سری نگر،18جنوری(یو این آئی) جموں و کشمیر کے وزیر اعلیٰ عمر عبداللہ کل یعنی 19 جنوری کو نئی دہلی میں مرکزی وزیر داخلہ امیت شاہ سے ملاقات کریں گے سرکاری اور سیاسی حلقوں میں اس ملاقات کو غیر معمولی اہمیت کا حامل قرار دیا جا رہا ہے کیونکہ دونوں رہنماؤں کے درمیان متعدد حساس اور اہم معاملات پر تبادلہ خیال متوقع ہےباوثوق ذرائع نے یو این آئی کو بتایا کہ وزیر اعلیٰ عمر عبداللہ کی یہ ملاقات نہ صرف رسمی نوعیت کی ہے بلکہ اس میں مستقبل کے انتظامی اور سیکورٹی معاملات سے متعلق اہم فیصلوں کی بنیاد بھی پڑ سکتی ہے۔ ذرائع کے مطابق ملاقات میں جموں و کشمیر کی موجودہ سیکورٹی صورتحال، سرحدی کشیدگی، جاری کارروائیوں، داخلی امن و امان اور ریاستی حکمرانی سے متعلق امور پر تفصیلی بات چیت ہونے کا امکان ہے۔
ذرائع نے مزید بتایا کہ وزیر اعلیٰ عمر عبداللہ ممکنہ طور پر مرکزی حکومت کو زمینی سطح پر عوامی مسائل، ترقیاتی منصوبوں کی رفتار، اور انتظامی سطح پر درپیش چیلنجوں سے بھی آگاہ کریں گے۔ اس کے علاوہ، مختلف اضلاع میں سیکیورٹی اداروں کی تعیناتی، حالیہ آپریشنز اور امن مخالف سرگرمیوں کے حوالے سے بھی اہم تبادلہ خیال زیرِ غور آئے گا۔
پالیسی حلقوں کا ماننا ہے کہ یومِ جمہوریہ سے قبل ہونے والی یہ اعلیٰ سطحی ملاقات اپنے اندر خصوصی اہمیت رکھتی ہے، خصوصاً ایسے وقت میں جب وادی سمیت پورے جموں و کشمیر میں سیکیورٹی ایجنسیاں چوکس ہیں اور موجودہ حالات کے پیش نظر حفاظتی اقدامات مزید سخت کیے گئے ہیں۔
یو این آئی۔ ارشید بٹ