نئی دہلی، 20 جولائی (یو این آئی) کانگریس صدرملکا رجن کھرگے اور پارٹی جنرل سکریٹری پریانکا گاندھی واڈرا نے پیپر لیک کے خلاف احتجاج کر رہے طلبہ پر پولیس کارروائی کو غلط بتاتے ہوئے الزام لگایا ہے کہ سرکار نوجوانوں کی آواز دبانے کی کوشش کر رہی ہے مسٹر کھرگے نے پیر کو پارلیمنٹ ہاؤس کے احاطے میں صحافیوں سے کہا کہ سرکار نوجوانوں اور طلبہ پر لاٹھی چارج کرا رہی ہے۔ اگر سرکار امتحانات کرانے کے اہل نہیں ہے تو اسے اقتدار چھوڑ دینا چاہیے۔ انہوں نے ایودھیا کے تعلق سے بھی سرکار پر حملہ کیا اور کہا کہ بھگوان رام کے نام پر چڑھاوا چوری ہوا اور اب رام بھکتوں کے نام پر عوام کے پیسے کی لوٹ ہو رہی ہے۔ انہوں نے کہا کہ شری رام جنم بھومی تیرتھ شیتر ٹرسٹ کی تشکیل وزیرِ اعظم نریندر مودی نے کی تھی، اس لیے انہیں اس کی ذمہ داری لینی چاہیے۔
محترمہ واڈرا نے کہا کہ پیپر لیک کے خلاف طلبہ جنتر منتر پر بیٹھے ہیں لیکن ان پر لاٹھی چارج کرایا جا رہا ہے۔ انہوں نے الزام لگایا کہ سرکار نوجوانوں کی آواز دبانے کی کوشش کر رہی ہے۔ انہوں نے کہا کہ کانگریس تعلیمی پالیسی پر بحث کا مطالبہ کر رہی ہے، کیونکہ اس میں سنگین خامیاں ہیں، لیکن سرکار اس پر بحث کے لیے تیار نہیں ہے۔ اس کے بجائے احتجاج کر رہے طلبہ پر آنسو گیس کے گولے چھوڑے جا رہے ہیں اور ان کے ساتھ مارپیٹ کی جا رہی ہے۔
اس درمیان، کانگریس جنرل سکریٹری جے رام رمیش نے وزیرِ اعظم نریندر مودی کے پارلیمنٹ کے احاطے میں دیے گئے خطاب پر ردِعمل ظاہر کرتے ہوئے کہا کہ وزیرِ اعظم نے مانسون سیشن کا آغاز اپنی پرانی اور کھوکھلی تقریر سے کیا، لیکن ان مسائل کا کوئی ذکر نہیں کیا جن پر اپوزیشن سرکار سے جواب چاہتا ہے۔ انہوں نے کہا کہ ان میں ایودھیا کے رام مندر ٹرسٹ کے مالیاتی معاملات میں مبینہ بے ضابطگیاں، نیٹ-یو جی 2026 پیپر لیک اور سی بی ایس ای کلاس 12 کے امتحان میں مبینہ گڑبڑیاں، اپوزیشن جماعتوں کو توڑنے کی مبینہ کوششیں، مختلف مرکزی اور ریاستی سرکاروں سے جڑے بدعنوانی اور مفادات کے تصادم کے الزامات نیز حد بندی ، 'ون نیشن، ون الیکشن' اور وی بی ایس اے بل جیسے مسائل شامل ہیں۔
یو این آئی۔ ایف اے