بھوپال، 16 جولائی (یو این آئی) مدھیہ پردیش کے وزیر اعلی ڈاکٹر موہن یادو آج سے 19 جولائی تک اسپین کے سرکاری دورے پر رہیں گے۔وزیر اعلیٰ ڈاکٹر یادو ریاست میں سرمایہ کاری کے ذریعے صنعتی ترقی اور روزگار پیدا کرنے کے لیے کام کر رہے ہیں۔ اپنے دورہ اسپین کے دوران وہ میڈرڈ میں منعقدہ "انویسٹ ان مدھیہ پردیش" بزنس فورم سے خطاب کریں گے اور صنعت، سیاحت، کھیل، ثقافت اور فلم پروڈکشن سے متعلق موضوعات پر اعلیٰ سطحی میٹنگوں میں شرکت کریں گے۔
اسپین کے دورے کے پہلے دن16 جولائی کو ہندوستانی سفیر دنیش کے پٹنائک وزیر اعلیٰ ڈاکٹر یادو سے خیر سگالی ملاقات کریں گے۔ اس کے بعد وہ "انویسٹ ان مدھیہ پردیش" بزنس فورم میں بطور مہمان خصوصی شرکت کریں گے۔ اس سیشن میں سینئر افسران سیاحت، صنعتی پالیسی اور سرمایہ کاری، آئی ٹی اور انفرااسٹرکچر سیکٹر پر پریزنٹیشن دیں گے۔
اسپین-انڈیا کونسل فاؤنڈیشن کے صدر جوآن اگناسیو اینٹریکنالیس بھی بزنس فورم سے خطاب کریں گے۔ نیچر بائیو فوڈز کے سی ای او روہن گروور اپنے تجربات کا اشتراک کریں گے۔
وزیر اعلیٰ ڈاکٹر یادو فورم میں موجود صنعت کاروں کو مدھیہ پردیش میں مختلف شعبوں میں سرمایہ کاری کے مواقع پر تفصیلی جانکاری دیں گے۔ نیٹ ورکنگ لنچ میں وزیر اعلیٰ ڈاکٹر یادو اسپین کے سرکردہ صنعت کاروں اور مختلف تنظیموں کے نمائندوں سے بات چیت کریں گے۔
وزیر اعلیٰ کھیلوں کے شعبے میں معروف اسپورٹس انفرااسٹرکچر ڈیزائن اور کنسلٹنگ فرم 'پاپولس' کی پریزنٹیشن میں شرکت کریں گے۔ اس میں مدھیہ پردیش میں کھیلوں کے جدید انفرااسٹرکچر کی ترقی پر بات کی جائے گی۔
اس کے بعد ڈاکٹر یادو اسپین فلم کمیشن کے صدر سے ملاقات کریں گے، جس میں مدھیہ پردیش میں بین الاقوامی سطح کی فلم کی شوٹنگ اور تعاون پر تبادلہ خیال کیا جائے گا۔ وزیر اعلیٰ ڈاکٹر یادو پراڈو میوزیم کا بھی دورہ کریں گے۔وزیر اعلیٰ اسپین میں مقیم ہندوستانی تاجر برادری کے نمائندوں سے ملاقات کریں گے اور میڈرڈ میں منعقدہ خصوصی عشائیہ میں شرکت کریں گے۔
یو این آئی۔ ایم جے۔