لندن، 5 دسمبر (یو این آئی) یش راج فلمز کی تاریخی بلاک بسٹر فلم ’دل والے دلہنیا لے جائیں گے‘ (ڈی ڈی ایل جے) کے 30 برس مکمل ہونے پر شاہ رُخ خان اور کاجول نے لندن کے لیسٹر اسکوائر میں راج-سمرن کے کانسہ کے مجسمے کی نقاب کشائی کی۔
یہ پہلی بار ہے کہ کسی ہندوستانی فلم کو لیسٹر اسکوائر میں مجسمے کی صورت میں اعزاز دیا گیا ہے۔

کانسے کا یہ مجسمہ فلم کے مرکزی کردار راج اور سمرن کو با وقار انداز میں پیش کرتا ہے اور گزشتہ 30 برسوں میں جنوب ایشیائی کمیونٹیز پر فلم کی مقبولیت کو ظاہر کرتا ہے۔

لیسٹر اسکوائر کی مشہور ’سینز اِن دی اسکوائر‘ ٹریل میں شامل ہونے والے اس مجسمے کا افتتاح دونوں بالی ووڈ ستاروں، یش راج فلمز کے سی ای او اکشے ودھانی اور ہارٹ آف لندن بزنس الائنس کی چیف ایگزیکٹیو روز مورگن کی موجودگی میں کیا گیا۔
یہ تقریب ہندوستان اور برطانیہ کے درمیان گہرے ثقافتی رشتوں کا بھی جشن تھی۔

اس موقع پر شاہ رُخ خان نے کہا کہ ’’ڈی ڈی ایل جے سچے دل سے بنائی گئی فلم تھی۔
ہم محبت کی ایسی کہانی سنانا چاہتے تھے جو رکاوٹوں کو عبور کر لے اور دنیا کو دکھائے کہ محبت دنیا کو بہتر بنا سکتی ہے۔
شاید یہی وجہ ہے کہ ڈی ڈی ایل جے کا اثر 30 برسوں سے قائم ہے! میرے لیے یہ فلم میری شناخت کا حصہ ہے اور یہ بہت خوشی کا لمحہ ہے کہ اس فلم کے ذریعہ کاجول اور مجھے آج بھی محبت مل رہی ہے‘‘۔

شاہ رُخ نے مزید کہا: ‘‘میں برطانیہ کے عوام اور ہارٹ آف لندن بزنس الائنس کا شکر گزار ہوں کہ انہوں نے ڈی ڈی ایل جے کو عزت دی اور ہمیں اس طرح زندہ و جاوید کر دیا۔
یہ ایک جذباتی لمحہ ہے، جس نے کئی یادیں تازہ کر دیں۔
دنیا بھر میں فلم کو ملنے والی محبت پر مجھے بہت فخر ہے اور میں یہ لمحہ پوری ڈی ڈی ایل جے ٹیم، ہدایت کار آدتیہ چوپڑا اور یش راج فلمز کے خاندان کے ساتھ بانٹنا چاہتا ہوں۔
یہ لمحہ میں کبھی نہیں بھولوں گا!‘‘
کاجول نے اس اعزاز پر ردِعمل دیتے ہوئے کہا کہ ’’یہ ناقابلِ یقین ہے کہ ’دل والے دلہنیا لے جائیں گے‘ 30 برس بعد بھی اتنی محبت حاصل کر رہی ہے۔
لندن میں مجسمے کا افتتاح دیکھنا ایسا تھا جیسے ہم اپنی تاریخ کا ایک حصہ دوبارہ جی رہے ہوں، ایک ایسی کہانی جو کئی نسلوں کا سفر طے کر چکی ہے‘‘۔

جاری۔
یو این آئی۔
ایس اے۔
ایف اے