نئی دہلی، 12 جولائی (یو این آئی) نیشنل اکالی دل نے تنظیم کو مزید مضبوط اور فعال بنانے کے لیے دہلی سمیت ہندوستان کی مختلف ریاستوں میں میٹنگیں منعقد کرنے کا فیصلہ کیا ہے اس کا اعلان دل کے قومی صدر مسٹر پرم جیت سنگھ پمّا نے کیا، انہوں نے بتایا کہ میٹنگوں کے ذریعے بڑی تعداد میں نئے اراکین کو تنظیم سے جوڑا جائے گا اور مختلف ریاستوں میں تنظیم کو وسعت دی جائے گی، مسٹر پرم جیت سنگھ پمّا نے کہا کہ نیشنل اکالی دل طویل عرصے سے عام عوام کے مسائل اور سماجی امور کو نمایاں طور پر اٹھاتا آ رہا ہے۔ اب تنظیم کو زمینی سطح پر مزید مضبوط کرنے کے مقصد سے جگہ جگہ میٹنگیں منعقد کی جائیں گی۔ دہلی کے ساتھ ساتھ دیگر ریاستوں میں بھی رکنیت سازی کی مہم چلا کر نئے ارکان کو ذمہ داریاں سونپی جائیں گی اور ان کا باضابطہ اعلان کیا جائے گا۔
انہوں نے کہا کہ تنظیم کا بنیادی مقصد معاشرے کے ہر طبقے کی آواز بننا اور عوامی مفاد سے جڑے مسائل کو مضبوطی سے اٹھانا ہے۔ نوجوانوں اور خواتین کو بھی تنظیم میں زیادہ سے زیادہ شراکت داری دینے کے لیے خصوصی کوششیں کی جائیں گی۔
اس موقع پر دل کے قومی سکریٹری مسٹر وکرانت موہن، خواتین ونگ کی قومی صدر بھاونا دھون، سوشل ونگ کی قومی صدر رشمیت کور بندرا، دہلی پردیش صدر مسٹر کلدیپ سنگھ مارواہ سمیت تنظیم کے متعدد عہدیداران اور اراکین موجود تھے۔
مسٹر پرم جیت سنگھ پمّا نے بتایا کہ جلد ہی میٹنگوں اور رکنیت سازی کی مہم کا خاکہ تیار کر کے پروگراموں کا اعلان کیا جائے گا۔ انہوں نے کارکنوں سے تنظیم کو مضبوط کرنے اور عوامی مفاد کے کاموں میں بڑھ چڑھ کر حصہ لینے کی اپیل کی۔
یو این آئی۔ م س۔ م الف