لکھنؤ، 6 اگست (یواین آئی) بہوجن سماج پارٹی (بی ایس پی) کی صدر مایاوتی نے پارٹی کے سینئر لیڈر اور رسڑا اسمبلی حلقے سے رکن اسمبلی رہے اوما شنکر سنگھ کو جذباتی خراج عقیدت پیش کرتے ہوئے کہا کہ انہوں نے عمر بھر پارٹی اور تنظیم کے لیے مکمل وفاداری برقرار رکھی اور کبھی پارٹی کو دھوکہ نہیں دیا جمعرات کو آنجہانی رکن اسمبلی کی رہائش گاہ پر سوگوار اہل خانہ سے ملاقات کے بعد صحافیوں سے گفتگو کرتے ہوئے محترمہ مایاوتی نے کہا کہ اوما شنکر سنگھ انہیں سگی بہن کی طرح مانتے تھے اور ان کا انتقال ان کے لیے ذاتی اور سیاسی، دونوں ہی لحاظ سے ناقابل تلافی نقصان ہے۔
انہوں نے کہا کہ پارٹی کے کئی لوگ وقت کے ساتھ، ساتھ چھوڑ کر چلے گئے، لیکن اوما شنکر سنگھ آخر تک بی ایس پی کے تئیں وقف رہے اور انہوں نے کبھی پارٹی کے ساتھ اعتماد شکنی نہیں کی۔ بی ایس پی سربراہ نے کہا کہ اگر آنجہانی رکن اسمبلی کا خاندان چاہے گا تو ان کے بیٹے کو سیاست میں آگے بڑھایا جائے گا۔ انہوں نے کہا کہ اوما شنکر سنگھ کو پارٹی میں جو احترام حاصل تھا، وہی احترام ان کے بیٹے کو بھی دیا جائے گا۔ محترمہ مایاوتی نے کہا کہ بہوجن سماج پارٹی آنجہانی لیڈر کے پورے خاندان کے ساتھ کھڑی ہے اور آئندہ بھی ہر ممکن تعاون اور سرپرستی فراہم کرے گی۔ انہوں نے آنجہانی لیڈرکو خراج عقیدت پیش کرتے ہوئے سوگوار خاندان سے تعزیت کا اظہار کیا۔
اس سے قبل بہوجن سماج پارٹی (بی ایس پی) کی قومی صدر مایاوتی نے جمعرات کو ضلع بلیا کی رسڑا اسمبلی نشست سے پارٹی کے رکن اسمبلی رہے اوما شنکر سنگھ کو خراج عقیدت پیش کیا۔ مایاوتی دارالحکومت لکھنؤ میں واقع آنجہانی رکن اسمبلی کی رہائش گاہ پہنچیں، جہاں انہوں نے ان کے جسد خاکی پر پھول چڑھائے اور خراج عقیدت پیش کیا۔ اس دوران انہوں نے سوگوار اہل خانہ سے ملاقات کر کے انہیں تسلی دی اور آنجہانی کی آتما کی شانتی کے لیے دعا کی۔
قابل ذکر ہے کہ اوما شنکر سنگھ کا بدھ کو انتقال ہو گیا تھا۔ وہ طویل عرصے سے کینسر کی بیماری میں مبتلا تھے اور ان کا علاج چل رہا تھا۔ ان کے انتقال سے بی ایس پی کے کارکنوں اور حامیوں میں غم کی لہر دوڑ گئی ہے۔ بڑی تعداد میں پارٹی کے کارکنان انہیں خراج عقیدت پیش کرنے پہنچ رہے ہیں۔
اوما شنکر سنگھ پوروانچل میں بی ایس پی کے اہم لیڈران میں شمار کیے جاتے تھے اور بلیا کے رسڑا علاقے کی اسمبلی میں نمائندگی کر رہے تھے۔ ان کے انتقال پر مختلف سیاسی جماعتوں کے رہنماؤں نے بھی غم کا اظہار کرتے ہوئے انہیں خراج عقیدت پیش کیا ہے۔
یواین آئی۔الف الف