نئی دہلی، 7 دسمبر (یو این آئی) کانگریس رہنما پرینکا گاندھی واڈرا نے گوا کے اَرپورا میں نائٹ کلب آتشزدگی واقعے پر دکھ کا اظہار کیا ہے، جس میں کم از کم 23 لوگوں کی جانیں گئی ہیں۔
اتوار کی صبح جاری کیے گئے ایک بیان میں، انہوں نے اس المناک واقعے کی 'گہرائی سے جانچ' اور 'مکمل احتساب' کا مطالبہ کیا، جس کے بارے میں حکام کو شک ہے کہ آگ سے تحفظ کے اصولوں کی عدم تعمیل کی وجہ سے اس کی شدت میں اضافہ ہوا ہو گا۔
شمالی گوا کے 'بِرچ بائے رومیو لین' نائٹ کلب میں ہفتے کی دیر رات لگنے والی اس بھیانک آگ نے سیاحتی سیزن کے عروج کے دوران ساحلی ریاست کو جھنجھوڑ کر رکھ دیا ہے۔ ابتدائی رپورٹوں کے مطابق، آگ لگنے کی وجہ سلنڈر کا پھٹنا تھی اور زیادہ تر متاثرین عملے کے ارکان تھے، جن میں سے کئی اندر پھنس جانے کے بعد دم گھٹنے سے ہلاک ہو گئے۔
سوشل میڈیا پر ایک پوسٹ میں، محترمہ گاندھی نے متاثرہ کنبوں سے دلی تعزیت کا اظہار کیا اور حفاظتی معیارات پر سنگین سوالات اٹھائے۔ انہوں نے کہا، 'میرےی ہمدردیاں گوا کے اَرپورا میں المناک آتشزدگی کے واقعے میں جان گنوانے والے 23 لوگوں کے اہل خانہ اور ان کے عزیزوں کے ساتھ ہیں۔ یہ ایک ناقابلِ تصور نقصان ہے۔ میں تمام زخمیوں کی جلد صحت یابی کے لیے دعاگو ہوں۔'
انہوں نے کہا، 'اس المناک واقعے کی گہری جانچ ہونی چاہیے، جوابدہی طے ہونی چاہیے اور ایسے اقدامات کیے جانے چاہیئں کہ مستقبل میں اس طرح کا کوئی واقعہ رونما نہ ہو۔ '
گوا کے وزیر اعلیٰ پرَمود ساونت، جنہوں نے جائے حادثہ کا دورہ کیا، پہلے ہی اشارہ دے چکے ہیں کہ ابتدائی نتائج حفاظتی ضوابط کی سنگین خلاف ورزیوں کی نشاندہی کرتے ہیں۔
وزیر اعلیٰ ساونت نے نامہ نگاروں کو بتایا، 'ابتدائی معلومات کے مطابق، نائٹ کلب نے آگ سے تحفظ کے اصولوں کی پابندی نہیں کی تھی۔' انہوں نے اس واقعہ کو 'افسوسناک' قرار دیا۔ انہوں نے سخت کارروائی کا وعدہ کرتے ہوئے کہا، 'ہم کلب انتظامیہ اور ان افسران کے خلاف بھی کارروائی کریں گے جنہوں نے حفاظتی اصولوں کی خلاف ورزی کے باوجود اسے چلانے کی اجازت دی۔'
یو این آئی ۔ م ک