نئی دہلی، 20 جون (یو این آئی) ملک میں گزشتہ چند دنوں سے کورونا کے موجودہ مریضوں کی تعداد میں مسلسل کمی آئی ہے اور ہفتہ کے روز اس انفیکشن سے صحت یاب ہونے والوں کی کل تعداد 19453 تک پہنچ گئی جبکہ موجودہ مریضوں کی کل تعداد گھٹ کر 5012 تک پہنچ گئی ہے۔
راجستھان میں گزشتہ 24 گھنٹے کے دوران کورونا انفیکشن سے ایک مریض کی موت کے ساتھ ہی ملک میں مرنے والوں کی تعداد 121 ہو گئی ہے۔ واضح ر ہے کہ 22 مئی کو ملک میں کورونا کے صرف 257 موجودہ مریض تھے۔
مرکزی وزارت صحت و خاندانی بہبود کی طرف سے آج جاری کردہ اعداد و شمار کے مطابق گزشتہ 24 گھنٹے کے دوران کورونا انفیکشن کے معاملوں میں 596 کی کمی آئی ہے۔ دوسری جانب اس وائرس کے انفیکشن سے 1197 مریض صحت یاب ہو چکے ہیں۔ اس مہلک وائرس کے انفیکشن سے ایک مریض کی موت کے ساتھ ہی مرنے والوں کی تعداد 121 تک پہنچ گئی ہے۔
وزارت کے مطابق، جنوبی ہندوستان کی ریاست کیرالہ انفیکشن کے لحاظ سے سب سے زیادہ متاثر ہوئی ہے۔ تاہم، آج صبح تک، 141 ایکٹو کیسز گھٹ کر 1043 پر آ گئے ہیں۔ قومی راجدھانی میں 73 مریض کم ہونے کے ساتھ متاثرین کی کل تعداد 557 ہو گئی ہے۔ مہاراشٹر میں 49 مریض کم ہونے کے ساتھ کل موجودہ مریضوں کی تعداد 340 ہو گئی ہے اور گجرات میں 166 کیسز کم ہونے کے ساتھ مریضوں کی کل تعداد 746 ہو گئی ہے۔
مغربی بنگال کا تازہ ترین ڈیٹا دستیاب نہیں ہے، لیکن وہاں کورونا کے 747 ایکٹو کیسز ہیں۔ کرناٹک میں 277، تمل ناڈو میں 155، اتر پردیش میں 255، راجستھان میں 230، ہریانہ میں 94، مدھیہ پردیش میں 108، آندھرا پردیش میں 37، اڈیشہ میں 48، چھتیس گڑھ میں 61، بہار میں 22، سکم میں 38، پنجاب میں 56 مریض ہیں۔ میزورم اور اروناچل پردیش میں فی الحال کورونا انفیکشن کا کوئی فعال کیس نہیں ہے۔
یو این آئی۔ م ش۔