نئی دہلی، 12 جولائی (یواین آئی) تجارت اور صنعت کے وزیر پیوش گوئل 13 سے 17 جولائی تک اسپین، بیلجئیم اور فن لینڈ کے دورے پر جانے والے ایک اعلیٰ سطحی ہندستانی تجارتی وفد کی قیادت کریں گے یہ دورہ یورپ میں اقتصادی شراکت داری کو مضبوط کرنے کے ہندستان کے عزم کو ظاہر کرتا ہے، جس میں تجارت، سرمایہ کاری، ٹیکنالوجی، جدت طرازی اور پائیدار ترقی پر توجہ مرکوز کی جائے گی۔ اس وفد میں ایڈوانسڈ مینوفیکچرنگ، کلین انرجی، ڈیجیٹل ٹیکنالوجی، جواہرات اور زیورات، فوڈ پروسیسنگ، ہیلتھ کیئر اور ڈیزائن جیسے شعبوں کی معروف ہندستانی کمپنیاں شامل ہیں۔
مسٹر گوئل اسپین میں 13 جولائی کو 'چیمبر آف کامرس آف اسپین' اور 'آئی سی ای ایکس اسپین ٹریڈ اینڈ انویسٹمنٹ' کے ساتھ ایک تجارتی بات چیت میں حصہ لیں گے۔ اس سیشن میں اسپین اور ہندستان کی صنعت کے بڑے نام آٹوموٹو، قابلِ تجدید توانائی، ریلوے، آرٹیفیشل انٹیلیجنس، سیمی کنڈکٹر، فوڈ پروسیسنگ اور سیاحت جیسے شعبوں میں مواقع پر تبادلہ خیال کریں گے۔ ایبرڈرولا، ایکسیونا، سی اے ایف، ٹالگو، گیسٹیمپ اور اندرا جیسی ہسپانوی کمپنیاں پہلے ہی ہندستان میں موجود ہیں، جبکہ ٹی سی ایس، انفوسس، وپرو، ٹیک مہندرا اور ایل اینڈ ٹی جیسی ہندستانی کمپنیاں ڈیجیٹلائزیشن اور انڈسٹری 4.0 کو فروغ دینے کے لیے اسپین میں اپنا کام کاج بڑھا رہی ہیں۔
یہ دورہ 'اسپین-انڈیا ڈوئل ایئر 2026' کے دوران ہو رہا ہے، جو سفارتی تعلقات کے 70 سال پورے ہونے کا جشن ہے اور اس میں بزنس ٹو بزنس شراکت داری پر زور دیا جائے گا۔
بیلجئیم میں 14-15 جولائی کو ہونے والے پروگراموں میں اینٹورپ پورٹ اور اینٹورپ ورلڈ ڈائمنڈ سینٹر کا دورہ شامل ہے۔ پورٹ کے دورے سے یورپ کے بڑے لاجسٹکس مرکز کے بارے میں معلومات حاصل ہوں گی، جس میں ملٹی موڈل کنیکٹیویٹی، گرین لاجسٹکس اور مضبوط سپلائی چین کے بہترین طریقوں کو دکھایا جائے گا۔ اینٹورپ ورلڈ ڈائمنڈ سینٹر کا دورہ عالمی ڈائمنڈ ویلیو چین، سرٹیفیکیشن، ذمہ دارانہ سورسنگ اور ہندستان کے جواہرات و زیورات کے شعبے کے لیے مواقع پر روشنی ڈالے گا۔
جاری یواین آئی۔الف الف