نئی دہلی/ممبئی، 14 فروری (یواین آئی) وزیر تجارت و صنعت پیوش گوئل اور ٹیکسٹائل کے وزیر گری راج سنگھ نے ہندوستان امریکہ تجارتی معاہدے کے خلاف کانگریس لیڈر راہل گاندھی کی مہم کی سختی سے تردید کرتے ہوئے کہا کہ وہ اس مسئلہ پر جھوٹ کا سہارا لے رہے ہیں مسٹر گوئل نے ہفتہ کو ممبئی میں نامہ نگاروں سے کہا کہ کانگریس لیڈر راہل گاندھی خود کو وہ سوالوں کے گھیرے میں لارہے ہیں۔ ہندوستان کو کپاس درآمد کرنے کی ضرورت ہے۔ کانگریس کی قیادت والی یو پی اے حکومت نے خود سیز یونٹوں کو کپاس کی ڈیوٹی فری درآمد کی اجازت دی۔ انہوں نے کہا کہ مسٹر گاندھی ہندوستان-امریکہ تجارتی معاہدے پر سیاست کر رہے ہیں اور "اب جھوٹ کا سہارا لے رہے ہیں۔"
وزیر تجارت مسٹر گوئل نے کہا کہ جب کانگریس لیڈروں کو معاہدے میں کوئی خامی نہیں ملی تو انہوں نے جھوٹ کا سہارا لیا۔ اس طرح وہ بے وقوفی سے اپنی بے گناہی ثابت کرنے کی کوشش کر رہے ہیں۔ مسٹر گوئل ممبئی میں نامہ نگاروں سے بات کر رہے تھے۔
مسٹر گاندھی نے آج ایکس پر ایک پوسٹ میں کہا کہ "وزیر اعظم اور ان کی کابینہ، جو جھوٹ بولنے کے ماہر ہیں، اس بارے میں کنفیوژن پھیلا رہے ہیں۔ اور وہ ہندوستان-امریکہ تجارتی معاہدے کے ذریعے ملک کے کپاس کے کسانوں اور ٹیکسٹائل کے برآمد کنندگان کو دھوکہ دے رہے ہیں۔"
مسٹر گاندھی نے یہ بھی کہا کہ بنگلہ دیش کو امریکہ کو ملبوسات کی برآمدات پر صفر ڈیوٹی رسائی حاصل ہوگی، لیکن یہ فائدہ صرف اس صورت میں فراہم کیا جائے گا جب وہ امریکہ سے کپاس خریدے گا۔
مسٹر گوئل نے طویل مذاکرات کے بعد طے پانے والے ہندوستان-امریکہ کے عبوری معاہدے کو ہندوستان کے لئے مواقع سے بھرپور قرار دیا اور کہا کہ یہ ملک کے کسانوں، ماہی گیروں اور دیگر کمزور طبقات کے مفادات کا مکمل تحفظ کرتا ہے۔ انہوں نے کہاکہ "مسٹر گاندھی منفی سیاست کے ذریعے ہندوستان کی ترقی کے سفر کو نقصان پہنچانے کی کوشش کر رہے ہیں۔"
وزیر تجارت نے کہاکہ "میں راہل گاندھی کے خوف کو بے نقاب کروں گا، جو کسانوں اور برآمد کنندگان کو گمراہ کر رہے ہیں۔"
یواین آئی۔ ظ ا