نئی دہلی 05 ستمبر (یواین آئی) وزارت خارجہ نے کہا ہے کہ وہ آسٹریلیا میں تارکین وطن مخالف مظاہروں کے سلسلے میں آسٹریلیا کی حکومت اور وہاں رہنے والی ہندوستانی برادری کے ساتھ مسلسل رابطے میں ہے اور ہندوستان اپنے لوگوں کی فلاح و بہبود کے لئے پرعزم ہے۔ وزارت خارجہ کے ترجمان رندھیر جیسوال نے جمعہ کو یہاں ایک پریس کانفرنس میں کہا کہ ہندوستان نے 31 اگست کو آسٹریلیا کے کئی شہروں میں تارکین وطن مخالف مظاہروں کا نوٹس لیا ہے۔ انہوں نے کہا کہ ہندوستان اس پیش رفت پر مسلسل نظر رکھے ہوئے ہے۔
انہوں نے کہاکہ "ہمارا ہائی کمیشن اور قونصلیٹ جنرل اس سلسلے میں آسٹریلوی حکومت اور ہماری کمیونٹی کے اراکین کے ساتھ باقاعدگی سے رابطے میں ہیں۔ احتجاج شروع ہونے سے پہلے ہمارے ہائی کمیشن نے ہندوستانی تارکین وطن کے خدشات کو آسٹریلوی حکومت کے ساتھ شیئر کیا تھا۔" ترجمان نے کہا کہ آسٹریلیا نے ان مظاہروں پر ہندوستان کے ساتھ تحفظات کا اظہار کیا ہے۔ آسٹریلیا میں حکمران جماعت اور اپوزیشن کے رہنماؤں نے آسٹریلیا کے کثیر ثقافتی تشخص کی حمایت میں بیانات جاری کیے ہیں۔ انہوں نے کہا کہ ان رہنماؤں نے آسٹریلیا کی مجموعی ترقی میں ہندوستانی آسٹریلوی کمیونٹی کے کردار کو بھی تسلیم کیا ہے اور وہ اس کی تعریف اور احترام کرتے ہیں۔
انہوں نے کہا کہ ہندوستان یہ بھی مانتا ہے کہ تنوع ہی طاقت ہے۔ ہندوستان آسٹریلیا کے ساتھ اپنی جامع اسٹریٹجک شراکت داری کو اہمیت دیتا ہے، جس کا ایک اہم ستون عوام کے درمیان باہمی تعلقات ہیں۔ انہوں نے کہا کہ اس سے دونوں ممالک کے اسٹریٹجک تعلقات مزید مضبوط ہوتے ہیں۔
یواین آئی۔ ظ ا