کرتے ہیں۔سرو پلی رادھا کرشنن کی پیدائش 5 ستمبر 1888 کو ہوئی تھی۔
اس دن اساتذہ کو انعام و اکرام سے نوازا جاتا ہے۔ یہ تقریب ملک بھر میں منعقد ہوتی ہے اورہر ریاست میں اساتذہ کی خدمات کا اعتراف کرتے ہوئے ان کی عزت افزائی کی جاتی ہے۔ اس بار بھی صدرجمہوریہ دروپدی مرمو نے جمعہ کو یہاں یوم اساتذہ کے موقع پر ایک تقریب میں ملک بھر کے اساتذہ کو قومی اعزازات سے نوازا۔ اس موقع پر محترمہ مرمو نے کہا کہ خوراک، لباس اور مکان کی طرح تعلیم بھی انسان کے وقار اور سلامتی کے لیے ضروری ہے۔ عقلمند اساتذہ بچوں میں وقار اور تحفظ کا احساس پیدا کرتے ہیں۔ انہوں نے بطور استاد اپنے وقت کو یاد کیا اور اس وقت کو اپنی زندگی کا ایک بہت ہی بامعنی دور قراردیا۔
صدر جمہوریہ نے کہا کہ تعلیم انسان کو قابل بناتی ہے۔ تعلیم کی طاقت سے غریب ترین طبقے کے بچے بھی ترقی کے آسمانوں کو چھو سکتے ہیں۔ پیار کرنے والے اور تعلیم کے تئیں وقف اساتذہ بچوں کی پرواز کو مضبوط بنانے میں سب سے اہم کردار ادا کرتے ہیں۔ اساتذہ کے لیے سب سے بڑا انعام یہ ہے کہ ان کے طلباء انہیں زندگی بھر یاد رکھیں اور خاندان، معاشرے اور ملک کے لیے قابل ستائش خدمات انجام دیں۔ انہوں نے کہا کہ طلباء کی کردار سازی استاد کا اولین فرض ہے۔ اخلاقی طرز عمل کی پیروی کرنے والے حساس اور ذمہ دار طلباء ان طلباء سے بہتر ہوتے ہیں، جو صرف مسابقت، کتابی علم اور خود غرضی میں دلچسپی رکھتے ہیں۔ ایک اچھے استاد میں جذبات اور عقل دونوں ہوتے ہیں۔ جذبات اور عقل کی ہم آہنگی بھی طلبہ پر اثر انداز ہوتی ہے۔ صدر نے کہا کہ لڑکیوں کی تعلیم کو سب سے زیادہ اہمیت دی جانی چاہیے۔ لڑکیوں کی تعلیم پر خرچ کرکے ہم اپنے خاندان، معاشرے اور قوم کی تعمیر میں انمول سرمایہ کاری کرتے ہیں۔ انہوں نے کہا کہ لڑکیوں کو بہترین تعلیم فراہم کرنا خواتین کی قیادت میں ترقی کو فروغ دینے کا سب سے مؤثر طریقہ ہے۔
عالمی یوم اساتذہ ایک بین الاقوامی دن ہے جو ہر سال 5 اکتوبر کو اساتذہ کی خدمات کی ستائش اور اعتراف کے لیے منایا جاتا ہے۔ 1994 میں قائم کیا گیا، یہ انٹرنیشنل لیبر آرگنائزیشن (آئی ایل او) اور اقوام متحدہ کی تعلیمی، سائنسی اور ثقافتی تنظیم یونسکو کی طرف سے سفارشات پر دستخط کی یاد دلاتاہے۔اساتذہ کا عالمی دن منانے کے لیے، اقوام متحدہ کی تعلیمی، سائنسی اور ثقافتی تنظیم یونسکو اور ایجوکیشن انٹرنیشنل (ای آئی) ہر سال ایک مہم چلاتے ہیں تاکہ دنیا کو اساتذہ کی بہتر تفہیم اور طلباء اور معاشرے کی ترقی میں ان کے کردار کو سمجھنے میں مدد ملے۔ وہ اس مقصد کے حصول کے لیے نجی شعبے جیسے میڈیا تنظیموں کے ساتھ شراکت داری کرتے ہیں۔ مہم ہر سال کے لیے مختلف موضوعات پر مرکوز ہے۔
مثال کے طور پر، "اساتذہ کو بااختیار بنانا" 2017 کا موضوع تھا۔
عالمی یوم اساتذہ دنیا کے کئی ممالک میں "اساتذہ کا عالمی دن" یا "ورلڈ ٹیچرزڈے" ہرسال 5 اکتوبر کو منایا جاتا ہے۔ یوم اساتذہ منانے کا مقصد معاشرے میں اساتذہ کے اہم کردار کو اجاگرکرنا ہے۔ اس دن کی مناسبت سے دنیا بھرمیں کئی سیمینارز، کانفرنسیں اورتقریبات کا انعقاد کیا جاتا ہے۔ 2009ء میں عالمی یوم اساتذہ کے حوالے سے یہ ہدف مقرر کیا گیا ہے کہ 2015ء تک دنیابھر میں تعلیم کو عام کیا جائے گااور بلند معیار تعلیم کی فراہمی کو یقینی بنایا جائے گا۔ اس عظیم مقصد کے حصول کے لیے ضروری ہے کہ معاشرے میں پیشہ ور اساتذہ کو ان کا جائز مقام ملے اورانہیں دورجدید میں نظام تعلیم میں ہونے والی تبدیلیوں سے وقتًا فوقتًا باخبر کیا جائے۔
ہرسال 5 اکتوبر کو"اساتذہ کا عالمی دن" منانے والے ممالک میں روس، بنگلہ دیش، آرمینا،بیلجیم، کیمرون، سعودی عرب، کروشیا، سری لنکا، آذربائیجان، پاکستان، بنگلہ دیش، کناڈا، اسٹونیا، جرمنی، جارجیا، جاپان، اردن اور کویت سمیت 37 ممالک شامل ہیں۔ اس کے علاوہ ارجنٹینا میں 9 ستمبر، آسٹریلیامیں اکتوبر کا آخری جمعہ، بیلا روس میں یکم اکتوبر، برازیل 15 اکتوبر، جنوبی افریقہ 15 اکتوبر، فرانس 27 اکتوبر، ہانگ کانگ 15 مئی، فلسطین 14 دسمبر، ترکی 24 نومبر اورچین میں 10 ستمبر کو یوم اساتذہ منایا جاتا ہے۔ جب کہ امریکہ میں اکتوبر کے پہلے ہفتے میں پورا ہفتہ ہی یوم اساتذہ کے طور پرمنایا جاتا ہے۔
یو این آئی۔ ع ا۔