EntertainmentPosted at: Nov 11 2025 2:34PM

جانی واکر نےاپنے خاص اور دلفریب انداز سےناظرین کو مسحور کیا

یوم پیدائش 11نومبر کے موقع پر
ممبئی، 11نومبر (یو این آئی) بد ر الدین جمال الدین قاضی عرف جانی مدھیہ پردیش کے اندور شہر میں 11نومبر1920کو ایک متوسط مسلم خاندان میں پیدا ہوئے۔
بچپن سے ہی اداکار بننے کا شوق تھا لہذا یہی شوق 1942میں ان کے خاندان کو ممبئی لے آیا۔
بالی ووڈ میں قدم رکھنے سے قبل ہنسی کے شہنشاہ جانی واکر کو بطور اداکار اپنے خوابوں کو پورا کرنے کے لئے بس کنڈکٹر کی نوکری بھی کر نی پڑی تھی۔
ان کے والد کے ایک دوست پولس انسپکٹر تھے جن کی سفارش پر انہیں بس کنڈکٹر کی نوکری مل گئی۔
یہ نوکری حاصل کرنے کے بعد جانی واکر بہت خوش ہوئے کیوں کہ انہیں مفت میں ہی پوری ممبئی گھومنے کا موقع مل گیا تھا۔
اس کے ساتھ ہی انہیں ممبئی کے فلم اسٹوڈیو میں بھی جانے کا موقع مل جایا کرتا تھا۔

ان کا بس کنڈکٹری کرنے کا انداز بھی کافی دلچسپ تھا۔
وہ اپنے خاص انداز میں آ واز لگاتے ’’ماہم والے پسنجر اتر نے کو ریڈی ہوجاؤ لیڈیز لوگ پہلے‘‘۔
اسی دوران ان کی ملاقات فلمی دنیا کے مشہور ویلین این اے انصاری اور کے آ صف کے سکریٹری رفیق سے ہوئی۔
جنہوں نے جانی واکر کو فلم انڈسٹری میں کام دلوانے کا وعدہ کیا۔
۔
تقریباً سات آٹھ مہینے کی جدوجہد کے بعد جانی واکر کو فلم ’’ آ خری پیمانے‘‘ میں ایک چھوٹا سا رول ملا۔
اس رول کے لئے انہیں 80روپئے اجرت ملی جبکہ بطور بس کنڈکٹر انہیں پورے مہینے کے لئے صرف 26روپئے ہی ملا کرتے تھے۔

اپنی زبردست مزاحیہ اداکاری سے ناظرین کے دلوں میں گدگدی پیدا کرنے والے جانی واکر کی ملاقات ایک روز اپنے دور کےممتاز اداکار بلراج ساہنی سے ہوئی جو ان کی بس میں سفر کر رہے تھے۔
وہ جانی واکر کے خوش مزاجی اور دلچسپ انداز سے کافی متاثر ہوئے اور انہیں گرودت سے ملنے کی صلاح دی جو ان دنوں فلم ’بازی‘ بنارہے تھے۔
گرودت نے جانی واکر کی صلاحیت سے خوش ہوکر اپنی فلم بازی میں انہیں کام کرنے کا موقع دیا۔

سال 1951میں ریلیز ہونے والی فلم بازی کے بعد جانی واکر بطور مزاحیہ اداکار اپنی شناخت بنانے میں کامیاب رہے اور گرودت کے پسندیدہ اداکاروں میں شامل ہوگئے۔
اس کے بعد انہوں نے گرودت کی کئی فلموں میں کام کیا جن میں آر پار، مسٹر اینڈ مسز 55،پیاسا، چودھویں کا چاند، کاغذ کے پھول جیسی سپر ہٹ فلمیں شامل ہیں۔

نوکیتن کے بینر تلے بنی فلم ٹیکسی ڈرائیور میں جانی واکر کے کردار کا نام مستانہ‘تھا۔
کئی دوستوں نے انہیں اپنا فلمی نام مستانہ رکھنے کی صلاح دی لیکن جانی واکر کو یہ نام پسند نہیں آیا اور انہوں نے اس زمانے کی مشہور ’شراب جانی واکر‘ کے نام پر اپنا نام جانی واکر رکھ لیا۔
فلم کی کامیابی کے بعد گرودت نے خوش ہوکر انہیں تحفے میں ایک کار دی۔
گرودت کی فلموں کے علاوہ جانی واکر نے ٹیکسی ڈرائیور، دیو داس، نیا انداز،چوری چوری، مدھومتی، مغل اعظم، میرے محبوب،بہو بیگم، میرے حضور جیسی کئی سپر ہٹ فلموں میں اپنی مزاحیہ اداکاری سے ناظرین کے دلوں کو مسحور کردیا ۔

جانی واکر کی شہرت کی ایک خاص وجہ یہ بھی تھی کہ ان کی ہر فلم میں ایک یا دو نغمے ان پر ضرور فلمائے جاتے تھے ۔
1956میں گرودت کی فلم سی ا ئی ڈی میں ان پر فلمایا نغمہ ’ اے دل ہے مشکل جینا یہاں،ذرا ہٹ کے ذرا بچ کے یہ ہے ممبئی میری جاں‘ نے پورے ملک میں دھوم مچا دی تھی۔
اس بعد ہر فلم میں ان پر ایک نغمہ ضرور فلمایا جا تا تھا یہاں تک کہ اس کی مقبولیت کو دیکھتے ہوئے فائننسر اور پروڈیوسر کی بھی یہ شرط ہوتی تھی کہ فلم میں جانی واکر پر ایک گیت ضرور ہونا چاہئے۔

