نئی دہلی، 12 نومبر (یو این آئی) انڈین مسلمس فار سول رائٹس (آئی ایم سی آر) کے زیرِ اہتمام ایک تقریب میں ادارے کے فاؤنڈر ٹرسٹی، سابق مرکزی وزیر اورآل انڈیا کانگریس کمیٹی کی انٹرنیشنل افیئرز کمیٹی کے چیئرمین اور معروف وکیل سلمان خورشید کو استقبالیہ دیا گیا اور ان کے اعزاز میں ایک نشست کا انعقادکیا گیا جاری ریلیز کے مطابق یہ اعزاز انہیں آل انڈیا کانگریس کمیٹی کی بین الاقوامی اُمور کمیٹی کے صدر بنائے جانے اور حکومتِ تلنگانہ کی جانب سے وزیرِ اعلیٰ ریونت ریڈی کے ہاتھوں "راجیو گاندھی فاؤنڈیشن ایوارڈ" سے نوازے جانے پر آئی۔ ایم۔ سی۔ آر کی جانب سے دیا گیا۔
تقریب میں ملک کی متعدد ممتاز شخصیات اور اہم دانشوران شریک ہوئے، جن میں پٹنہ ہائی کورٹ کے سابق چیف جسٹس جناب جسٹس اقبال احمد انصاری، آل انڈیا کانگریس کمیٹی کے قومی جنرل سکریٹری و مشیر جناب گردیپ سنگھ سپّل، آئی ایم سی آر کے قومی صدر اور سابق رکن پارلیمنٹ محمد ادیب، فار ایج گروپ کے چیئرمین، ایڈوایزری بورڈ نوید خان، انڈین آرمی کےسابق جنرل،ائ ایم سی آر کے نائب صدر،جاوید اقبال خان، آل انڈیا پیس مشن کے صدر دَیا سنگھ، سابق رکنِ پارلیمنٹ کنور دانش علی، سپریم کورٹ کے سینئر وکیل فُضیل احمد ایوبی، غازی آباد انکم ٹیکس کمشنر عتیق احمد، جماعت اسلامی ہند کے نیشنل سکریٹری لئیق احمد خان، قومی جنرل سکریٹری ڈاکٹر اعظم بیگ اور سید مسعود حسین، آئی۔ ایم۔ سی۔ آر کے نیشنل کوآرڈینیٹر اور فریڈم پریس ڈیلی انگلش اخبار کے ریزیڈنٹ ایڈیٹر انظرالباری، آئی۔ ایم۔ سی۔ آر اوورسیز ڈپارٹمنٹ کے انچارج املاک احمد خان، تنظیم کے نائب ٹریزرار محمد الیاس سیفی، پروفیسر سلیم قدوائی، ارجن ایوارڈی اور انڈین شوٹنگ ٹیم کے قومی کوچ انور سلطان، الافروز کيٹررز کے ملک نوشاد احمد، سماجی کارکن سلیم قریشی سمیت دیگر معزز شخصیات شامل تھیں۔
اجلاس کے دوران موجودہ سیاسی و سماجی حالات پر تفصیلی تبادلۂ خیال کیا گیا۔ اس موقع پر کانگریس کے سینئر رہنما کو کانگریس پارٹی میں مناسب نمائندگی دینے کے مسئلے پر بھی گفتگو ہوئی۔ مزید برآں، سکھ-مسلم اتحاد کو فروغ دینے کے لیے جلد ہی "حقِ امن کانفرنس" کے انعقاد کا فیصلہ لیا گیا، جو اگلے ماہ لکھنؤ میں منعقد ہوگی۔
اپنے خطاب میں سلمان خورشید نے کہا: "ہمیں صبرو استقلال کے ساتھ اپنی مشن پر کام جاری رکھنا چاہیئے۔ حکومتیں اور تنظیمیں اپنے فیصلے خود کرتی ہیں کہ کس شخص کو کس منصب پر رکھنا ہے۔ ہمیں اس عمل پر اطمینان رکھنا چاہیے اور کانگریس پارٹی کے ساتھ مل کر آئینِ ہند کے تحفظ و استحکام کے لیے کوشاں رہنا چاہیے۔”
تنظیم کے صدراورسابق ممبر آف پارلیمنٹ راجیہ سبھا محمد ادیب نے فاؤنڈر ٹرسٹی سلمان خورشید کی خدمات کو سراہتے ہوئے ان کے اور کپل سبل کے اعزاز میں انے والے دنوں میں ایک بڑی تقریب کے انعقاد کا اعلان بھی کیا اور خاص طور سے لال قلعے کے قریب ہوئے دہلی دھماکے پر انتہائی تشویش کا اظہار کرتے ہوئے اس کی مذمت کی ،ھلاک شدگان کی تعزیت کرتے ہوئے دھماکے میں زخمی ہوئے متاثرین کے ساتھ گہری ہمدردی کا اظہار کرتے ہوئے اس پورے واقعے کے لیے سرکار کو ذمہ دار ٹھہرایا اور اس کی غیر جانبدارانہ انکوائری کی مانگ کی اور کہا جو بھی اس کا ذمہ دار پایا جائے اس کے خلاف سخت ترین کاروائ کی جاے.
ممتاز کانگریسی رہنما جناب گردیپ سنگھ سپل نے بھی دہلی دھماکہ مین ھلاک ھونے لوگوں کی سخت ترین مذمت کی اور اس موقع پر کانگرس پارٹی میں سلمان خورشید جیسے قداور شخصیتوں کو ان کے مراتب کے مناسب سے نمائندگی دینے کی وکالت کرتے ہوئے ائی ایم سی ار کی جانب سے ملک بھر میں قانون کی بالادستی اور ائین کے تحفظ کے لیے کی جارہی کوششوں کو سراہا اوراس طرح کی کوششوں کے اپنی جانب سے ہر ممکن تعاون کا یقین دلایا۔
اس پُروقار تقریب نے نہ صرف سیاسی و سماجی ہم آہنگی کا مظاہرہ کیا بلکہ قومی اتحاد، اخوت اور باہمی احترام کے پیغام کو مزید تقویت بخشی۔
اس موقع پر گردیپ سنگھ سپّل، جسٹس اقبال انصاری، محمد ادیب، کنور دانش علی، نوید خان، جنرل جاوید اقبال خان، فُضیل ایوبی، ڈاکٹر اعظم بیگ اور دیگر معزز مہمانانِ گرامی نے بھی اپنے خیالات کا اظہار کیا۔
یو این آئی۔ ع ا۔