EntertainmentPosted at: Mar 21 2025 11:40AM رانی مکھرجی آج اپنی 47 ویں سالگرہ منا رہی ہیںممبئی، 21 مارچ (یو این آئی) بالی ووڈ کی معروف اداکارہ رانی مکھرجی آج 47 برس کی ہو گئیں۔ 21 مارچ 1978 کو ممبئی میں پیدا ہونے والی رانی مکھرجی نے بالی ووڈ میں اپنے کیریئر کا آغاز 1997 میں ریلیز ہونے والی فلم راجہ کی آئے گی بارات سے کیا۔ اگرچہ یہ فلم باکس آفس پر ناکام ثابت ہوئی، لیکن رانی نے اپنے سنجیدہ کردار سے ناظرین کو مسحور کردیا۔ سال 1998 رانی کے کیریئر کے لیے ایک اہم سال ثابت ہوا۔ اس سال انہیں عامر خان کے ساتھ غلام اور شاہ رخ خان کے ساتھ کچھ کچھ ہوتا ہے میں کام کرنے کا موقع ملا۔ دونوں فلمیں باکس آفس پر سپر ہٹ ثابت ہوئیں۔ رانی مکھرجی کو کچھ کچھ ہوتا ہے کے لیے بہترین معاون اداکارہ کے فلم فیئر ایوارڈ سے بھی نوازا گیا۔سال 1999 سے 2002 تک کے برس رانی مکھرجی کے کیرئیر کے لیے اچھے ثابت نہیں رہے۔ اس دوران رانی مکھرجی کی ہیلو برادر، بادل، ہر دل جو پیار کرے گا، حد کر دی آپنے، بچھو، کہیں پیار نہ ہو جائے، چوری چوری چپکے چپکے، بس اتنا ساخواب ہے، پیار دیوانہ ہوتا اور مجھ سے دوستی کروگے فلمیں ریلیز ہوئیں لیکن ٹکٹ کھڑکی پر یہ فلمیں متوقع کامیابی حاصل نہ کر سکیں۔ سال 2002 میں یش راج بینر تلے ریلیز ہونے والی فلم ساتھیا رانی مکھرجی کے کیرئیر کی ایک اور ہٹ فلم ثابت ہوئی۔ اس فلم میں وویک اوبرائے کے ساتھ رانی کی جوڑی کو کافی پسند کیا گیا تھا۔ رانی کو ایک بار پھر کنگ خان شاہ رخ خان کے ساتھ سال 2003 میں ریلیز ہونے والی فلم چلتے چلتے میں کام کرنے کا موقع ملا۔ یہ فلم بھی سپرہٹ ثابت ہوئی۔سال 2004 رانی کے کیرئیر کے لیے ایک اہم سال ثابت ہوا۔ اس سال ان کی یووا، ہم تم اور ویر زارا جیسی فلمیں ریلیز ہوئیں۔ ان تمام فلموں میں، رانی نے اپنی کثیر جہتی صلاحیتوں کا مظاہرہ کیا اور اپنے ادا کردہ کرداروں کے ذریعے ناظرین کو مسحور کر دیا۔ سال 2005 میں ریلیز ہونے والی فلم ’بلیک‘ کا شمار رانی مکھرجی کے کیریئر کی اہم ترین فلموں میں ہوتا ہے۔ سنجے لیلا بھنسالی کی ہدایت کاری میں بننے والی اس فلم میں رانی مکھرجی کو صدی کے میگا اسٹار امیتابھ بچن کے ساتھ کام کرنے کا موقع ملا۔ رانی نے اپنی ٹھوس اداکاری سے نہ صرف شائقین بلکہ ناقدین کے بھی دل جیت لئے۔جاری۔ یو این آئی۔ ایم جے۔