ان پر فلمائے نغمے فلم نیا دور کا ’’ میں بمبئی کا بابو‘‘ مدھومتی کا ’’جنگل میں مور ناچا کسی نے نہ دیکھا‘‘ فلم مسٹر اینڈ مسز 55 کا ’’ جانے کہاں میرا جگر گیا جی‘‘ فلم پیاسا کا ’’سر جو تیرا چکرائے یا دل ڈوبا جائے‘‘ فلم چودھویں کا چاند کا نغمہ ’’میرا یار بنا ہے دولہا ‘‘ بھی ناظرین میں کافی مقبول ہوئے۔
جانی واکر پر فلمائے گئے زیادہ تر نغمے محمد رفیع کی آ واز میں ہیں لیکن فلم ’بات ایک رات کی‘ میں ان پر فلمایا نغمہ ’’کس نے چلمن سے مارا نظارہ مجھے‘‘ میں منا ڈے نے اپنی آواز دی تھی۔

جانی واکر نے تقریباً12۔
10فلموں میں بطور ہیرو بھی کام کیا ہے ۔
بطور ہیرو ان کی پہلی فلم پیسہ یہ پیسہ‘ تھی جس میں انہوں نے تین مختلف کردار ادا کئے تھے۔
اس کے بعد ان کے نام پر فلم ڈائرکٹر وید موہن نے 1967میں جانی واکر‘ بنائی تھی۔
سال1958 میں منظر عام پر آنے والی فلم مدھو متی کے ایک منظر میں وہ درخت پر الٹا لٹک کر بتاتے ہیں کہ دنیا ہی الٹ گئی ہے جسے ناظرین آج تک نہیں بھولے ہیں۔
اس فلم کے لئے انہیں سب سے بہترین معاون اداکار کا فلم فیئر ایوارڈ بھی دیا گیا۔
اس کے علاوہ 1968میں ریلیز فلم شکار کے لئےانہیں بہترین مزاحیہ اداکار کے فلم فیئر ایوار ڈ سے نوازا گیا۔

ستر کی دہائی میں جانی واکر نے فلموں میں کام کرنا کافی کم کر دیا تھا کیوں کہ ان کا خیال تھا کہ فلم میں کامیڈی کی سطح میں کافی گراوٹ آ گئی ہے۔
اسی دوران رشی کیش مکھرجی کی فلم’آنند‘ میں انہوں نے ایک چھوٹا سا رول نبھایا جس کے ایک منظر میں وہ راجیش کھنہ کو زندگی کا ایک ایسا سبق دیتے ہیں جس سے ناظرین ہنستے ہنستے سنجیدہ ہوجاتے ہیں۔

جانی واکر کی شادی اس وقت کی معروف اداکارہ شکیلہ کی بہن نور جہاں سے ہوئی۔
نور جہاں بھی اس وقت فلموں میں اداکاری کیا کرتی تھیں۔
ان سے انہیں تین بیٹیاں اور تین بیٹے ناصر خان، ناظم قاضی اور کاظم قاضی ہوئے۔

سال 1986میں اپنے بیٹے کو فلم انڈسٹری میں لانچ کرنے کے لئے انہوں نے فلم’’پہنچے ہوئے لوگ‘‘بنائی جس کے ہدایت کار اور پروڈیوسر وہ خودہی تھے لیکن باکس ا فس پر یہ فلم بری طرح ناکام ثابت ہوئی۔
اس درمیان انہیں کئی فلموں میں اداکاری کرنے کے آ فر ملے لیکن جانی واکر نے کام کرنے سے انکار کر دیا ۔
بعد میں گلزار اور کمل حسن کے زور دینے پر 1998میں فلم ’چاچی 420‘میں انہوں نے ایک چھوٹا سا رول نبھایا جسے ناظرین نے کافی پسند کیا ۔

جانی واکر نے تقریباً پانچ دہائیوں پر مشتمل اپنے طویل فلمی کیریئر میں 300 سے زائد فلموں میں کام کیا۔
اپنے خاص اور دلفریب انداز سےناظرین کو مسحور کرنے والا یہ عظیم مزاحیہ اداکار29جولائی 2003کو اس دنیا کو الوداع کہہ گیا۔

یو این آئی۔
این یو۔

Entertainment

فلم ’دلہنیا ناچ نچائے‘ میں منوج بھاوک کے لکھے گانے دھوم مچا رہے ہیں

سال 2025 میں او ٹی ٹی پر بالی ووڈ ستاروں کی دھوم

شیلیندر کے نغموں میں زندگی کے مختلف رنگوں کی جھلک

فلم ’دلہنیا ناچ نچائے‘ میں منوج بھاوک کے لکھے گانے دھوم مچا رہے ہیں

14 Dec 2025 | 1:57 PM

ممبئی، 14 دسمبر(یو این آئی) گلوکار و شاعر شیلندر کی برسی کے موقع پر ریلیز ہوئی بھوجپوری فلم ’دلہنیا ناچ نچائے‘ میں منوج بھاوک کے لکھے گانے دھوم مچا رہے ہیں۔ آج، 14 دسمبر کو گلوکار شیلندر کی برسی ہے۔ بھوجپوری کی پہلی فلم ’گنگا مائیہ توہے پیاری چڑھائبو‘ کے تمام گانے شیلندر نے لکھے تھے۔ اس فلم کے گانے ریڈیو اور ریکارڈ پر اس قدر مقبول ہوئے کہ یہ فلم سینما گھروں میں کئی ماہ تک چلتی رہی۔ لوگ سینما گھروں تک بیل گاڑی یا پیدل گئے، لیکن فلم ضرور دیکھی۔.