نئی دہلی، 12 جولائی (یواین آئی) وزیر اعظم نریندر مودی نے اتوار کو قطر کے سابق امیر شیخ حمد بن خلیفہ آل ثانی کے انتقال پر گہرے دکھ کا اظہار کیا ہے انہوں نے شیخ حمد کو ایک دور اندیش سیاست داں قرار دیا جنہوں نے قطر کو ایک خوشحال اور جدید ملک میں تبدیل کرنے کے ساتھ ساتھ ہندستان کے ساتھ دوستانہ تعلقات کو بھی مضبوط کیا تھا وزیر اعظم نے سوشل میڈیا پلیٹ فارم 'ایکس' پر پوسٹ کیے گئے ایک تعزیتی پیغام میں شیخ حمد کو خراجِ عقیدت پیش کیا اور قطر کی قیادت، شاہی خاندان اور وہاں کے عوام سے دلی ہمدردی کا اظہار کیا۔
مسٹر مودی نے لکھا، "ہم قطر کے شیخ حمد کے انتقال پر گہرے دکھ کا اظہار کرتے ہیں۔ وہ ایک ایسے دور اندیش رہنما تھے جنہوں نے قطر کو ترقی اور خوشحالی کی نئی بلندیوں پر پہنچایا۔ ہم انہیں ایک سچے دوست کے طور پر بھی یاد کرتے ہیں، جن سے مجھے فروری 2024 میں اپنے گزشتہ دورۂ قطر کے دوران ملنے کا شرف حاصل ہوا تھا۔"
وزیر اعظم نے قطر کے موجودہ امیر شیخ تمیم بن حمد آل ثانی سے بھی تعزیت کا اظہار کیا اور مرحوم کے لیے دعا کی۔
شیخ حمد بن خلیفہ آل ثانی نے سال 1995 سے 2013 تک قطر کے امیر کے طور پر خدمات انجام دیں، جس کے بعد انہوں نے اقتدار اپنے بیٹے شیخ تمیم بن حمد آل ثانی کو سونپ دیا تھا۔ انہیں قطر کو ایک عالمی اقتصادی اور سفارتی طاقت میں تبدیل کرنے کا کریڈت دیا جاتا ہے۔ ان کے دورِ حکومت میں، قطر نے اپنے قدرتی گیس کے وسیع وسائل کی بدولت تیزی سے اقتصادی ترقی کی، اپنے بین الاقوامی اثر و رسوخ کو بڑھایا اور علاقائی و عالمی امور میں ایک اہم ملک بن کر ابھرا۔
مسٹر مودی نے فروری 2024 میں قطر کے اپنے سرکاری دورے کے دوران شیخ حمد سے ملاقات کی تھی، جو ہند-قطر تعلقات میں ایک اہم سنگِ میل ثابت ہوئی تھی۔
اس دورے کے نتیجے میں تجارت، سرمایہ کاری، توانائی، ٹیکنالوجی اور باہمی ہم آہنگی سمیت دوطرفہ تعاون کو ایک نئی رفتار ملی تھی۔ ہندستان اور قطر کے درمیان طویل عرصے سے گہرے تعلقات ہیں، جس میں قطر ہندستان کے اہم توانائی شراکت داروں میں سے ایک ہے۔ اس کے ساتھ ہی قطر میں بڑی تعداد میں ہندستانی تارکینِ وطن رہتے ہیں جو وہاں کی ترقی میں اہم کردار ادا کرتے ہیں۔
مسٹر مودی کا یہ پیغام جدید قطر کے بانی کے طور پر شیخ حمد کی لازوال وراثت اور ہندستان اور اس خلیجی ملک کے درمیان مسلسل مضبوط ہوتے ہوئے قریبی اور دوستانہ تعلقات کی عکاسی کرتا ہے۔
یواین آئی۔الف الف